নতুন দিল্লী, ২২ ফেব্ৰুৱাৰী (হি.স.)। ভাৰতৰ নিৰ্বাচন আয়োগে (ইচিআই) অহা ২৪ ফেব্ৰুৱাৰীত নতুন দিল্লীৰ ভাৰত মণ্ডপমত নিৰ্বাচন আয়োগ আৰু ৰাজ্যিক নিৰ্বাচন আয়ুক্তৰ ৰাষ্ট্ৰীয় ঘূৰণীয়া মেজ সন্মিলন আহ্বান কৰিছে। এই সন্মিলনৰ সভাপতিত্ব কৰিব মুখ্য নিৰ্বাচন আয়ুক্ত জ্ঞানেশ কুমাৰে।
নিৰ্বাচন আয়োগৰ তথ্য অনুসৰি ২৭ বছৰৰ ব্যৱধানৰ অন্তত এই ঘূৰণীয়া মেজ সন্মিলন আয়োজন কৰা হৈছে। শেষৰখন বৈঠক ১৯৯৯ চনত অনুষ্ঠিত হৈছিল । দেশৰ নিৰ্বাচনী প্ৰক্ৰিয়াক অধিক স্বচ্ছ আৰু প্ৰযুক্তিগতভাৱে শক্তিশালী কৰাৰ বাবে এই বৈঠকৰ আয়োজন কৰা হৈছে। এই সন্মিলনত নিৰ্বাচন আয়ুক্ত ড° সুখবীৰ সিং সন্ধু আৰু ড° বিবেক যোশীও উপস্থিত থাকিব।
সকলো ৰাজ্য আৰু কেন্দ্ৰীয় শাসিত অঞ্চলৰ ৰাজ্যিক নিৰ্বাচন আয়ুক্তসকলে তেওঁলোকৰ আইনী আৰু কাৰিকৰী বিশেষজ্ঞসকলৰ সৈতে এই সন্মিলনত অংশগ্ৰহণ কৰিব । এই সন্মিলনত ৩৬খন ৰাজ্য আৰু কেন্দ্ৰীয় শাসিত অঞ্চলৰ সকলোৰে মুখ্য নিৰ্বাচনী বিষয়াসকলেও অংশগ্ৰহণ কৰিব।
এই সন্মিলনৰ প্ৰধান উদ্দেশ্য হৈছে কেন্দ্ৰীয় আৰু ৰাজ্যিক নিৰ্বাচনী সংস্থাসমূহৰ মাজত উন্নত সমন্বয় গঢ়ি তোলা, সহযোগী ফেডাৰেলিজমৰ মনোভাৱ শক্তিশালী কৰা। দিনজোৰা এই সন্মিলনত প্ৰযুক্তি, ইভিএম, ভোটাৰ তালিকা ভাগ-বতৰাকে ধৰি নিৰ্বাচনী প্ৰক্ৰিয়া শক্তিশালী কৰাৰ ওপৰত আলোচনা কৰা হ’ব। ইলেক্ট্ৰনিক ভোটিং মেচিনৰ শক্তিশালীতা, স্বচ্ছতা, আৰু সুৰক্ষা ব্যৱস্থাৰ বিষয়ে বিতংভাৱে আলোচনা কৰা হ’ব। জ্যেষ্ঠ বিষয়াসকলে ইচিআইৰ নতুন ডিজিটেল প্লেটফৰ্ম ইচিনেটতো উপস্থাপন কৰিব, যিয়ে ডিজিটেলভাৱে নিৰ্বাচনী সেৱাসমূহ সুশৃংখলিত কৰিব।
हिन्दुस्थान समाचार / মনোজ কুমাৰ শইকীয়া
