ঢাকা, ০৪ জানুৱাৰী (হি.স.)। বাংলাদেশে অহা মাহৰ আই চি চি পুৰুষৰ টি-২০ বিশ্বকাপৰ খেলসমূহ ভাৰতৰ বাহিৰলৈ স্থানান্তৰিত কৰিবলৈ দাবী জনোৱাৰ সিদ্ধান্ত লৈছে। ইণ্ডিয়ান প্ৰিমিয়াৰ লীগ (আই পি এল)ৰ পৰা বেগী বলাৰ মুস্তাফিজুৰ ৰহমানক বাদ দিয়াৰ পিছতে এই সিদ্ধান্ত লোৱা হৈছে। বাংলাদেশে বিচাৰে বিশ্বকাপৰ তেওঁলোকৰ সকলো খেল শ্ৰীলংকাত অনুষ্ঠিত হওক।

বাংলাদেশৰ অন্তৱৰ্তীকালীন চৰকাৰৰ যুৱ আৰু ক্ৰীড়া উপদেষ্টা আছিফ নাজৰুলৰ উদ্ধৃতি দি দেওবাৰে চৰকাৰী সংবাদ সংস্থা বি এছ এছৰ উদ্ধৃতি দি কয় যে, বাংলাদেশৰ ক্ৰিকেট, ক্ৰিকেটাৰ আৰু দেশৰ প্ৰতি কোনো ধৰণৰ অসন্মান আমি সহ্য নকৰো। দাসত্বৰ দিন শেষ হ'ল।

শনিবাৰে কলকাতা নাইট ৰাইডাৰ্ছে মুস্তাফিজুৰ ৰহমানক নিজৰ দলৰ পৰা মুকলি কৰি দিয়ে। ভাৰত আৰু বাংলাদেশৰ মাজত বৰ্ধিত উত্তেজনাৰ পৰিপ্ৰেক্ষিতত ভাৰতীয় ক্ৰিকেট নিয়ন্ত্ৰণ ব’ৰ্ড (বিচিচিআই)ৰ পৰামৰ্শৰ পিছতে এই সিদ্ধান্ত লোৱা বুলি খবৰ ওলাইছিল।

আছিফ নাজৰুলে উল্লেখ কৰে যে তেওঁ বাংলাদেশ ক্ৰিকেট ব’ৰ্ডক আন্তঃৰাষ্ট্ৰীয় ক্ৰিকেট পৰিষদলৈ পত্ৰ লিখিবলৈ নিৰ্দেশ দিছে। তেওঁ কয় যে যেতিয়া কোনো বাংলাদেশী খেলুৱৈক চুক্তিবদ্ধ হোৱাৰ পিছতো ভাৰতত খেলিবলৈ দিয়া নহয়, তেতিয়া সমগ্ৰ বাংলাদেশ দলে ভাৰতত বিশ্বকাপ খেলি নিৰাপদ অনুভৱ কৰিব নোৱাৰে।

বাংলাদেশৰ টি-২০ বিশ্বকাপৰ সকলো খেল শ্ৰীলংকালৈ স্থানান্তৰিত কৰিবলৈ আইচিচিক আনুষ্ঠানিকভাৱে অনুৰোধ জনোৱাৰ বাবেও নাজৰুলে নিৰ্দেশ দিয়ে।

ভাৰত আৰু শ্ৰীলংকাই যৌথভাৱে আয়োজন কৰা টি-২০ বিশ্বকাপ অহা ৭ ফেব্ৰুৱাৰীৰ পৰা আৰম্ভ হোৱাৰ কথা। বৰ্তমান ভাৰতত বাংলাদেশৰ গ্ৰুপ চাৰিখন খেলৰ কথা। ইয়াৰ পূৰ্বে এক চুক্তিৰ অধীনত পাকিস্তানে শ্ৰীলংকাত নিজৰ সকলো খেল খেলিব, যাৰ ফলত ভাৰত আৰু পাকিস্তানে বহুজাতিক প্ৰতিযোগিতাত নিৰপেক্ষ স্থানত খেলিব পাৰিব।

মন কৰিবলগীয়া যে ২০২৪ চনত ঢাকাত সংঘটিত হোৱা গণ বিদ্ৰোহৰ পিছত তেতিয়াৰ প্ৰধানমন্ত্ৰী শ্বেখ হাছিনাৰ চৰকাৰৰ পতনৰ পাছৰে পৰা ভাৰত-বাংলাদেশৰ ৰাজনৈতিক সম্পৰ্ক তিক্ত হৈ পৰিছে। শেহতীয়াকৈ ভাৰতৰ বৈদেশিক পৰিক্ৰমা মন্ত্ৰালয়ে বাংলাদেশত সংখ্যালঘুৰ বিৰুদ্ধে চলি থকা “শত্ৰুতা অব্যাহত থকা”ক গৰিহণা দিয়াৰ বিপৰীতে বাংলাদেশৰ অন্তৱৰ্তীকালীন নেতা তথা শান্তি নোবেল বঁটা বিজয়ী মহম্মদ ইউনুছে ভাৰতে হিংসাৰ পৰিসৰক অতিৰঞ্জিত কৰাৰ অভিযোগ উত্থাপন কৰিছে।

বিচিবিৰ সভাপতি আমিনুল ইছলাম বুলবুলে কয় যে এই বিষয়ত ব’ৰ্ডে জৰুৰী বৈঠক অনুষ্ঠিত কৰিব। তেওঁ কয়, আমাৰ ক্ৰিকেটাৰসকলৰ মৰ্যাদা আৰু সুৰক্ষা আমাৰ সৰ্বোচ্চ অগ্ৰাধিকাৰ। এই বিবেচনাসমূহ মনত ৰাখি উপযুক্ত সময়ত সিদ্ধান্ত লোৱা হ'ব।

ডিচেম্বৰ মাহত অনুষ্ঠিত হোৱা আই পি এলৰ নিলামত কলকাতা নাইট ৰাইডাৰ্ছে ১০ লাখ ডলাৰৰ ওপৰত ক্ৰয় কৰিছিল মুস্তাফিজুৰ ৰহমানক। ইয়াৰ পূৰ্বে তেওঁ আই পি এলৰ বিভিন্ন দলৰ হৈ খেলিছিল।

অৱশ্যে বিচিচিআইৰ সম্পাদক দেৱজিৎ শইকীয়াই কয় যে কলকাতাক “শেহতীয়া পৰিস্থিতিৰ প্ৰতি লক্ষ্য ৰাখি” ৩০ বছৰীয়া বলাৰগৰাকীক মুকলি কৰি দিবলৈ পৰামৰ্শ দিয়া হৈছিল।

নজৰুলে কয় যে বাংলাদেশত আই পি এল সম্প্ৰচাৰত নিষেধাজ্ঞা আৰোপ কৰিবলৈ অনুৰোধ জনাব। তেওঁ কয়, ‘বাংলাদেশত অনুষ্ঠিত হ’বলগীয়া আই পি এল প্ৰতিযোগিতাখনৰ সম্প্ৰচাৰ বন্ধ কৰিবলৈ তথ্য আৰু সম্প্ৰচাৰ উপদেষ্টাক অনুৰোধ জনাইছো।

বলীউডৰ অভিনেতা শ্বাহৰুখ খানৰ মালিকানাধীন দল কলকাতা নাইট ৰাইডাৰ্ছে এক বিবৃতি প্ৰকাশ কৰি কয় যে মুস্তাফিজুৰক “যথাযথ প্ৰক্ৰিয়া আৰু পৰামৰ্শৰ অন্তত” মুকলি কৰি দিয়া হৈছে।

हिन्दुस्थान समाचार / মনোজ কুমাৰ শইকীয়া