নতুন দিল্লী, ১৫ জানুৱাৰী (হি.স.)। প্ৰধানমন্ত্ৰী নৰেন্দ্ৰ মোদীয়ে কয় যে ভাৰতত গণতন্ত্ৰৰ প্ৰকৃত অৰ্থ হ’ল শেষ ব্যক্তিলৈ সুবিধা প্ৰদান কৰা। তেওঁ কয় যে চৰকাৰে কোনো ধৰণৰ বৈষম্য নোহোৱাকৈ, জনকল্যাণৰ মনোভাৱেৰে প্ৰতিজন নাগৰিকৰ বাবে কাম কৰি আছে আৰু এই কাৰণেই বিগত কেইটামান বছৰত দেশৰ প্ৰায় ২৫ কোটি লোক দৰিদ্ৰতাৰ পৰা ওলাই আহিছে।
সংসদ ভৱন পৰিসৰৰ সংবিধান ভৱনৰ কেন্দ্ৰীয় প্ৰেক্ষাগৃহত বৃহস্পতিবাৰে অনুষ্ঠিত কমনৱেলথৰ ২৮ সংখ্যক অধ্যক্ষ আৰু প্ৰিজাইডিং বিষয়াৰ সন্মিলন উদ্বোধন কৰাৰ পিছতে প্ৰধানমন্ত্ৰী মোদীয়ে সন্মিলনত ভাষণ প্ৰদান কৰে।
তেওঁ কয় যে এই সন্মিলন অনুষ্ঠিত হোৱা ঐতিহাসিক কেন্দ্ৰীয় প্ৰেক্ষাগৃহ (চেণ্ট্ৰেল হল) ভাৰতৰ গণতান্ত্ৰিক যাত্ৰাৰ এক অতি গুৰুত্বপূৰ্ণ স্থান। দাসত্বৰ শেষ বছৰবোৰত যেতিয়া ভাৰতৰ স্বাধীনতাৰ সিদ্ধান্ত লোৱা হৈছিল, তেতিয়া এই কেন্দ্ৰীয় প্ৰেক্ষাগৃহত সংবিধান সভাৰ বৈঠক হৈছিল। স্বাধীনতাৰ পিছৰ প্ৰায় ৭৫ বছৰ এই ভৱনটোৱে ভাৰতৰ সংসদ হিচাপে কাম কৰিছিল, য'ত দেশৰ ভৱিষ্যত সম্পৰ্কীয় বহু গুৰুত্বপূৰ্ণ সিদ্ধান্ত আৰু আলোচনা হৈছিল। এতিয়া গণতন্ত্ৰৰ প্ৰতি উৎসৰ্গিত এই ঐতিহাসিক স্থানৰ নাম সলনি কৰা হৈছে সংবিধান সদন।
প্ৰধানমন্ত্ৰীয়ে উল্লেখ কৰে যে ভাৰতত এইবাৰ চতুৰ্থবাৰৰ বাবে কমনৱেলথৰ অধ্যক্ষ আৰু প্ৰিজাইডিং অফিচাৰ সন্মিলন অনুষ্ঠিত হৈছে। এই সন্মিলনৰ মূল বিষয়বস্তু হৈছে সংসদীয় গণতন্ত্ৰৰ ফলপ্ৰসূ কাৰ্য্যকলাপ আৰু জনকল্যাণৰ দিশত ইয়াৰ প্ৰসাৰ।
সংসদীয় গণতন্ত্ৰত অধ্যক্ষৰ ভূমিকাক আলোকপাত কৰি তেওঁ কয় যে অধ্যক্ষৰ কাম বেছিকৈ কথা কোৱা নহয়, বৰঞ্চ আনৰ কথা শুনা আৰু সকলোকে সম সুযোগ প্ৰদান কৰা। অধ্যক্ষৰ ধৈৰ্য্যই গণতন্ত্ৰৰ মৰ্যাদা বজাই ৰাখে, আনকি কোলাহলপূৰ্ণ বা অত্যধিক উৎসাহী সদস্যকো তেওঁলোকে হাঁহিৰে চম্ভালি লয়।
প্ৰধানমন্ত্ৰী মোদীয়ে কয় যে স্বাধীনতাৰ সময়ত এনে বৈচিত্ৰ্য থকা দেশ এখনে গণতন্ত্ৰ সফলভাৱে চলাব পাৰিব নে নাই সেই বিষয়ে বহুতে সন্দেহ কৰিছিল যদিও ভাৰতে নিজৰ বৈচিত্ৰ্যক গণতন্ত্ৰৰ শক্তিলৈ ৰূপান্তৰিত কৰিলে। ভাৰতে প্ৰমাণ কৰিছে যে গণতান্ত্ৰিক প্ৰতিষ্ঠান আৰু প্ৰক্ৰিয়াই উন্নয়নৰ স্থিতিশীলতা, গতি, আৰু ব্যাপক সম্প্ৰসাৰণ প্ৰদান কৰে।
তেওঁ কয় যে আজি ভাৰত বিশ্বৰ আটাইতকৈ দ্ৰুতগতিত বৃদ্ধি পোৱা প্ৰধান অৰ্থনীতি। ভাৰতত বিকশিত হোৱা সংহত পেমেণ্ট ব্যৱস্থা বিশ্বৰ সৰ্ববৃহৎ ডিজিটেল পেমেণ্ট ব্যৱস্থাত পৰিণত হৈছে। বৰ্তমান ভাৰত বিশ্বৰ সৰ্ববৃহৎ ভেকচিন উৎপাদনকাৰী আৰু তীখা উৎপাদনৰ ক্ষেত্ৰত দ্বিতীয় স্থানত আছে।
প্ৰধানমন্ত্ৰীয়ে আৰু কয় যে ভাৰতত আজি বিশ্বৰ তৃতীয় বৃহত্তম উদ্ভাৱন আৰু ষ্টাৰ্টআপ ইক’চিষ্টেম আছে। ভাৰত বিশ্বৰ তৃতীয় বৃহত্তম বিমান বজাৰ হিচাপে পৰিগণিত হৈছে। ইয়াৰ উপৰিও ভাৰতে বিশ্বৰ চতুৰ্থ বৃহত্তম ৰেল নেটৱৰ্ক আৰু তৃতীয় বৃহত্তম মেট্ৰ’ ৰেল নেটৱৰ্কৰ গৌৰৱ কৰে।
প্ৰধানমন্ত্ৰী মোদীয়ে ভাৰতৰ বাবে গণতন্ত্ৰ সৰ্বোচ্চ বুলি উল্লেখ কৰে। জনসাধাৰণৰ সপোনক অগ্ৰাধিকাৰ দি চৰকাৰে নীতিৰ পৰা আৰম্ভ কৰি প্ৰযুক্তিলৈকে প্ৰতিটো ক্ষেত্ৰতে গণতান্ত্ৰিক চিন্তাধাৰা গ্ৰহণ কৰিছে, যাতে উন্নয়নত একোৱেই বাধা নিদিয়ে।
ক’ভিড-১৯ মহামাৰীৰ কথা উল্লেখ কৰি তেওঁ কয় যে সেই কঠিন সময়তো ভাৰতে ১৫০ খনতকৈও অধিক দেশক ঔষধ আৰু ভেকচিনৰ লগতে নিজৰ প্রয়োজনীয়তা প্রদান কৰিছিল৷ মানৱতাৰ সেৱা, মানুহৰ কল্যাণ, বিশ্বৰ প্ৰতি দায়িত্ববোধ ভাৰতৰ সংস্কৃতি আৰু গণতান্ত্ৰিক মূল্যবোধৰ অবিচ্ছেদ্য অংগ।
মোদীয়ে উল্লেখ কৰে যে ভাৰতে প্ৰতিটো বিশ্বব্যাপী মঞ্চত গ্ল’বেল চাউথৰ স্বাৰ্থৰ বাবে তীব্ৰ পোষকতা কৰি আছে। জি-২০ৰ সভাপতিত্বৰ সময়ছোৱাত ভাৰতে গ্ল’বেল চাউথৰ উদ্বেগক বিশ্বৰ কাৰ্যসূচীৰ কেন্দ্ৰবিন্দুত ৰাখিছে।
हिन्दुस्थान समाचार / অৰৱিন্দ
