কোকৰাঝাৰ, ১৮ জানুৱাৰী (হি.স.)। আজি কোকৰাঝাৰ ৰে’লৱে ষ্টেচনত অমৃত ভাৰত স্লীপাৰ এক্সপ্ৰেছক কোকৰাঝাৰৰ ৰাইজে উষ্ম আদৰণি জনায়। কামাখ্যা আৰু ৰোহতাকৰ মাজত চলাচল কৰিবলগীয়া এই নতুন ৰে’লখনৰ আদৰণি অনুষ্ঠানত লোকসভাৰ সাংসদ জয়ন্ত বসুমতাৰী, ৰাজ্যসভাৰ সাংসদ ৰংগৰা নাৰ্জাৰী, বিধায়ক লৰেন্স ইছলাৰী আৰু আলিপুৰদুৱাৰ ৰে’লৱে ডিভিজনৰ এডিআৰএম এ. কামা উপস্থিত আছিল।

মাধ্যমৰ আগত বক্তব্য ৰাখি কোকৰাঝাৰৰ ৰাইজ আৰু সাংসদসকলে কোকৰাঝাৰ ৰে’লৱে ষ্টেচনত ৰে’লখনৰ ষ্টপেজসহ অমৃত ভাৰত স্লীপাৰ এক্সপ্ৰেছৰ সেৱা আৰম্ভ কৰাৰ বাবে প্ৰধানমন্ত্ৰী নৰেন্দ্ৰ মোডীক কৃতজ্ঞতা জ্ঞাপন কৰে। লোকসভাৰ সাংসদ জয়ন্ত বসুমতাৰীয়ে কোকৰাঝাৰ ৰে’লৱে ষ্টেচনত অধিক এক্সপ্ৰেছ ৰে’লৰ ষ্টপেজৰ দাবী উত্থাপন কৰে। তেওঁ কয় যে কোকৰাঝাৰ বডোলেণ্ড টেৰিটোৰিয়েল কাউন্সিলৰ ৰাজধানী আৰু ইয়াত বহু গুৰুত্বপূৰ্ণ প্ৰতিষ্ঠান আৰু চিকিৎসালয় আছে। এই কাৰণে বিভিন্ন অঞ্চলৰ বহু লোক নিয়মিতভাৱে কোকৰাঝাৰলৈ যাতায়াত কৰে।

সাধাৰণ ৰাইজৰ কল্যাণ আৰু সুবিধাৰ প্ৰতি লক্ষ্য ৰাখি ভৱিষ্যতে কোকৰাঝাৰ ৰে’লৱে ষ্টেচনত অধিক ৰে’লৰ ষ্টপেজ প্ৰদান কৰিবলৈ তেওঁ ৰে’লৱে কৰ্তৃপক্ষক আহ্বান জনায়।

হিন্দুস্থান সমাচাৰ / কিশোৰ মিশ্ৰ