দক্ষিণ শালমাৰা মানকাচৰ, ২১ ফেব্ৰুৱাৰী (হি.স.)। দক্ষিণ শালমাৰা মানকাচৰ জিলাৰ মানকাচৰ বিদ্যুৎ সংমণ্ডলৰ অন্তৰ্গত ময়নাবান্ধাত বিদ্যুৎ বিভাগৰ কামৰ চৰম হেমাহিৰ বাবে বিদ্যুৎ পৰিবাহী তাঁৰ মৰণ ফান্দত পৰিণত হৈছে ৷

মুৰৰ ওপৰত উচ্চ পৰিবাহী বিদ্যুতৰ তাঁৰ নামি অহাৰ বাবে দীৰ্ঘদিন ধৰি বিপদ সংকুল ভাবে যাতায়ত কৰিবলগীয়া হৈছে গাঁও খনৰ ৰাইজে ৷ ৰাইজে উপায়ন্তৰ এনেদৰে জৰাজীৰ্ণ বাঁহৰ খুটা লগাই যাতায়ত কৰিব লগীয়া হৈছে ৷

বিদ্যুৎ বিভাগক কেইবাবাৰো অভিযোগ দিয়াৰ পিছতো আজিলৈকে কোনো ধৰণৰ গুৰুত্ব আৰোপ নকৰাৰ অভিযোগ উত্থাপিত হৈছে ৷ মন কৰিবলগীয়া যে, বিভিন্ন বিদ্যালয়ৰ ছাত্ৰ ছাত্ৰীকে আদি কৰি ময়নাবান্ধা অঞ্চলৰ ৰাইজে উচ্চ বিদ্যুৎ পৰিবাহী তাৰৰ তলেৰে বিপদ সংকুল ভাবে যাতায়ত কৰিবলগীয়া হয় ।

বিশেষকৈ বাৰিষাৰ সময়ত ময়নাবান্ধা অঞ্চলৰ ৰাইজে মানকাচৰ বিদ্যুৎ বিভাগৰ কামৰ গাফিলতিৰ বাবে বিভিন্ন ধৰণৰ সমস্যাত ভুগি আছে । ৰাইজে অতিশীঘ্ৰে এই সমস্যা সমাধান কৰি দিয়াৰ বাবে বিদ্যুৎ বিভাগক দাবী জনায়।

---------------

হিন্দুস্থান সমাচাৰ / প্ৰকাশ ডেকা