নতুন দিল্লী, ২৩ ফেব্ৰুৱাৰী (হি.স.)। ভাৰত আৰু ফ্ৰান্সে দুগুণ কৰ পৰিহাৰ চুক্তি বা ডাবল টেক্সেচন এভয়ডেন্স এগ্ৰিমেণ্ট (ডিটিএচি) সংশোধন কৰিছে। মষ্ট ফেভাৰেড নেচন (এম এফ এন)ৰ ব্যৱস্থাটোও আঁতৰাই পেলোৱা হৈছে, যাৰ ফলত কৰ ব্যৱস্থালৈ অধিক স্পষ্টতা আৰু নিশ্চয়তা আহি পৰিছে।
সোমবাৰে বিত্ত মন্ত্ৰালয়ে এক বিবৃতিত কয় যে ভাৰত আৰু ফ্ৰান্সে ডাবল টেক্সেচন এভয়ডেন্স ট্ৰিটি (ডিটিএচি) উন্নীতকৰণৰ বাবে সংশোধনী প্ৰট’কলত স্বাক্ষৰ কৰিছে। এই সংশোধনী প্ৰট’কলৰ জৰিয়তে কৰ সন্ধিখন আন্তঃৰাষ্ট্ৰীয় মানদণ্ডৰ সৈতে মিলাই বিনিয়োগক প্ৰসাৰিত কৰা আৰু অৰ্থনৈতিক সহযোগিতা শক্তিশালী কৰা হ’ব। মন্ত্ৰালয়ৰ মতে, শেহতীয়াকৈ ফ্ৰান্সৰ ৰাষ্ট্ৰপতিৰ ভাৰত ভ্ৰমণৰ সময়ত ১৯৯২ চনৰ ২৯ ছেপ্টেম্বৰৰ ডাবল টেক্সেচন এভয়ডেন্স ট্ৰিটি (ভাৰত-ফ্ৰান্স ডিটিএচি) সংশোধন কৰা এটা প্ৰট'কল স্বাক্ষৰিত হৈছিল। এই সংশোধনী প্ৰট’কলত ভাৰত চৰকাৰৰ কেন্দ্ৰীয় প্ৰত্যক্ষ কৰ ব’ৰ্ডৰ অধ্যক্ষ ৰবি আগৰৱাল আৰু ভাৰতত ফ্ৰান্সৰ ৰাষ্ট্ৰদূত থিয়ৰী মাথাউৱে নিজ নিজ চৰকাৰৰ হৈ স্বাক্ষৰ কৰিছিল।
বিত্ত মন্ত্ৰালয়ৰ তথ্য অনুসৰি, লভ্যাংশ আয়ৰ ওপৰত কৰ হাৰ পূৰ্বে ১০ শতাংশ আছিল, এতিয়া পুঁজিৰ কমেও ১০ শতাংশ থকাসকলৰ বাবে ৫ শতাংশ, আৰু বাকী সকলো গোচৰৰ বাবে ১৫ শতাংশলৈ সংশোধন কৰা হৈছে। এই সংশোধনীয়ে ভাৰত-আমেৰিকাৰ দ্বৈত কৰ পৰিহাৰ চুক্তিৰ সংজ্ঞাৰ সৈতে মিল ৰাখিবলৈ কাৰিকৰী সেৱাৰ বাবে মাচুলৰ সংজ্ঞাটোও সংশোধন কৰে আৰু সেৱাৰ পি ই অন্তৰ্ভুক্ত কৰি স্থায়ী প্ৰতিষ্ঠানৰ পৰিসৰ বৃদ্ধি কৰে।
মন্ত্ৰালয়ৰ মতে, সংশোধনী প্ৰট’কলৰ জৰিয়তে প্ৰৱৰ্তন কৰা পৰিৱৰ্তনসমূহ দুয়োখন দেশৰ আইন অনুসৰি আভ্যন্তৰীণ পদ্ধতি সম্পূৰ্ণ হোৱাৰ পিছত আৰু দুয়োখন দেশৰ মাজত সহমতত উপনীত হোৱা চৰ্তসমূহৰ অধীনত কাৰ্যকৰী হ’ব। এই সংশোধনী প্ৰট’কলে ভাৰত আৰু ফ্ৰান্স উভয়ৰে স্বাৰ্থৰ মাজত ভাৰসাম্য ৰক্ষা কৰি শেহতীয়া আন্তঃৰাষ্ট্ৰীয় মানদণ্ড অনুসৰি ভাৰত-ফ্ৰান্স ডিটিএচিক আপডেট কৰে। সংশোধিত প্ৰট’কলে কৰদাতাসকলক অধিক কৰ নিশ্চয়তা প্ৰদান কৰিব আৰু ভাৰত আৰু ফ্ৰান্সৰ মাজত বিনিয়োগ, প্ৰযুক্তি, আৰু কৰ্মীৰ প্ৰবাহক প্ৰসাৰিত কৰিব, যাৰ ফলত দুয়োখন দেশৰ মাজত অৰ্থনৈতিক সম্পৰ্ক শক্তিশালী হ’ব।
हिन्दुस्थान समाचार / অৰৱিন্দ
