গুৱাহাটী, ২২ ফেব্ৰুৱাৰী (হি.স.)। মুখ্যমন্ত্ৰী ড০ হিমন্ত বিশ্ব শৰ্মাই দেওবাৰে অসম প্ৰদেশ কংগ্ৰেছৰ প্ৰাক্তন সভাপতি ভূপেন কুমাৰ বৰাক বিজেপিলৈ আদৰণি জনাই এয়া তেওঁৰ বাবে নতুন ৰাজনৈতিক ইনিংছৰ আৰম্ভণি বুলি অভিহিত কৰে।

সংবাদ মাধ্যমৰ সৈতে হোৱা এক বাৰ্তালাপত মুখ্যমন্ত্রী শৰ্মাই কয় যে বৰাই ৩২ বছৰ ধৰি কংগ্রেছ দললৈ উল্লেখযোগ্য অৱদান আগবঢ়াই আহিছে৷ তেওঁ কয়, ভূপেন কুমাৰ বৰাই দীৰ্ঘদিন ধৰি কংগ্ৰেছ দলৰ সেৱা আগবঢ়াই আহিছে। আজি তেওঁ নতুন ৰাজনৈতিক যাত্ৰা আৰম্ভ কৰিছে। তেখেতৰ শুভকামনা জনাইছো।

ৰাজ্যিক বিজেপিৰ সভাপতি দিলীপ শইকীয়া আৰু দলৰ সাংসদ বৈজয়ন্ত পাণ্ডাৰ উপস্থিতিত বৰাই বিজেপিত যোগদান কৰে। ৰাজ্যৰ আগন্তুক বিধানসভা নিৰ্বাচনৰ পূৰ্বে এই বিকাশ ৰাজনৈতিকভাৱে তাৎপৰ্যপূৰ্ণ বুলি বিবেচিত হৈছে।

ইতিমধ্যে মুখ্যমন্ত্ৰীয়ে কংগ্ৰেছৰ পৰা পদত্যাগ কৰি বৰাই বিজেপিত যোগদান কৰিব বুলি ইংগিত দিছিল। ৰাজনৈতিক যাত্ৰাৰ কথা সোঁৱৰণ কৰিব বৰাই কয় যে তেওঁ ৩২ বছৰ কংগ্ৰেছ দলত কাৰ্যনিৰ্বাহ কৰিছিল, বিধায়কৰ পৰা আৰম্ভ কৰি অসম প্ৰদেশ কংগ্ৰেছ কমিটীৰ সভাপতিলৈকে পদত অধিষ্ঠিত হৈছিল।

বৰাই কংগ্ৰেছ দলৰ ভিতৰত থকা মতানৈক্যৰ কথাও উল্লেখ কৰে। দলৰ নেতা গৌৰৱ গগৈ আৰু জ্যেষ্ঠ নেতা ৰকিবুল হুছেইনৰ সৈতে হোৱা আভ্যন্তৰীণ আলোচনাৰ সময়ত তেওঁ অপমানিত অনুভৱ কৰা বুলি উল্লেখ কৰে। তেওঁ নিজৰ উদ্বেগ ৰাহুল গান্ধীক জনাইছিল যদিও কোনো সঁহাৰি নাপালে বুলিও তেওঁ কয়।

২০২১ চনত যেতিয়া বৰা এ পি চি চিৰ সভাপতি হৈছিল তেতিয়া কংগ্ৰেছ দলৰ মিত্ৰতা আছিল এ আই ইউ ডি এফৰ সৈতে, যিটো পিছলৈ তেওঁ শেষ কৰিছিল। ভাৰত মিত্ৰজোঁট গঠনৰ পূৰ্বে অসমৰ ১৬টা দলৰ সৈতে চুক্তিত উপনীত হোৱাৰ উদ্যোগ লোৱা বুলিও দাবী কৰে।

মন কৰিবলগীয়া যে ৰাজ্যৰ বিধানসভা নিৰ্বাচনৰ প্ৰস্তুতি তীব্ৰতৰ হোৱাৰ সময়তে জ্যেষ্ঠ কংগ্ৰেছ নেতা বৰাই বিজেপিত প্ৰৱেশ কৰিছে।

हिन्दुस्थान समाचार / মনোজ কুমাৰ শইকীয়া