নতুন দিল্লী, ০৬ জানুৱাৰী (হি.স.)। উত্তৰাখণ্ডৰ ২০২২ চনৰ বিতৰ্কিত অংকিতা ভাণ্ডাৰী গোচৰত জড়িত হোৱাৰ পিছত ভাৰতীয় জনতা পাৰ্টিৰ নেতা দুষ্যন্ত গৌতমে কংগ্ৰেছ আৰু আম আদমি পাৰ্টিৰ (আআপা) বিৰুদ্ধে দুই কোটি টকা ক্ষতিপূৰণ বিচাৰি দিল্লী উচ্চ ন্যায়ালয়ত মানহানিৰ গোচৰ তৰিছে। মঙলবাৰে উচ্চ ন্যায়ালয়ে শুনানি গ্ৰহণ কৰিব দুষ্যন্ত গৌতমৰ মানহানিৰ গোচৰ।
দুষ্যন্ত গৌতমে তেওঁৰ আবেদনত উল্লেখ কৰিছে যে ২০২৫ চনৰ ২৪ ডিচেম্বৰত ছ’চিয়েল মিডিয়াত এটা মানহানিকাৰক ভিডিঅ’ আপলোড হৈছিল, আৰু ভাইৰেল হৈছিল। এই ভিডিঅ'টোৱে মিছাকৈয়ে তেওঁক ঘটনাৰ সৈতে জড়িত কৰি তেওঁক বদনাম কৰাৰ চেষ্টা কৰা এটা আখ্যান সৃষ্টি কৰিছিল। আৱেদনখনত উল্লেখ কৰা হৈছে যে গোচৰৰ তদন্তৰ সময়ত তদন্তকাৰী সংস্থাসমূহে কেতিয়াও তেওঁৰ নাম প্ৰকাশ কৰা নাছিল। দুষ্যন্ত গৌতমে তেওঁক অংকিতা ভাণ্ডাৰী গোচৰৰ সৈতে জড়িত কন্টেন্ট আঁতৰাবলৈ দাবী জনাইছে। লগতে ক্ষতিপূৰণৰ দাবী জনাইছে ২ কোটি টকা। আৱেদনখনত উল্লেখ কৰা হৈছে যে অংকিতা ভাণ্ডাৰী গোচৰত চলি থকা প্ৰচাৰ ভুৱা বাতৰিৰ শ্ৰেণীত পৰে আৰু ৰাজনৈতিক সুবিধা লাভৰ বাবে ব্যৱহাৰ কৰা হৈছে।
সঁচাকৈয়ে অংকিতা ভাণ্ডাৰী গোচৰৰ শেহতীয়া ভিডিঅ’ৰ সৈতে জড়িত হৈ উত্তৰাখণ্ড আৰক্ষীয়ে উৰ্মিলা সনাৱাৰ আৰু সুৰেশ ৰাথোৰৰ বিৰুদ্ধে মিছা অপপ্ৰচাৰ চলোৱাৰ অভিযোগ উত্থাপন কৰি কেইবাটাও এফআইআৰ দাখিল কৰিছে। ২০২২ চনৰ ছেপ্টেম্বৰ মাহত উত্তৰাখণ্ডৰ এখন ৰিজ’ৰ্টত ১৯ বছৰীয়া ৰিচেপচনিষ্ট অংকিতা ভাণ্ডাৰীক হত্যা কৰা হৈছিল। অভিযোগ অনুসৰি, ৰেষ্টুৰেণ্টৰ মালিক পুলকিত আৰ্য্যই ভাণ্ডাৰীক হেঁচা প্ৰয়োগ কৰি অতিথিৰ সৈতে যৌন সম্পৰ্ক স্থাপন কৰিছিল। পুলকিত আৰ্য্যৰ পিতৃ আছিল বিজেপিৰ প্ৰাক্তন নেতা। এটা খালৰ পৰা উদ্ধাৰ হৈছে অংকিতা ভাণ্ডাৰীৰ মৃতদেহ। এই গোচৰত বিচাৰ আদালতে পুলকিত আৰিয়া আৰু আন দুগৰাকীক যাৱজ্জীৱন কাৰাদণ্ডৰ শাস্তি প্ৰদান কৰে।
শেহতীয়াকৈ বিতৰ্কৰ সৃষ্টি হয় বিজেপিৰ প্ৰাক্তন বিধায়ক সুৰেশ ৰাথোৰৰ পত্নী উৰ্মিলা সনাৱৰে অংকিতা ভাণ্ডাৰীক বিজেপিৰ এগৰাকী জ্যেষ্ঠ নেতাৰ সৈতে যৌন সম্পৰ্ক স্থাপনৰ বাবে হেঁচা প্ৰয়োগ কৰা বুলি অভিযোগ উত্থাপন কৰে। সনাৱাৰৰ ভিডিঅ’ ক্লিপত উল্লেখ আছে যে সুৰেশ ৰাথোৰে শুনিছিল যে বিজেপিৰ জ্যেষ্ঠ নেতাজন দুষ্যন্ত গৌতম। পিছত ৰাথোৰে কয় যে এই ভিডিঅ’ ক্লিপটো এআই ব্যৱহাৰ কৰি তৈয়াৰ কৰি বিজেপিক বদনাম কৰিবলৈ মুকলি কৰা হৈছে।
हिन्दुस्थान समाचार / মনোজ কুমাৰ শইকীয়া
