ইম্ফল, ১৯ জানুৱাৰী (হি.স.)। মণিপুৰ আৰক্ষীয়ে নিৰাপত্তাৰক্ষীৰ লগতে ৰাজ্যৰ বিভিন্ন প্ৰান্তত বিগত ২৪ ঘন্টাত কেইবাটাও সফল অভিযান চলাইছে। এই অভিযানৰ সময়ত উগ্ৰপন্থী সংগঠনৰ সক্ৰিয় কেডাৰ, এজন ধনদাবী আৰু চুৰি বাহন আৰু বৃহৎ পৰিমাণৰ ড্ৰাগছ গ্ৰেপ্তাৰ কৰা হয়।
ইম্ফল পূব জিলাৰ লামলাই থানা এলেকাৰ অন্তৰ্গত যোৰাবুং খুনৌ ৱাৰ্ড-৪ত থকা ইউনাইটেড নেচনেল লিবাৰেশ্যন ফ্ৰণ্টৰ কেডাৰ আৰু ধনদাবীত জড়িত ব্যক্তি নিংথৌজাম ছানাথোই সিং (২৬)ক গ্ৰেপ্তাৰ কৰে নিৰাপত্তা বাহিনীয়ে। তেওঁৰ পৰা এটা মোবাইল ফোনো জব্দ কৰা হৈছে।
ইফালে মণিপুৰ আৰক্ষীয়ে টেঙনৌপাল জিলাৰ মাচি থানা এলেকাৰ অন্তৰ্গত টুইচেন গাঁৱৰ পৰা দুখন চুৰি বাহন উদ্ধাৰ কৰে। ইয়াৰ ভিতৰত আছে ৰয়েল এনফিল্ড ইন্টাৰচেপ্টৰ ৬৫০ (MN01AR-8324) আৰু ৰেজিষ্ট্ৰেচন নম্বৰ নথকা হোণ্ডা এক্টিভা স্কুটাৰ। আৰক্ষীৰ মতে, দুয়োখন বাহন তাত অজ্ঞাত ব্যক্তিয়ে ৰখাই থৈছিল। বিষয়টোৰ তদন্ত অব্যাহত আছে।
থৌবাল জিলাত আন এক অভিযানত নিৰাপত্তা বাহিনীয়ে সাংগ্যউম্ফুম নুংপৌ মাঠাক লেইকাই নিবাসী মহম্মদ ৰিয়াছ খান (৩১) নামৰ এজন লোকক ঘৰৰ পৰা গ্ৰেপ্তাৰ কৰে। তেওঁৰ হাতত ডেলষ্টাল আৰু বেৰিকোফ কাহৰ চিৰাপৰ কেইবাটাও বটল, নাইট্ৰাজেপাম টেবলেট, এটা মোবাইল ফোন, আৰু কিছু নথি-পত্ৰ উদ্ধাৰ কৰা হৈছে।
ইম্ফল ইষ্ট জিলাত এক সুকীয়া অভিযানত ইৰিলবুং থানা এলেকাৰ কেইৰাও ৱাংখেম মানিং লেইকাইৰ পৰা কেচিপি (নয়ন) সংগঠনৰ কেডাৰ পুথেম ইটন মেইটেই ওৰফে টম্বা (৩৩)ক গ্ৰেপ্তাৰ কৰে। তেওঁৰ পৰা এটা মোবাইল ফোনো জব্দ কৰা হৈছে।
ইফালে ইম্ফল পশ্চিম জিলাৰ মায়ং ইম্ফল থানাৰ অধীনস্থ বেংগুন লৌকক মায়াই লেইকাইৰ পৰা খুলকপাম আয়াজুদ্দিন (৪১) নামৰ এজন লোকক গ্ৰেপ্তাৰ কৰা হয়। তেওঁৰ হাতত মুঠ ২৮৩.২ গ্ৰাম ওজনৰ ৬টা চাবোন আকৃতিৰ হেৰ’ইনৰ পেকেট উদ্ধাৰ কৰা হয়।
আৰক্ষী বিষয়াসকলে জনোৱা মতে, ৰাজ্যখনত আইন-শৃংখলা বজাই ৰখাৰ বাবে নিৰাপত্তা বাহিনীয়ে অভিযান অব্যাহত ৰাখিব আৰু সকলো গোচৰতে অধিক তদন্ত চলি আছে।
हिन्दुस्थान समाचार / মনোজ কুমাৰ শইকীয়া