মুম্বাই, ১৬ জানুৱাৰী (হি.স.)। ভাৰত-ছিংগাপুৰৰ সংযোগক উন্নীত কৰাৰ বাবে শুকুৰবাৰে মুম্বাইত টাটা নেতৃত্বাধীন এয়াৰ ইণ্ডিয়া আৰু ছিংগাপুৰ এয়াৰলাইন্সে বাণিজ্যিক সহযোগিতা কাঠামো চুক্তিত স্বাক্ষৰ কৰে। এই চুক্তিয়ে ভৱিষ্যতে যৌথ ব্যৱসায়িক চুক্তিৰ জৰিয়তে এক শক্তিশালী কৌশলগত অংশীদাৰিত্বৰ ভেটি স্থাপন কৰিব।

এই চুক্তিত স্বাক্ষৰ কৰে এয়াৰ ইণ্ডিয়াৰ মুখ্য কাৰ্যবাহী বিষয়া (চি ই অ’) আৰু পৰিচালন সঞ্চালক (এম ডি) কেম্পবেল উইলছন আৰু ছিংগাপুৰ এয়াৰলাইন্সৰ চি ই অ’ গহ চূন ফঙে। এই চুক্তিৰ অধীনত দুয়োটা কোম্পানীয়ে দীৰ্ঘদিনীয়া অংশীদাৰিত্ব আৰু অধিক শক্তিশালী কৰি যাত্ৰীসকলক উন্নত সেৱা, অধিক পথৰ বিকল্প, আৰু নিৰৱচ্ছিন্ন ভ্ৰমণ প্ৰদান কৰিব। এয়াৰ ইণ্ডিয়াই কয় যে এই অংশীদাৰিত্বৰ লক্ষ্য হৈছে ভাৰত আৰু ছিংগাপুৰৰ মাজত সংযোগ বৃদ্ধি কৰা আৰু ভৱিষ্যতে ইয়াক অন্য অঞ্চললৈ সম্প্ৰসাৰিত কৰা হ’ব পাৰে, যাৰ ফলত দুয়োটা বিমান সংস্থাৰ গ্ৰাহকক অধিক পছন্দ আৰু সুবিধা প্ৰদান কৰা হ’ব।

বিমান সংস্থাটোৱে কয় যে এবাৰ নিয়ন্ত্ৰণমূলক অনুমোদন লাভ কৰাৰ পিছত আৰু এটা নিৰ্দিষ্ট যৌথ ব্যৱসায়িক চুক্তি চূড়ান্ত হোৱাৰ পিছত তেওঁলোকে যৌথভাৱে উন্নত সামগ্ৰী আৰু সেৱাসমূহ মুকলি কৰিব, বিমানৰ সময়সূচী সমন্বয় কৰিব, নিৰৱচ্ছিন্ন স্থানান্তৰ সক্ষম কৰিব, পথৰ বিকল্পসমূহ সম্প্ৰসাৰণ কৰিব, আৰু গ্ৰাহকসকলক দুয়োটা নেটৱৰ্কতে সংহত ভ্ৰমণ সহজে বুকিং কৰাত সহায় কৰিব। এয়াৰ ইণ্ডিয়াৰ মহাৰাজা ক্লাব আৰু এছ আই এৰ ক্ৰীছফ্লাইয়াৰ ফ্ৰিকুৱেণ্ট ফ্লাইয়াৰ কাৰ্যসূচীৰ সদস্যসকলৰ বাবেও বৰ্তমানৰ ষ্টাৰ এলায়েন্সৰ সুবিধাসমূহৰ বাহিৰেও ক্ৰমান্বয়ে সুবিধাসমূহ সম্প্ৰসাৰণ কৰাৰ কথাও বিবেচনা কৰা হ’ব।

हिन्दुस्थान समाचार / অৰৱিন্দ