বেংগালুৰু, ০৬ জানুৱাৰী (হি.স.)। আজি কৰ্ণাটকৰ ৰাজনীতিৰ ইতিহাসত এক নতুন অধ্যায়। ৰাজ্যৰ সৰ্বাধিক দীৰ্ঘদিনীয়া কাৰ্যকালৰ মুখ্যমন্ত্ৰী দেৱৰাজ আৰাছুৰ অভিলেখ ভংগ কৰিছে সিদ্ধাৰমাইয়াই।
৬ জানুৱাৰী মুখ্যমন্ত্ৰী সিদ্ধাৰমাইয়াৰ বাবে এক ঐতিহাসিক দিন, কিয়নো তেওঁ ৰাজ্যৰ সৰ্বাধিক দীৰ্ঘদিনীয়া মুখ্যমন্ত্ৰীৰ অভিলেখ গঢ়িবলৈ সক্ষম হৈছে। সিদ্ধাৰমাইয়াই ৭ বছৰ ২৩৯ দিন কাৰ্যনিৰ্বাহ কৰিছে। ইয়াৰ লগে লগে তেওঁ দেৱৰাজ আৰাছুৰ ২৭৮৯ দিনৰ অভিলেখ ভংগ কৰে। ছিদ্ধাৰমাইয়াক এতিয়া ৰাজনৈতিক মহলত দখলে ৰমাইয়া নামেৰে জনাজাত।
২০১৩ চনত তেওঁ প্ৰথমে মুখ্যমন্ত্ৰী পদত অধিষ্ঠিত
ৰাজনৈতিক বুদ্ধিমত্তা আৰু জনসমৰ্থনৰ বলত কংগ্ৰেছ দলৰ এগৰাকী শক্তিশালী নেতা সিদ্ধাৰমৈয়াই নেতৃত্বৰ শিখৰত উপনীত হৈছে। ছিদ্ধাৰমাইয়াই প্ৰথমে ২০১৩ চনত মুখ্যমন্ত্ৰীৰ পদ গ্ৰহণ কৰি ২০১৩ চনৰ পৰা ২০১৮ চনলৈ পাঁচ বছৰীয়া কাৰ্যকাল সফলতাৰে সম্পূৰ্ণ কৰে। প্ৰথম কাৰ্যকালত সিদ্ধাৰমাইয়াই ১৮২৯ দিন মুখ্যমন্ত্ৰী হিচাপে কাৰ্যনিৰ্বাহ কৰিছিল। ২০২৩ চনৰ বিধানসভা নিৰ্বাচনত কংগ্ৰেছ পাৰ্টিৰ স্পষ্ট সংখ্যাগৰিষ্ঠতাৰে জয়লাভ কৰাৰ পিছত ২০২৩ চনৰ ২০ মে’ত দ্বিতীয়বাৰৰ বাবে মুখ্যমন্ত্ৰী হিচাপে শপত গ্ৰহণ কৰে সিদ্ধাৰমাইয়াই। আজি দ্বিতীয়টো কাৰ্যকালৰ জৰিয়তে তেওঁ দেৱৰাজ আৰাছুৰ সৰ্বাধিক দীৰ্ঘকালীন অভিলেখ ভংগ কৰি ৰাজ্যখনৰ সৰ্বাধিক দীৰ্ঘদিনীয়া কাৰ্যকালৰ মুখ্যমন্ত্ৰী হিচাপে পৰিগণিত হয়। ইফালে, ৰাজ্যৰ বাজেট দাখিল কৰাৰ ক্ষেত্ৰতো সিদ্ধাৰমাইয়াই এক নতুন অভিলেখ গঢ়িলে। তেওঁ এতিয়ালৈকে মুঠ ১৬খন বাজেট দাখিল কৰি কৰ্ণাটকৰ ইতিহাসত সৰ্বাধিক বাজেট দাখিল কৰা মুখ্য়মন্ত্ৰী হিচাপে পৰিগণিত হৈছে।
লোকদলৰ পৰা কংগ্ৰেছলৈ ৰাজনৈতিক যাত্ৰা
সিদ্ধাৰমাইয়াৰ ৰাজনৈতিক জীৱন আৰম্ভ হৈছিল লোকদলৰ পৰা। পৰৱৰ্তী সময়ত তেওঁ জনতা দলত যোগদান কৰি ৰাজ্যৰ ৰাজনীতিত এজন প্ৰভাৱশালী নেতা হিচাপে আত্মপ্ৰকাশ কৰে। ২০০৬ চনত জনতা দল ত্যাগ কৰি কংগ্ৰেছত যোগদান কৰে। সিদ্ধাৰমাইয়াই কংগ্ৰেছ দলক সংগঠিত কৰাৰ বাবে কঠোৰ পৰিশ্ৰম কৰিছিল আৰু এজন শক্তিশালী নেতা হিচাপে আত্মপ্ৰকাশ কৰিছিল।
দীৰ্ঘদিনীয়া মুখ্যমন্ত্ৰীৰ তালিকাত শীৰ্ষত আছে দেৱৰাজ উৰাছু (৭ বছৰ ২৩৯ দিন), তাৰ পিছতে আছে এছ নিজালিংগাপ্পা (৭ বছৰ ১৭৫ দিন), ৰামকৃষ্ণ হেগড়ে (৫ বছৰ ২১৬ দিন) আৰু বি. য়েডিউৰাপ্পা (৫ বছৰ ৮২ দিন)।
हिन्दुस्थान समाचार / মনোজ কুমাৰ শইকীয়া
