তেহৰাণ (ইৰাণ), ১৯ জানুৱাৰী (হি.স.)। ইৰাণ ইছলামিক ৰিপাব্লিকত যোৱা মাহৰ শেষ সপ্তাহৰ তিনিদিন পিছত আৰম্ভ হোৱা মুদ্ৰাস্ফীতিৰ বিৰুদ্ধে প্ৰতিবাদ এতিয়াও বন্ধ হোৱা নাই। প্ৰতিবাদকাৰীয়ে প্ৰত্যক্ষভাৱে লক্ষ্য কৰি লৈছে সৰ্বোচ্চ নেতা আলী খামেনীক। ইৰাণৰ অভিযোগ যে আমেৰিকাই প্ৰতিবাদকাৰীক উচটনি দিছে। ইছলামিক ৰিপাব্লিকে বন্ধ কৰি দিছে দেশত ইণ্টাৰনেট সেৱা। ইৰাণে ৰাজ্যিক টেলিভিছন চেনেলৰ জৰিয়তে বিশ্বৰ আগত নিজৰ মতামত দাঙি ধৰিছিল। ইফালে, এটা বেনামী হেকাৰ গোটে ইৰাণৰ চৰকাৰী চেটেলাইট টিভি চেনেল হেক কৰিছে।

ইৰাণ ইণ্টাৰনেশ্যনেলৰ এক প্ৰতিবেদন অনুসৰি দেওবাৰে বদৰ উপগ্ৰহত সম্প্ৰচাৰিত ইৰাণৰ কেইবাটাও চৰকাৰী টেলিভিছন চেনেল হেক কৰা হয়। ইৰাণৰ নিৰ্বাসিত ৰাজকুমাৰ ৰেজা পাহলৱীয়ে প্ৰতিবাদত যোগদান কৰিবলৈ আৰু প্ৰতিবাদকাৰীক সমৰ্থন কৰিবলৈ সশস্ত্ৰ বাহিনীক কৰা আবেদনৰ লগতে প্ৰতিবাদৰ ফুটেজ সম্প্ৰচাৰ কৰা হয়। উল্লেখযোগ্য যে ইৰাণৰ ৰাজ্যিক সম্প্ৰচাৰক সংস্থাটোৱে নিজৰ বিভিন্ন প্ৰাদেশিক টেলিভিছন চেনেল দেশজুৰি সম্প্ৰচাৰৰ বাবে বদৰ উপগ্ৰহৰ ওপৰত নিৰ্ভৰ কৰে।

খবৰ অনুসৰি খামেনেইৰ কাৰ্যালয়ৰ এজন বিষয়া মেহদি ফাজেলীয়ে দেওবাৰে এক্স-প’ষ্টত ইৰাণত নতুন নেতৃত্বৰ আহ্বান জনাই আমেৰিকাৰ ৰাষ্ট্ৰপতি ড’নাল্ড ট্ৰাম্পৰ মন্তব্যক খাৰিজ কৰে। ফাজেলীয়ে তেওঁলোকক এজন দোষী ব্যক্তিৰ হতাশজনক প্ৰচেষ্টা বুলি অভিহিত কৰিছে। শনিবাৰে আমেৰিকাৰ নিউজ পৰ্টেল পলিটিকোৱে ট্ৰাম্পৰ উদ্ধৃতি দি কয় যে, “এতিয়া ইৰাণত নতুন নেতৃত্ব বিচৰাৰ সময়।”

ইৰাণ ইণ্টাৰনেশ্যনেলৰ এক প্ৰতিবেদন অনুসৰি ইৰাণৰ কাৰাগাৰত প্ৰতিবাদকাৰীৰ সৈতে দুৰ্ব্যৱহাৰ কৰা হৈছে। ঠাণ্ডাত উলংগ কৰি ৰাখি অজ্ঞাত দ্ৰব্যৰ বেজী দিয়া হৈছে। এজন বন্দীৰ মতে, কাৰাগাৰৰ বিষয়াসকলে ডিটেনচন চেণ্টাৰৰ চোতালত বন্দীসকলক কাপোৰ খুলি শীতকালত দীৰ্ঘ সময়ৰ বাবে অট্টালিকাৰ বাহিৰত ৰাখিছিল। ইয়াৰ পিছত কাৰাগাৰৰ বিষয়াসকলে পাইপৰ পৰা তেওঁলোকৰ ওপৰত ঠাণ্ডা পানী ঢালি দিয়ে। আন এজন বন্দীয়েও জনাইছে যে পিছদিনা কাৰাগাৰৰ বিষয়াসকলে তেওঁক আৰু আন কেইবাজনো কয়দীক অজ্ঞাত পদাৰ্থৰ বেজী দিছিল।

খবৰ অনুসৰি দেওবাৰে ছিংগাপুৰ জলদ্বীপৰ মাজেৰে পাৰ হৈ যায় আমেৰিকাৰ বিমানবাহী জাহাজ ইউ এছ এছ আব্ৰাহাম লিংকন। ৱাশ্বিংটন আৰু তেহৰাণৰ মাজত উত্তেজনাৰ মাজতে দক্ষিণ চীন সাগৰৰ পৰা মধ্যপ্ৰাচ্যলৈ প্ৰেৰণ কৰা হৈছে। ইফালে, দেওবাৰে নিউজিলেণ্ড, অষ্ট্ৰেলিয়া, জাপানত ইৰাণীসকলৰ সমৰ্থনত ৰেলী অনুষ্ঠিত হয়। গোটেই সপ্তাহটো জাৰ্মানী, ফ্ৰান্স, ব্ৰিটেইন, কানাডাৰ চহৰসমূহত প্ৰব্ৰজনকাৰীৰ প্ৰতিবাদ অব্যাহত আছিল।

हिन्दुस्थान समाचार / অৰৱিন্দ