নতুন দিল্লী, ২৩ ফেব্ৰুৱাৰী (হি.স.)। ভাৰতৰ ডিপ টেক কোম্পানীসমূহৰ পৰা বৈদ্যুতিক বাহন (ইভি) ষ্টাৰ্টআপসমূহে বাজেটত আবণ্টিত প্ৰডাকচন-লিংকড উৎসাহ (ইনচেন্টিভ) আঁচনিৰ ধন সম্পূৰ্ণৰূপে ব্যৱহাৰ কৰিবলৈ গধুৰ উদ্যোগ মন্ত্ৰালয়ক দাবী জনাইছে। ইভি ষ্টাৰ্টআপসমূহে কয় যে যোৱা বছৰ ঘোষণা কৰা পিএলআই আঁচনিৰ ধনৰ মাত্ৰ ১০ শতাংশহে প্ৰকৃততে ব্যৱহাৰ কৰা হৈছিল আৰু সেয়াও, মাত্ৰ কেইটামান নিৰ্দিষ্ট উদ্যোগহে লাভৱান হৈছিল। ফলস্বৰূপে উৎপাদন উৎসাহৰ বাবে কম পুঁজিৰ ব্যৱস্থা কৰা হৈছে। ২০২৬-২৭ চনৰ বাজেটত পিএলআই আঁচনিৰ বাবে ৫,৯৩৯ কোটি টকা আবণ্টন দিয়া হৈছে। ইভি ষ্টাৰ্টআপসমূহে কয় যে যদিহে এই পুঁজিৰ সঠিক ব্যৱহাৰ হয় তেন্তে ইয়াৰ ফলত ভাৰতত বৈদ্যুতিক বাহন আৰু আনুষংগিক উদ্যোগসমূহৰ যথেষ্ট উত্থান ঘটিব পাৰে।
২০২৬ চনৰ প্ৰাৰম্ভিক প্ৰতিবেদন অনুসৰি ইভি ষ্টাৰ্টআপৰ বাবে পিএলআই আঁচনিৰ অধীনত ধনৰ ব্যৱহাৰ অতি কম আছিল। অনুমান অনুসৰি আবণ্টিত ধনৰ মাত্ৰ প্ৰায় ১০ শতাংশহে বিতৰণ কৰা হৈছিল আৰু তাৰ ভিতৰত লক্ষ্য উৎসাহৰ মাত্ৰ ২.৮ শতাংশহে উন্নত ৰসায়ন কোষ (এচিচি) বেটাৰী খণ্ডত বিতৰণ কৰা হৈছিল। বাজেট বৃদ্ধিৰ পিছতো ২০২৬ বিত্তীয় বৰ্ষৰ শেষৰ ফালে পিএলআই আঁচনিৰ ধনৰ মাত্ৰ ১২ শতাংশহে ব্যৱহাৰ কৰা হ’ব।ইভি ষ্টাৰ্টআপসমূহে কয় যে কেৱল আবণ্টন বৃদ্ধি কৰিলে উদ্যোগটো ত্বৰান্বিত নহ’ব। এই ধনৰ এক উল্লেখযোগ্য অংশ ইভি ষ্টাৰ্টআপৰ হাতত নপৰালৈকে ভাৰতীয় কোম্পানীসমূহে প্ৰতিযোগিতাত অৱতীৰ্ণ হ’ব নোৱাৰিব। বৰ্তমান কেইজনমান প্ৰতিষ্ঠিত খেলুৱৈয়েহে লাভৱান হৈছে।
অইলাৰ মটৰ্ছৰ প্ৰতিষ্ঠাপক তথা মুখ্য কাৰ্যবাহী বিষয়া সৌৰভ কুমাৰে কয় যে বাণিজ্যিক ইভিসমূহে সৰ্বাধিক ৰিটাৰ্ণ প্ৰদান কৰে। তথাপিও পিএলআই খণ্ডই পৰ্যাপ্ত উৎসাহ লাভ কৰা নাই। বৃহৎ পৰম্পৰাগত ওইএম (OEM) সমূহক এতিয়াও অগ্ৰাধিকাৰ দিয়া হৈছে। এই খণ্ডত চাকৰি সৃষ্টি ত্বৰান্বিত কৰিবলৈ পিএলআইৰ কাঠামো সলনি কৰাটো প্ৰয়োজনীয়। টাৰ্ণঅভাৰ ভিত্তিক মাপকাঠীসমূহ প্ৰকৃত ইভি বিক্ৰীৰ তথ্যলৈ স্থানান্তৰিত কৰিব লাগে।
ৰিভাৰ মবিলিটিৰ সহ-প্ৰতিষ্ঠাপক তথা মুখ্য কাৰ্যবাহী বিষয়া ৰবিন্দ মণিয়ে কয় যে দেশৰ বৈদ্যুতিক বাহন (ইভি) উদ্যোগৰ মূল উদ্দেশ্য হৈছে দেশৰ ভিতৰতে বহনক্ষম সামৰ্থ্য গঢ়ি তোলা। ইভি উদ্যোগৰ বাবে বিশ্বব্যাপী হাব হ’ব বিচৰা উদ্ভাৱকসকলক ভাৰতে সমৰ্থন কৰিব লাগিব। তেতিয়াহে ভাৰত প্ৰকৃত ইভি নিৰ্মাণ কেন্দ্ৰ হ’ব পাৰিব।
हिन्दुस्थान समाचार / অৰৱিন্দ
