লক্ষ্ণৌ, ২৩ ফেব্ৰুৱাৰী (হি.স.)। বিশ্ব বিনিয়োগৰ মানচিত্ৰত উত্তৰ প্ৰদেশৰ স্থিতি অধিক শক্তিশালী কৰাৰ লক্ষ্যৰে মুখ্যমন্ত্ৰী যোগী আদিত্যনাথে ছিংগাপুৰ ভ্ৰমণৰ প্ৰথম দিনাই বিভিন্ন বিদেশী বিনিয়োগকাৰী আৰু কৰ্পৰেট প্ৰতিনিধিৰ সৈতে গুৰুত্বপূৰ্ণ বৈঠকত মিলিত হয়। এই বৈঠকসমূহত ৰাজ্যখনত বিনিয়োগৰ সুযোগ, উদ্যোগিক সহযোগিতা, আৰু দীৰ্ঘম্যাদী অংশীদাৰিত্বৰ বিভিন্ন দিশৰ ওপৰত বিশদ আলোচনা কৰা হৈছিল। ছিংগাপুৰ ভ্ৰমণৰ প্ৰথম দিনাই মুখ্যমন্ত্ৰী যোগী আদিত্যনাথে প্ৰথমে ছিংগাপুৰৰ আগশাৰীৰ বিনিয়োগ কোম্পানী টেমাছেক হোল্ডিংছৰ অধ্যক্ষ টিও ছি হীন আৰু তেওঁৰ দলৰ সৈতে সাক্ষাৎ কৰে। বৈঠকত টেমাছেকৰ বিশ্বব্যাপী বিনিয়োগ পৰ্টফলিঅ’ আৰু উত্তৰ প্ৰদেশত বিনিয়োগ সন্দৰ্ভত চৰ্চা কৰা হয়।
সোমবাৰে মুখ্যমন্ত্ৰীৰ কাৰ্যালয়ে প্ৰকাশ কৰা এক বিবৃতিত কোৱা হৈছে যে বৈঠকৰ সময়ত মুখ্যমন্ত্ৰীয়ে টেমাছেকক উত্তৰ প্ৰদেশৰ আন্তঃগাঁথনি, লজিষ্টিক, স্বাস্থ্যসেৱা, গুদাম, ফিনটেক ভিত্তিক নগৰ উন্নয়ন, আৰু অন্যান্য আনুষংগিক খণ্ডত বিনিয়োগ কৰিবলৈ আমন্ত্ৰণ জনায়। বৈঠকত গাজিয়াবাদত টেমাছেকৰ পৰ্টফলিঅ’ কোম্পানী মণিপাল হাস্পতালছে প্ৰায় ৫০০ কোটি টকাৰ বিনিয়োগ আৰু ৰাজ্যখনত লজিষ্টিক আৰু গুদামৰ সুবিধা উন্নয়নৰ বাবে এচেণ্ডাছে প্ৰায় ৫০০ কোটি ₹ৰ বিনিয়োগ সম্পৰ্কীয় তথ্যও ভাগ-বতৰা কৰে। এই বিনিয়োগসমূহে ৰাজ্যখনৰ স্বাস্থ্যসেৱা আৰু উদ্যোগিক আন্তঃগাঁথনিলৈ এক নতুন গতি প্ৰদান কৰিব বুলি আশা কৰা হৈছে।
বৈঠকত দুয়োপক্ষই ডাটা চেণ্টাৰ আৰু দক্ষতা বিকাশৰ দৰে উদীয়মান ক্ষেত্ৰসমূহত সহযোগিতা অন্বেষণ কৰিবলৈ সন্মত হয়। এই সহযোগিতা উত্তৰ প্ৰদেশৰ ভৱিষ্যতমুখী আন্তঃগাঁথনি নিৰ্মাণ আৰু ব্যাপক কৰ্মসংস্থাপন সৃষ্টিৰ দৃষ্টিভংগীৰ সৈতে মিল আছে, যাৰ ফলত ৰাজ্যখন প্ৰযুক্তিগতভাৱে সবল আৰু অৰ্থনৈতিকভাৱে অধিক সক্ষম হৈ উঠিছে। মুখ্যমন্ত্ৰীয়ে উত্তৰ প্ৰদেশৰ উন্নত আইন-শৃংখলা পৰিস্থিতি, বিশ্বমানৰ সংযোগ, উন্নয়নশীল এক্সপ্ৰেছৱে নেটৱৰ্ক, প্ৰতিৰক্ষা কৰিডৰ, ডাটা চেণ্টাৰ নীতি, ইলেক্ট্ৰনিকছ উৎপাদন, আৰু দ্ৰুতগতিত উদীয়মান লজিষ্টিক হাবৰ বিষয়ে বিতংভাৱে কয়।
তেওঁ কয় যে উত্তৰ প্ৰদেশ আজি ভাৰতৰ অন্যতম দ্ৰুতগতিত বৃদ্ধি পোৱা অৰ্থনীতি, আৰু ৰাজ্য চৰকাৰে ইজ অৱ ডুইং বিজনেছ (ইওডি)ৰ অধীনত উদ্যোগসমূহক স্বচ্ছ, ক্ষীপ্ৰ, আৰু বিনিয়োগকাৰীৰ অনুকূল পৰিৱেশ প্ৰদান কৰিছে। মুখ্যমন্ত্ৰীয়ে উল্লেখ কৰে যে উত্তৰ প্ৰদেশ চৰকাৰে বিনিয়োগকাৰীৰ সৈতে দীৰ্ঘম্যাদী আৰু বিশ্বাসযোগ্য অংশীদাৰিত্বৰ প্ৰতি দায়বদ্ধ, যাৰ ফলত বৃহৎ পৰিসৰৰ কৰ্মসংস্থাপন সৃষ্টি আৰু ৰাজ্যখনত প্ৰযুক্তিগত সামৰ্থ্যৰ বিকাশ ঘটে।
মুখ্যমন্ত্ৰীৰ এই ভ্ৰমণ উত্তৰ প্ৰদেশৰ বিনিয়োগৰ বাবে তাৎপৰ্যপূৰ্ণ বুলি বিবেচিত হৈছে। আশা কৰা হৈছে যে ইয়াৰ দ্বাৰা উত্তৰ প্ৰদেশত বিদেশী বিনিয়োগৰ নতুন সুযোগ মুকলি হ’ব আৰু ৰাজ্যখনৰ ট্ৰিলিয়ন ডলাৰৰ অৰ্থনীতিৰ লক্ষ্য ত্বৰান্বিত হ’ব। উল্লেখযোগ্য যে ৰাজ্যখনৰ এই বিনিয়োগ প্ৰসাৰ অভিযানৰ অংশ হিচাপে বৰ্তমান উপ-মুখ্যমন্ত্ৰী কেশৱ প্ৰসাদ মৌৰ্যই ইউৰোপ ভ্ৰমণত আছে।
हिन्दुस्थान समाचार / মনোজ কুমাৰ শইকীয়া
