নতুন দিল্লী, ১৯ জানুৱাৰী (হি.স.)। ভাৰত আৰু ইউ এ ইয়ে অতি শীঘ্ৰে কৌশলগত প্ৰতিৰক্ষা অংশীদাৰিত্বত প্ৰৱেশ কৰিব। আজি এখন অভিপ্ৰায় পত্ৰত স্বাক্ষৰ কৰা হয়। ইউ এ ইৰ ৰাষ্ট্ৰপতিৰ আনুষ্ঠানিক ভ্ৰমণৰ সময়ত দুয়োখন দেশৰ মাজত মহাকাশ, শক্তি, বাণিজ্য, আৰু এআইৰ ওপৰত মুঠ চুক্তি স্বাক্ষৰিত হয়। দুয়োখন দেশৰ লক্ষ্য ২০৩২ চনৰ ভিতৰত দ্বিপাক্ষিক বাণিজ্য দুগুণ কৰি ২০০ বিলিয়ন মাৰ্কিন ডলাৰলৈ বৃদ্ধি কৰা।
সংযুক্ত আৰব আমিৰশ্বাহীৰ ৰাষ্ট্ৰপতি শ্বেখ মহম্মদ বিন জায়েদ আল নাহিয়ানে সোমবাৰে চমু চৰকাৰী ভ্ৰমণসূচীৰে ভাৰতত উপস্থিত হয়। প্ৰধানমন্ত্ৰী নৰেন্দ্ৰ মোদীয়ে ব্যক্তিগতভাৱে তেওঁক বিমানবন্দৰত আদৰণি জনায়। বিমানবন্দৰৰ পৰা দুয়োগৰাকী নেতাই প্ৰধানমন্ত্ৰীৰ বাসগৃহ লোক কল্যাণ মাৰ্গলৈ আগবাঢ়ি যায় আৰু তাতেই আলোচনাত মিলিত হয়। এই আলোচনাৰ সময়ত কেইবাটাও গুৰুত্বপূৰ্ণ চুক্তিত উপনীত হয়।
মুঠ ১২ পইণ্টৰ ওপৰত দুয়োখন দেশৰ মাজত স্পষ্ট সহমতত উপনীত হয়। ইয়াৰ ভিতৰত কৌশলগত প্ৰতিৰক্ষা সহযোগিতা, মহাকাশ উদ্যোগৰ উন্নয়ন আৰু বাণিজ্যিক সহযোগিতাৰ ওপৰত এখন উদ্দেশ্য পত্ৰত স্বাক্ষৰ কৰা, গুজৰাটৰ ঢোলেৰাত বিশেষ বিনিয়োগ মণ্ডলৰ উন্নয়ন। ২০৩২ চনৰ ভিতৰত দুয়োখন দেশে দ্বিপাক্ষিক বাণিজ্য ২০০ বিলিয়ন মাৰ্কিন ডলাৰলৈ বৃদ্ধি কৰাৰ লক্ষ্য নিৰ্ধাৰণ কৰিছে।
ইয়াৰ উপৰিও হিন্দুস্তান পেট্ৰলিয়াম কৰ্পৰেশ্যন লিমিটেড (এইচ পি চি এল) আৰু আবুধাবি নেচনেল অইল কোম্পানী গেছৰ মাজত বিক্ৰী আৰু ক্ৰয় চুক্তি স্বাক্ষৰিত হয়। খাদ্য সুৰক্ষা আৰু কাৰিকৰী প্ৰয়োজনীয়তা সন্দৰ্ভত এক বুজাবুজিৰ চুক্তি স্বাক্ষৰিত হয়। ভাৰতত এটা ছুপাৰ কম্পিউটিং ক্লাষ্টাৰ স্থাপন কৰা হ’ব। ভাৰত আৰু ইউ এ ইৰ মাজত দ্বিপাক্ষিক নাগৰিক পাৰমাণৱিক সহযোগিতাক প্ৰসাৰিত কৰা হ’ব। ইউ এ ইৰ কোম্পানীসমূহে—ফাৰ্ষ্ট আবুধাবি বেংক আৰু ডি পি ৱৰ্ল্ডে—গুজৰাটৰ গিফ্ট চিটিত কাৰ্যালয় আৰু পৰিচালনা স্থাপন কৰিব।
ডিজিটেল/ডাটা দূতাবাস স্থাপনৰ সম্ভাৱনাৰ বিষয়ে অধ্যয়ন কৰা হ’ব। আবুধাবিত স্থাপন কৰা হ’ব ‘হাউছ অৱ ইণ্ডিয়া’। এইটো হ’ব ভাৰতীয় শিল্প, ঐতিহ্য, আৰু প্ৰত্নতত্ত্বৰ সংগ্ৰহালয় থকা সাংস্কৃতিক কেন্দ্ৰ। যুৱ আদান-প্ৰদানৰ ক্ষেত্ৰতো দুয়োখন দেশে প্ৰসাৰিত কৰিব।
বৈদেশিক সচিব বিক্ৰম মিছৰীয়ে সংযুক্ত আৰব আমিৰশ্বাহীৰ ৰাষ্ট্ৰপতি শ্বেখ মহম্মদ বিন জায়েদ আল নাহিয়ানৰ ভাৰত ভ্ৰমণক অত্যন্ত গুৰুত্বপূৰ্ণ আৰু অৰ্থপূৰ্ণ বুলি অভিহিত কৰে। তেওঁ কয় যে এই ভ্ৰমণৰ সময়সীমা কম হ’লেও বিষয়বস্তুৰ ফালৰ পৰা ই অত্যন্ত গুৰুত্বপূৰ্ণ। ৰাষ্ট্ৰপতি শ্বেখ মহম্মদ বিন জায়েদ আল নাহিয়ানৰ সৈতে যোৱা প্ৰতিনিধি দলটোৰ গঠনে এই ভ্ৰমণৰ তাৎপৰ্য্য প্ৰতিফলিত কৰে।
তেওঁ কয় যে ভাৰত আৰু ইউ এ ইৰ মাজত কৌশলগত প্ৰতিৰক্ষা অংশীদাৰিত্বৰ কাঠামোগত চুক্তিৰ দিশত আগবাঢ়ি যাবলৈ লেটাৰ অৱ ইনটেণ্ট (এল অ’ আই) স্বাক্ষৰ কৰা হৈছে। ইয়াৰ উপৰিও মহাকাশ খণ্ডত সহযোগিতা শক্তিশালী কৰিবলৈ ভাৰতীয় ৰাষ্ট্ৰীয় মহাকাশ প্ৰচাৰ আৰু অনুমোদন কেন্দ্ৰ আৰু ইউ এ ই মহাকাশ সংস্থাৰ মাজত মহাকাশ আন্তঃগাঁথনি উন্নয়ন আৰু বাণিজ্যিকীকৰণৰ সৈতে জড়িত এক যৌথ পদক্ষেপৰ বাবে আন এখন উদ্দেশ্য পত্ৰ (এল অ’ আই) স্বাক্ষৰ কৰা হয়।
বৈদেশিক সচিবগৰাকীয়ে কয় যে প্ৰতিনিধি দলটোত আবুধাবি বিনিয়োগ কৰ্তৃপক্ষৰ পৰিচালন সঞ্চালক শ্বেইখ হামাদ বিন জায়েদ, ইউ এ ইৰ উপ প্ৰধানমন্ত্ৰী তথা বৈদেশিক মন্ত্ৰী শ্বেখ আব্দুল্লা বিন জায়েদ আৰু ডুবাইৰ ক্ৰাউন প্ৰিন্স আৰু প্ৰতিৰক্ষা মন্ত্ৰী শ্বেইখ হামদান বিন মহম্মদৰ লগতে কেইবাজনো জ্যেষ্ঠ মন্ত্ৰী আৰু বিষয়াও আছে।
বৈদেশিক সচিবগৰাকীয়ে কয় যে দুয়োখন দেশে উন্নত পাৰমাণৱিক প্ৰযুক্তিৰ অংশীদাৰিত্বৰ সম্ভাৱনা অন্বেষণ কৰাৰ সিদ্ধান্ত লৈছে। ইয়াৰ ভিতৰত বৃহৎ পাৰমাণৱিক ৰিয়েক্টৰ আৰু সৰু মডিউলাৰ ৰিয়েক্টৰৰ বিকাশ আৰু নিয়োগ, উন্নত ৰিয়েক্টৰ ব্যৱস্থা, পাৰমাণৱিক উদ্যোগৰ পৰিচালনা, ৰক্ষণাবেক্ষণ আৰু পাৰমাণৱিক সুৰক্ষা আদিৰ ক্ষেত্ৰত সহযোগিতা অন্তৰ্ভুক্ত। কৃত্ৰিম বুদ্ধিমত্তাক সহযোগিতাৰ এটা মূল ক্ষেত্ৰ হিচাপে চিনাক্ত কৰা হৈছে, যাৰ অধীনত ইউ এ ইৰ অংশীদাৰিত্বৰে ভাৰতত এটা ছুপাৰ কম্পিউটিং ক্লাষ্টাৰ স্থাপনৰ বাবে চুক্তি কৰা হৈছে। তদুপৰি ডাটা চেণ্টাৰৰ ক্ষমতা বৃদ্ধিৰ ক্ষেত্ৰত ইউ এ ইৰ বিনিয়োগৰ সম্ভাৱনাও অন্বেষণ কৰা হ’ব।
শক্তি খণ্ডত ইউ এ ইৰ ভূমিকাক আৰু অধিক সৱল কৰি তেওঁ জনায় যে বছৰি ০৫ লাখ মেট্ৰিক টন এল এন জি যোগান ধৰাৰ বাবে দীৰ্ঘম্যাদী চুক্তিত উপনীত হৈছে, যাৰ ফলত ইউ এ ই ভাৰতৰ দ্বিতীয় বৃহত্তম এল এন জি যোগানকাৰী হিচাপে পৰিগণিত হৈছে। খাদ্য সুৰক্ষা সম্পৰ্কীয় বুজাবুজি চুক্তিয়ে দুয়োখন দেশৰ বাণিজ্য, কৃষি ৰপ্তানি আৰু খাদ্য সুৰক্ষা শক্তিশালী কৰিব।
हिन्दुस्थान समाचार / অৰৱিন্দ
