চেন্নাই, ২৫ ফেব্ৰুৱাৰী (হি.স.)। তামিলনাডুৰ স্বাধীনতা সংগ্ৰামী তথা ভাৰতীয় কমিউনিষ্ট পাৰ্টিৰ জ্যেষ্ঠ নেতা আৰ নল্লকান্নুৰ বুধবাৰে ৰাজীৱ গান্ধী চৰকাৰী চিকিৎসালয়ত পৰলোকপ্ৰাপ্তি ঘটে। দীৰ্ঘদিন ধৰি বাৰ্ধক্যজনিত ৰোগত আক্ৰান্ত হৈ আছিল। মৃত্যুৰ সময়ত তেওঁৰ বয়স ১০১ বছৰ হৈছিল।
চিকিৎসালয়ৰ এক বিবৃতি অনুসৰি যোৱা ১ ফেব্ৰুৱাৰীত তেওঁক ইনটেনচিভ কেয়াৰ ইউনিট (আই চি ইউ)ত ভৰ্তি কৰা হৈছিল। বিশেষজ্ঞৰ তত্বাৱধানত চিকিৎসাৰ পিছতো তেওঁৰ স্বাস্থ্যৰ উন্নতি নহ’ল আৰু তেওঁৰ অৱস্থা সংকটজনক হৈয়েই আছিল। আজি দুপৰীয়া ১:৫৫ বজাত শেষ নিশ্বাস ত্যাগ কৰে।
প্ৰখ্যাত কমৰেড আৰ এন কে নামেৰে পৰিচিত নল্লকান্নুৱে তেওঁৰ প্ৰায় আঠ দশকৰ সক্ৰিয় ৰাজনৈতিক কেৰিয়াৰত সৰলতা, সততা আৰু নিস্বাৰ্থ সেৱাৰ উদাহৰণ দাঙি ধৰিছিল। ১৯২৫ চনৰ ২৬ ডিচেম্বৰত টুটিকোৰিন (বৰ্তমান থুথুকুডি) জিলাৰ পেৰুম্পাথু গাঁৱত জন্মগ্ৰহণ কৰিছিল। শিশু অৱস্থাতেই তেওঁ ওচৰৰ পৰা দৰিদ্ৰতা আৰু শোষণৰ সাক্ষী আছিল ।
কমিউনিষ্ট মতাদৰ্শৰ দ্বাৰা প্ৰভাৱিত হৈ তেওঁ ১৯৪৬ চনত চিপিআইত যোগদান কৰে, তেতিয়াও দেশখন ঔপনিৱেশিক শাসনৰ অধীনত আছিল। ১৯৪৮ চনত নেল্লাই ষড়যন্ত্ৰ গোচৰত গ্ৰেপ্তাৰ হৈ ৭ বছৰৰ কাৰাদণ্ড বিহা হয়। কাৰাগাৰত থকা সময়ত তেওঁ অমানৱীয় নিৰ্যাতন সহ্য কৰিছিল। এটা ঘটনাত এজন আৰক্ষীয়ে চিগাৰেটেৰে গোঁফ জ্বলাইছিল, তাৰ পিছত তেওঁ গোটেই জীৱন কেতিয়াও গোঁফ ৰখা নাছিল।
নল্লকান্নুৱে কৃষক আৰু কৃষি শ্ৰমিকৰ অধিকাৰৰ বাবে অদম্যভাৱে যুঁজিছিল। তেওঁ শোষণকাৰী মাটিৰ মালিকৰ বিৰোধিতা কৰিছিল, তামিলনাডুৰ নদীত অবৈধ বালি খননৰ বিৰুদ্ধে প্ৰচাৰ চলাইছিল আৰু সাধাৰণ জনতাক লৈ প্ৰতিটো বিষয় উত্থাপন কৰিছিল। তেওঁ পৰিৱেশ সুৰক্ষাৰ প্ৰবল সমৰ্থক আছিল আৰু কুডানকুলাম পাৰমাণৱিক শক্তি কেন্দ্ৰৰ দৰে প্ৰকল্পৰ বিৰুদ্ধে মাত মাতিছিল।
১৩ বছৰ চি পি আইৰ ৰাজ্যিক সম্পাদক হিচাপে কাৰ্যনিৰ্বাহ কৰিও তেওঁ অতি সহজ-সৰল জীৱন যাপন কৰিছিল। তেওঁৰ ৮০ বছৰীয়া জন্মদিনত দলীয় কৰ্মীসকলে তেওঁক এখন গাড়ী আৰু ১ কোটি টকাৰ আৰ্থিক সাহায্য প্ৰদান কৰে, যিটো তেওঁ মঞ্চৰ পৰা ঘূৰাই দিয়ে, সেই ধন জনসাধাৰণৰ বুলি উল্লেখ কৰিছিল।
২০২২ চনত ৰাজ্য চৰকাৰে তেওঁক থাগাইছাল তমিঝাৰ বঁটা প্ৰদান কৰি ১৫ লাখ ₹ প্ৰদান কৰে। তেওঁ এই ধনৰাশিও ঘূৰাই দিলে আৰু নিজৰ ধনৰ ₹৫,০০০ যোগ দি মুখ্যমন্ত্ৰীৰ সাহায্য পুঁজিত দান কৰিলে। ২০০৮ চনত আম্বেদকাৰ বঁটা আৰু ২০২৩ চনত থাগাইছাল তমিঝাৰ বঁটাকে ধৰি অসংখ্য বঁটাৰে সন্মানিত হয়।
हिन्दुस्थान समाचार / অৰৱিন্দ
