নতুন দিল্লী, ২২ ফেব্ৰুৱাৰী (হি.স.)। প্ৰধানমন্ত্ৰী নৰেন্দ্ৰ মোদীয়ে দেওবাৰে ঘোষণা কৰে যে অহা ২৩ ফেব্ৰুৱাৰীত ৰাষ্ট্ৰপতি ভৱনত ৰাজাজী উৎসৱ উদযাপন কৰা হ'ব। এই উপলক্ষে ৰাষ্ট্ৰপতি ভৱনৰ কেন্দ্ৰীয় চোতালত স্বাধীন ভাৰতৰ প্ৰথম ভাৰতীয় গৱৰ্ণৰ জেনেৰেল চি ৰাজগোপালাচাৰীৰ প্ৰতিমূৰ্তি উন্মোচন কৰা হ'ব।
তেওঁৰ মাহেকীয়া ৰেডিঅ' অনুষ্ঠান মন কি বাতৰ ১৩১ সংখ্যক খণ্ডত প্ৰধানমন্ত্ৰীয়ে কয় যে আজি দেশখন আগবাঢ়িছে, দাসত্বৰ প্ৰতীক এৰি, ভাৰতীয় সংস্কৃতিৰ সাৰমৰ্মক গুৰুত্ব দি। তেওঁ কয় যে ৰাষ্ট্ৰপতি ভৱনেও এই দিশত এক গুৰুত্বপূৰ্ণ পদক্ষেপ গ্ৰহণ কৰিছে, ৰাজাজী উৎসৱৰ আয়োজন কৰিছে।
প্ৰধানমন্ত্ৰীয়ে কয় যে ক্ষমতাক পদ হিচাপে নহয়, সেৱা হিচাপেহে চোৱা সেই মহান ব্যক্তিসকলৰ ভিতৰত চি ৰাজগোপালাচাৰীও আছিল। ৰাজহুৱা জীৱনত তেওঁৰ আচৰণ, আত্মসংযম, স্বাধীন চিন্তাধাৰাই দেশবাসীক অনুপ্ৰাণিত কৰি আহিছে।
অনুষ্ঠানত প্ৰধানমন্ত্ৰীয়ে পৰীক্ষাৰ বাবে প্ৰস্তুতি চলোৱা ছাত্ৰ-ছাত্ৰীকো সম্বোধন কৰে। তেওঁ কয় যে শিশুসকল পৰীক্ষা যোদ্ধা আৰু নিজৰ ওপৰত আস্থা থাকিব লাগে। তেওঁ জোৰ দি কয় যে এজন ছাত্ৰৰ মূল্য তেওঁলোকৰ মাৰ্কশ্বীটৰ দ্বাৰা নিৰ্ধাৰিত নহয়। তেওঁ গুৰুত্ব আৰোপ কৰে যে ছাত্ৰ-ছাত্ৰীসকলে যিখিনি অধ্যয়ন কৰিছে তাতেই মনোনিৱেশ কৰিব লাগে আৰু এটাও কঠিন প্ৰশ্নই তেওঁলোকক আগুৰি ধৰিব নিদিব লাগে। তেওঁ ছাত্ৰ-ছাত্ৰীসকলক অভিভাৱক আৰু শিক্ষকৰ সৈতে যোগাযোগ বজাই ৰাখিবলৈ পৰামৰ্শ দি পৰীক্ষা আৰু জীৱন দুয়োটাতে সফলতা লাভ কৰিব বুলি আত্মবিশ্বাস প্ৰকাশ কৰে।
এই উপলক্ষে প্ৰধানমন্ত্ৰীয়ে তামিলনাডুৰ প্ৰাক্তন মুখ্যমন্ত্ৰী জে জয়াললিতালৈও শ্ৰদ্ধাঞ্জলি জ্ঞাপন কৰে। আম্মা জয়াললিতাৰ দৰে জনপ্ৰিয় নেতা ৰাইজৰ হৃদয়ত জীয়াই আছে বুলিও তেওঁ কয়। বিশেষকৈ মহিলা সবলীকৰণৰ বাবে তেওঁ বহু প্ৰশংসনীয় প্ৰচেষ্টা চলাইছিল, যিবোৰ সদায় স্মৰণীয় হৈ থাকিব।
हिन्दुस्थान समाचार / মনোজ কুমাৰ শইকীয়া
