ৱাশ্বিংটন, ২০ ফেব্ৰুৱাৰী (হি.স.)। আৱামী লীগ নিষিদ্ধ কৰা অন্তৱৰ্তীকালীন চৰকাৰে গৃহীত কৰা অধ্যাদেশৰ বৈধতাক লৈ প্ৰশ্ন উত্থাপন কৰিছে বহিষ্কৃত বাংলাদেশৰ প্ৰাক্তন প্ৰধানমন্ত্ৰী শ্বেখ হাছিনাৰ পুত্ৰ ছাজিব ৱাজেদে। তেওঁ উল্লেখ কৰে যে বিএনপি নেতৃত্বাধীন নতুন চৰকাৰখনৰ সাংবিধানিক সময়সীমা ৩০ দিনৰ ভিতৰত, যাৰ ভিতৰত অধ্যাদেশৰ সিদ্ধান্ত লোৱা হ’ব।
ৱাজেদে এক বিবৃতিত কয় যে অন্তৱৰ্তীকালীন চৰকাৰে সন্ত্ৰাসবাদ বিৰোধী আইন ২০০৯ সংশোধন কৰি নতুন অধ্যাদেশ জাৰি কৰি যিকোনো ৰাজনৈতিক দলৰ কাৰ্যকলাপ নিষিদ্ধ কৰাৰ ক্ষমতা প্ৰদান কৰিছে। ইয়াৰ ভিত্তিত আৱামি লীগৰ বিৰুদ্ধে ব্যৱস্থা ল’বলৈ এসআৰও ১৩৭ এআইএন/২০২৫ জাৰি কৰা হয়।
বাংলাদেশৰ সংবিধানৰ ৯৩(২) অনুচ্ছেদৰ উদ্ধৃতি দি তেওঁ কয় যে নতুন চৰকাৰ গঠনৰ পিছত সংসদৰ প্ৰথম অধিৱেশনত যিকোনো অধ্যাদেশ উত্থাপন কৰিব লাগিব। যদিহে সংসদে ৩০ দিনৰ ভিতৰত আইন হিচাপে অধ্যাদেশ গৃহীত নকৰে তেন্তে স্বয়ংক্ৰিয়ভাৱে এই অধ্যাদেশ ম্যাদ হ’ব।
ৱাজেদৰ মতে বিএনপি নেতৃত্বাধীন চৰকাৰৰ হাতত দুটা বিকল্প আছে— হয় অধ্যাদেশখনৰ ম্যাদ উকলি যাবলৈ দিয়া, নহয় বিধানসভাৰ অনুমোদন দি স্থায়ী আইনত অন্তৰ্ভুক্ত কৰা। তেওঁ সকীয়াই দিয়ে যে যদি সংসদে এই সংশোধনীক বৰ্তমানৰ ৰূপত অনুমোদন জনায় তেন্তে আৱামি লীগক “সত্তা” হিচাপে নিষিদ্ধ কৰা আৰু নিৰ্বাচন আয়োগে পঞ্জীয়ন বন্ধ কৰাৰ দৰে কাৰ্য্য ন্যায়িক পৰ্যালোচনাৰ আওতালৈ আহিব পাৰে।
তেওঁ যুক্তি দিছিল যে যদি সংসদে এই সংশোধনী গৃহীত কৰে তেন্তে ইয়াক সন্ত্ৰাসবাদ বিৰোধী আইনখনৰ “অসাধাৰণ ব্যৱহাৰ”ক সমৰ্থন কৰা বুলি গণ্য কৰা হ’ব আৰু ই গণতান্ত্ৰিক প্ৰক্ৰিয়াক ক্ষতিগ্ৰস্ত কৰিব পাৰে।
ৱাজেদে কয় যে যদিহে নতুন চৰকাৰে অধ্যাদেশখনত অনুমোদন নিদিয়ে আৰু ৩০ দিনৰ পাছত ইয়াৰ ম্যাদ উকলিবলৈ অনুমতি দিয়ে তেন্তে ইয়াৰ দ্বাৰা অন্তৱৰ্তীকালীন প্ৰশাসনৰ “কঠিন নীতি”ৰ পৰা আঁতৰি যোৱাৰ সংকেত দিয়া হ’ব আৰু বহুদলীয় গণতান্ত্ৰিক প্ৰতিযোগিতাৰ বাবে স্থান পুনৰ ঘূৰাই অনা হ’ব।
উল্লেখযোগ্য যে নব্বৈৰ দশকৰ আৰম্ভণিতে সংসদীয় গণতন্ত্ৰ পুনৰুদ্ধাৰৰ পিছৰে পৰা বাংলাদেশৰ দুটা প্ৰধান ৰাজনৈতিক শক্তি আৱামী লীগ আৰু বাংলাদেশ জাতীয়তাবাদী পাৰ্টি। গতিকে এটা ডাঙৰ ৰাজনৈতিক দল নিষিদ্ধ কৰাৰ সিদ্ধান্ত আইনী আৰু ৰাজনৈতিক দুয়োটা দিশতে অত্যন্ত গুৰুত্বপূৰ্ণ বুলি বিবেচিত হৈছে।
हिन्दुस्थान समाचार / মনোজ কুমাৰ শইকীয়া
