শ্ৰীনগৰ, ১৯ জানুৱাৰী (হি.স.)। কাশ্মীৰৰ শীতল ঢৌৰ পৰিস্থিতিৰ পৰা কিছু ৰেহাই পোৱা গৈছে, কিয়নো উপত্যকাৰ নূন্যতম তাপমাত্ৰা কেইডিগ্ৰীমান বৃদ্ধি পাইছে। দেওবাৰে নিশা শ্ৰীনগৰৰ সৰ্বনিম্ন তাপমাত্ৰা শূণ্যতকৈ ১.২ ডিগ্ৰী চেলছিয়াছ তলত ৰেকৰ্ড কৰা হয়, যিটো পূৰ্বৰ নিশা শূণ্যতকৈ ৪.৭ ডিগ্ৰী চেলছিয়াছ তলত আছিল।
মধ্য কাশ্মীৰৰ গণ্ডাৰবাল জিলাৰ পৰ্যটনস্থলী সোণমাৰ্গত নূন্যতম তাপমাত্ৰা শূণ্যতকৈ ৮.৩ ডিগ্ৰী চেলছিয়াছ তলত হোৱাত উপত্যকাৰ আটাইতকৈ ঠাণ্ডা স্থান হিচাপে পৰিগণিত হৈছে। দক্ষিণ কাশ্মীৰৰ শ্বোপিয়ান আৰু পুলৱামা চহৰত সৰ্বনিম্ন তাপমাত্ৰা ক্ৰমে শূণ্যতকৈ ৪.৭ ডিগ্ৰী চেলছিয়াছ আৰু শূণ্যতকৈ ৫.১ ডিগ্ৰী চেলছিয়াছ তলত ৰেকৰ্ড কৰা হৈছে। বাৰ্ষিক অমৰনাথ যাত্ৰাৰ অন্যতম ভিত্তি শিবিৰ হিচাপেও কাম কৰা দক্ষিণ কাশ্মীৰৰ পৰ্যটনস্থলী পাহলগামত নূন্যতম উষ্ণতা শূণ্যতকৈ ১.৮ ডিগ্ৰী চেলছিয়াছ তলত ৰেকৰ্ড কৰা হৈছে।
বতৰ বিজ্ঞান বিভাগৰ তথ্য অনুসৰি উত্তৰ কাশ্মীৰৰ বাৰামুল্লা জিলাৰ জনপ্ৰিয় স্কি ৰিজ’ৰ্ট গুলমাৰ্গত নিশাৰ তাপমাত্ৰা শূণ্যতকৈ ৩.৫ ডিগ্ৰী চেলছিয়াছ তলত ৰেকৰ্ড কৰা হৈছে। উপত্যকাৰ প্ৰৱেশদ্বাৰ চহৰ কাজিগুণ্ডৰ সৰ্বনিম্ন তাপমাত্ৰা শূণ্যতকৈ ২.৪ ডিগ্ৰী চেলছিয়াছ কম ৰেকৰ্ড কৰা হৈছে। কোকেৰনাগত সৰ্বনিম্ন তাপমাত্ৰা শূণ্যতকৈ ০.৪ ডিগ্ৰী চেলছিয়াছ তলত আৰু কুপৱাৰাত সৰ্বনিম্ন তাপমাত্ৰা শূণ্যতকৈ ১.৬ ডিগ্ৰী চেলছিয়াছ তলত ৰেকৰ্ড কৰা হয়।
বৰ্তমান কাশ্মীৰ উপত্যকা চিল্লা-ই-কালান নামৰ ৪০ দিনীয়া অতি ঠাণ্ডাৰ সময়ছোৱাৰ মাজত আছে, য'ত নিশাৰ উষ্ণতা প্ৰায়ে হিমশীতলতকৈ কেইবা ডিগ্ৰী তললৈ নামি যায় আৰু বৰফ পৰাৰ সম্ভাৱনা বেছি। যোৱা বছৰৰ ২১ ডিচেম্বৰৰ পৰা আৰম্ভ হোৱা চিল্লা-ই-কালান ৩০ জানুৱাৰীত শেষ হ'ব।
हिन्दुस्थान समाचार / অৰৱিন্দ
