ডিউ, ০৭ জানুৱাৰী (হি.স.)। হিমাচল প্ৰদেশৰ গ’লৰক্ষক প্ৰবীণ কুমাৰীয়ে জীৱনৰ বেছিভাগ সময় দৃঢ়তাৰে থিয় হৈ কটায়—প্ৰথমে নিজৰ গাঁৱৰ সামাজিক বাধাৰ বিৰুদ্ধে আৰু এতিয়া ফুটবল খেলপথাৰৰ গ’লপোষ্টৰ মাজত। সীমিত সম্পদ, সামাজিক বিৰোধিতা, পাৰিবাৰিক দায়বদ্ধতাৰ মাজতো ২৬ বছৰীয়া প্ৰবীনে ফুটবলৰ সপোন জীয়াই ৰাখিলে আৰু আজি হিমাচল প্ৰদেশৰ উদীয়মান মহিলা ফুটবল জগতৰ এক গুৰুত্বপূৰ্ণ ব্যক্তিত্বত পৰিণত হৈছে।

খেলো ইণ্ডিয়া বিচ গেমছ ২০২৬ (কেআইবিজি ২০২৬)ত ডিউৰ ঘোঘলা বিচত অনুষ্ঠিত হোৱা মহিলাৰ বিচ ছকাৰ মেচৰ সময়ত প্ৰবীণৰ মনোভাৱ পুনৰবাৰ প্ৰদৰ্শিত হয়। প্ৰথম মহিলা বিচ ছকাৰ মেচত হিমাচল প্ৰদেশৰ দলটোৱে আয়োজক দল দাদৰা এণ্ড নগৰ হাভেলী আৰু দমন এণ্ড ডিউৰ বিৰুদ্ধে ৭-৫ গ’লত জয়লাভ কৰি উল্লেখযোগ্য প্ৰত্যাৱৰ্তন ঘটায়। এই মেচখনত ভৰিৰ গুৰুতৰ আঘাত পোৱাৰ পিছতো প্ৰবীনে অটল আছিল, কেইবাটাও গুৰুত্বপূৰ্ণ ছেভ কৰি নিজৰ দলটোক জয়ৰ পথত ৰাখিছিল।

মেচখনৰ তৃতীয় কোৱাৰ্টাৰৰ আৰম্ভণিতে প্ৰবীনে বাৰে বাৰে ঘৰুৱা দলৰ আক্ৰমণ বিফল কৰি বিপক্ষই সুবিধা লাভ কৰিবলৈ বাধা প্ৰদান কৰে। চমু আঘাতৰ পৰা উভতি অহাৰ লগে লগে বিচ ছকাৰত ৰোলিং চাবষ্টিটিউচন নিয়মৰ সুযোগ লৈ কেৱল গ’ল ৰোধ কৰাই নহয়, সতীৰ্থসকলকো উৎসাহিত কৰিছিল। ইয়াৰ পিছতে হিমাচলৰ দলটোৱে পলমকৈ গ’ল দি মেচখন জয়ী হয়।

হিমাচল প্ৰদেশৰ উনা জিলাৰ খাটগাঁও গাঁৱত জন্মগ্ৰহণ কৰা প্ৰবীণ কুমাৰী এজন দৈনিক মজুৰি শ্ৰমিকৰ কনিষ্ঠ সন্তান। তিনিজন ভাই-ভনীৰ ভিতৰত সৰু প্ৰবীণ এতিয়া পৰিয়ালৰ আৰ্থিক সুস্থতাৰ বাবেও দায়বদ্ধ। উনাৰ এখন ব্যক্তিগত বিদ্যালয়ত শাৰীৰিক শিক্ষাৰ শিক্ষয়িত্ৰী হিচাপে কাম কৰি পৰিয়ালটোক আৰ্থিকভাৱে পোহপাল দিয়াত আৰু এথলেটিক কেৰিয়াৰ অব্যাহত ৰখাত সহায় কৰে।

প্ৰবীণৰ এই ক্ৰীড়ালৈ পৰিৱৰ্তন সহজ নাছিল। তাই যেতিয়া ফুটবল খেলিবলৈ আৰম্ভ কৰিছিল তেতিয়া তাইৰ গাঁৱৰ ছোৱালীবোৰক খেলৰ পৰা আঁতৰাই ৰখা হৈছিল। এনে পৰিবেশত প্ৰবীনে ল’ৰাৰ লগত অনুশীলন কৰিবলৈ ধৰিলে। লাহে লাহে তাই আৰু কেইজনীমান ছোৱালী যোগ কৰি কোনো আনুষ্ঠানিক প্ৰশিক্ষণ বা সম্পদ নোহোৱাকৈ এটা সৰু দল গঢ়ি তুলিলে।

প্ৰবীনে কয়, ছোৱালী হোৱাটো সহজ নহয়। দহ বছৰ আগতে যেতিয়া মই আৰম্ভ কৰিছিলো তেতিয়া আমাৰ গাঁৱত কেৱল ল'ৰাকহে খেলিবলৈ দিয়া হৈছিল। আমি অনিয়মিতভাৱে খেলিবলৈ আৰম্ভ কৰিছিলো, কোনো প্ৰশিক্ষণ নোহোৱাকৈ, কিন্তু আমাৰ লক্ষ্য আছিল পৰৱৰ্তী প্ৰজন্মৰ ছোৱালীৰ পথ প্ৰশস্ত কৰা। আজি আমাৰ এটা সম্পূৰ্ণ দল আছে আৰু স্থানীয় প্ৰতিযোগিতাত খেলি আছো।

খেলো ইণ্ডিয়া বিচ গেমছ ২০২৬ত হিমাচল প্ৰদেশৰ দলটোৰ বাবে এইটোৱেই প্ৰথমটো ডাঙৰ বিচ ছকাৰ অভিজ্ঞতা। প্ৰতিযোগিতাৰ পূৰ্বে মাত্ৰ ১০ দিন বালিত অনুশীলন কৰিছিল দলটোৱে। ইয়াৰ পিছতো দলটোৱে প্ৰথম দুটা কোৱাৰ্টাৰত ৪-৪ গ’লত ড্ৰ’ বজাই ৰাখিছিল। আঘাতৰ মাজতো প্ৰবীণৰ প্ৰত্যাৱৰ্তন আৰু নেতৃত্বই দলটোক জয়ৰ দিশে আগুৱাই লৈ যায়।

প্ৰবীনে কয়, আঘাত অৱাঞ্ছিত সময়ত আহিছিল, কিন্তু ছোৱালীকেইজনীয়ে সঠিক সময়ত উভতি আহিছিল। এয়া মাত্ৰ আৰম্ভণিহে; এতিয়া আমি এই গতি বজাই ৰাখিব লাগিব।

প্ৰবীণ কুমাৰীৰ কাহিনী কেৱল এগৰাকী খেলুৱৈক লৈ নহয়, ক্ৰীড়াৰ সপোন দেখা দেশৰ দুৰ্গম অঞ্চলৰ হাজাৰ হাজাৰ ছোৱালীক অনুপ্ৰাণিত কৰা এক সংগ্ৰামৰ কাহিনী।

हिन्दुस्थान समाचार / Manoj Kumar Saikia