দোহা, ২০ ফেব্ৰুৱাৰী (হি.স.)। কাটাৰ অ’পেন টেনিছ প্ৰতিযোগিতাৰ বৃহস্পতিবাৰে অনুষ্ঠিত কোৱাৰ্টাৰ ফাইনেলত ৰোমাঞ্চকৰ প্ৰদৰ্শন দেখা যায়। স্পেনিছ তাৰকা কাৰ্লোছ আলকাৰাজে কেৰেন খাচানভক ঘনিষ্ঠ প্ৰতিদ্বন্দ্বিতাত পৰাস্ত কৰি ফাইনেল চাৰিটাত প্ৰৱেশ কৰাৰ বিপৰীতে ইটালীৰ জানিক ছিনাৰে জাকুব মেনচিকৰ হাতত পৰাস্ত হয়।

অষ্ট্ৰেলিয়ান অ’পেনত কেৰিয়াৰ গ্ৰেণ্ড শ্লেম সম্পূৰ্ণ কৰাৰ পিছত প্ৰথমখন প্ৰতিযোগিতাত অংশগ্ৰহণ কৰা আলকাৰাজে খাচানভক ৬-৭ (৩/৭), ৬-৪, ৬-৩ ব্যৱধানত পৰাস্ত কৰে।

টাই ব্ৰেকত প্ৰথম ছেটত পৰাস্ত হোৱাৰ পিছত তেওঁ উল্লেখযোগ্য প্ৰত্যাৱৰ্তন ঘটায়, পৰৱৰ্তী দুটা ছেটত জয়ী হৈ মেচখন জয়ী হয়।

এতিয়া আলকাৰাজে ছেমিফাইনেলত মুখামুখি হ’ব আন্দ্ৰে ৰুবলেভৰ বিৰুদ্ধে। ৰুব্লেভে নিজৰ কোৱাৰ্টাৰ ফাইনেলত ষ্টেফানোছ ছিচিপাছক ৬-৩, ৭-৬ (৭/২) গ’লত পৰাস্ত কৰে।

আনহাতে, বিশ্বৰ দুই নম্বৰ ছিনাৰৰ অভিযান ইয়াতেই অন্ত পৰিল। ষষ্ঠ ছিড জাকুব মেনচিকৰ হাতত ৭-৬ (৭/৩), ২-৬, ৬-৩ ব্যৱধানত পৰাস্ত হয়।

জয়ৰ পিছত মেনচিকে কয় যে তেওঁ বিজয়ী মানসিকতাৰে খেলখনত প্ৰৱেশ কৰিছিল। এতিয়া তেওঁ ছেমিফাইনেলত মুখামুখি হ’ব ফ্ৰান্সৰ আৰ্থাৰ ফিলছৰ বিৰুদ্ধে, যিয়ে জিৰি লেহেকাক পোনপটীয়া ছেটত পৰাস্ত কৰি অন্তিম চাৰিটাত প্ৰৱেশ কৰে।

हिन्दुस्थान समाचार / অৰৱিন্দ