নতুন দিল্লী, ২২ ফেব্ৰুৱাৰী (হি.স.)। ভাৰত আৰু ব্ৰাজিলে ডাক খণ্ডত সহযোগিতা সন্দৰ্ভত বুজাবুজি চুক্তিত স্বাক্ষৰ কৰিছে। যোগাযোগ মন্ত্ৰালয়ে ইয়াক দুয়োখন দেশৰ মাজত ডাক সেৱা, ডিজিটেল ৰূপান্তৰ, আৰু সৰ্বাংগীন সেৱা প্ৰদানৰ ক্ষেত্ৰত দ্বিপাক্ষিক সহযোগিতা শক্তিশালী কৰাৰ দিশত এক গুৰুত্বপূৰ্ণ পদক্ষেপ বুলি অভিহিত কৰে।
ব্ৰাজিলৰ ৰাষ্ট্ৰপতি লুইজ ইনাছিও লুলা দা চিলভাৰ ভাৰত ভ্ৰমণৰ সময়ত কেন্দ্ৰীয় যোগাযোগ মন্ত্ৰী জ্যোতিৰাদিত্য এম চিণ্ডিয়া আৰু ব্ৰাজিলৰ যোগাযোগ মন্ত্ৰী ফ্ৰেডেৰিকো ডি চেকুৱেৰা ফিলহ’ই বুজাবুজি চুক্তিত স্বাক্ষৰ কৰি নথি-পত্ৰ বিনিময় কৰে।
বুজাবুজি চুক্তিত উত্তম পদ্ধতিৰ আদান-প্ৰদান, ডিজিটেল ৰূপান্তৰ, সাৰ্বজনীন সেৱা প্ৰদান, সামৰ্থ্য বিকাশ, যৌথ প্ৰকল্প, বিশ্বব্যাপী সমন্বয়, আৰু দক্ষিণ-দক্ষিণ সহযোগিতাৰ ব্যৱস্থা কৰা হৈছে। এই চুক্তিখন প্ৰথম অৱস্থাত পাঁচ বছৰৰ বাবে বৈধ হ’ব, স্বয়ংক্ৰিয়ভাৱে নবীকৰণৰ ব্যৱস্থা থাকিব, আৰু দুয়োখন দেশৰ আইন-কানুন অনুসৰি কাৰ্যকৰী হ’ব।
এই কৌশলগত অংশীদাৰিত্বই ভাৰত আৰু ব্ৰাজিলৰ ডাক নেটৱৰ্কক আধুনিকীকৰণ কৰাই নহয়, গ্ল’বেল চাউথৰ দুখন প্ৰধান দেশ হিচাপে তেওঁলোকৰ মাজত অৰ্থনৈতিক আৰু সামাজিক সম্পৰ্কও শক্তিশালী কৰিব।
हिन्दुस्थान समाचार / মনোজ কুমাৰ শইকীয়া
