তেহৰাণ/ৱাশ্বিংটন, ১৩ জানুৱাৰী (হি.স.)। ইৰাণত ২৮ ডিচেম্বৰৰ পৰা মুদ্ৰাস্ফীতিৰ বিৰুদ্ধে আৰম্ভ হোৱা প্ৰতিবাদে দেশখনৰ সৰ্বোচ্চ শাসক আলী খামেনেইক উৎখাত কৰাৰ গণ আন্দোলনলৈ পৰিণত হৈছে। সমগ্ৰ ইৰাণত ৰাজপথত মানুহেই মানুহ ওলাই আহিছে। বন্ধ কৰি দিয়া হৈছে ইন্টাৰনেট সেৱা। এই পৰ্যন্ত নিৰাপত্তাৰক্ষীৰ গুলীত কমেও ২০০০ প্ৰতিবাদকাৰী নিহত হোৱাৰ খবৰ পোৱা গৈছে। ৰাইজে বিক্ষোভ অব্যাহত ৰাখিছে। খামেনেই কয় যে আমেৰিকাই প্ৰতিবাদকাৰীক উচটনি দিছে। ইফালে, প্ৰতিবাদকাৰীৰ বিৰুদ্ধে দমন অব্যাহত থাকিলে ইৰাণক তীব্ৰ সামৰিক আক্ৰমণৰ বাবে সাজু হ’বলৈ বাৰে বাৰে সকীয়াই দিছে আমেৰিকাই। ইৰাণে ৰাষ্ট্ৰপতি ড’নাল্ড ট্ৰাম্পৰ প্ৰত্যাহ্বান গ্ৰহণ কৰি কয় যে ই সকলো প্ৰকাৰে যুদ্ধৰ বাবে সাজু।
ইৰাণৰ কেইবাখনো দেশৰ ৰাষ্ট্ৰদূতক তলৱ
ইৰাণ ইণ্টাৰনেশ্যনেলৰ এক প্ৰতিবেদন অনুসৰি আমেৰিকাৰ ৰাষ্ট্ৰপতি ড’নাল্ড ট্ৰাম্পে কয় যে আমেৰিকাই ইৰাণৰ ওপৰত অতি শক্তিশালী সামৰিক আক্ৰমণৰ কথা চিন্তা কৰিছে। প্ৰতিবাদকাৰীক দমন কৰাৰ বিৰুদ্ধে দিয়া সতৰ্কবাণীক আওকাণ কৰাটো তেহৰাণৰ বাবে ব্যয়বহুল বুলি প্ৰমাণিত হ’ব বুলিও তেওঁ কয়। ইৰাণৰ বৈদেশিক মন্ত্ৰী আব্বাছ আৰাঘচিয়ে ইয়াৰ উত্তৰত কয় যে ইৰাণ ন্যায্য আলোচনাৰ বাবে সাজু, কিন্তু যুদ্ধৰ বাবেও সম্পূৰ্ণৰূপে সাজু। ইৰাণৰ স্বাস্থ্য বিষয়াসকলে দাবী কৰিছে যে দুসপ্তাহতকৈ অধিক সময় ধৰি চলি থকা অশান্তিৰ ফলত প্ৰাথমিকভাৱে মৃত্যু হোৱা লোকৰ সংখ্যা যোৱা কিছুদিনত কমেও ২০০০লৈ বৃদ্ধি পাইছে। ইৰাণে ব্ৰিটেইন, জাৰ্মানী, ফ্ৰান্স আৰু ইটালীৰ ৰাষ্ট্ৰদূতক তলৱ কৰে। ইৰাণে তেওঁলোকৰ চৰকাৰে প্ৰতিবাদকাৰীক সমৰ্থন কৰা আৰু ইয়াৰ আভ্যন্তৰীণ কাম-কাজত হস্তক্ষেপ কৰাৰ অভিযোগ উত্থাপন কৰে।
ট্ৰাম্পৰ তিনিটা বিকল্পৰ বিষয়ে অৱগত
চিবিএছ নিউজৰ এক প্ৰতিবেদন অনুসৰি, সোমবাৰে জ্যেষ্ঠ বিষয়াসকলে ৰাষ্ট্ৰপতি ট্ৰাম্পক ইৰাণৰ বিৰুদ্ধে ব্যৱস্থা গ্ৰহণৰ তিনিটা বিকল্পৰ বিষয়ে অৱগত কৰে: সামৰিক আক্ৰমণ, চাইবাৰ অভিযান আৰু প্ৰতিবাদকাৰীক সমৰ্থন কৰাৰ মানসিক কৌশল। বিষয়াসকলে কয় যে এই তিনিটা বিকল্প একত্ৰিত কৰিব পৰা যাব। প্ৰতিবেদন অনুসৰি, “আমেৰিকাৰ দুজন বিষয়াই কয় যে কোনো চূড়ান্ত সিদ্ধান্ত লোৱা হোৱা নাই আৰু কূটনৈতিক চেনেলসমূহ মুকলি হৈ আছে।”
প্ৰতিবাদকাৰীৰ বিৰুদ্ধে হিংসাৰ অষ্ট্ৰেলিয়াৰ গৰিহণা
অষ্ট্ৰেলিয়াৰ প্ৰধানমন্ত্ৰী এণ্টনি আলবানিজে প্ৰতিবাদকাৰীৰ বিৰুদ্ধে হোৱা হিংসাক গৰিহণা দিয়ে। তেওঁ আশা প্ৰকাশ কৰে যে ইৰাণৰ জনসাধাৰণে বৰ্তমানৰ চৰকাৰখন আঁতৰাই মানৱ অধিকাৰ সন্মান কৰা গণতান্ত্ৰিক ইৰাণ প্ৰতিষ্ঠা কৰিব।
মঙলবাৰে কেনবেৰাত অনুষ্ঠিত এখন সংবাদমেলত আলবানিজে কয় যে, আমি ইৰাণৰ জনসাধাৰণৰ সৈতে থিয় দিছো যিয়ে এটা নিপীড়নকাৰী শাসন ব্যৱস্থাৰ বিৰুদ্ধে যুঁজি আছে। মই আশা কৰিছো যে জনসাধাৰণে খামেনেইক আঁতৰাই পেলাব। বৈদেশিক মন্ত্ৰী পেনি ৱঙে কয় যে বৰ্তমানৰ ইৰাণ চৰকাৰৰ কোনো বৈধতা নাই আৰু ক্ষমতা বজাই ৰাখিবলৈ নিজৰ নাগৰিকক হত্যা কৰি আছে।
ইজৰাইলত থকা আমেৰিকাৰ ৰাষ্ট্ৰদূতে কয়– ট্ৰাম্পে ইৰাণত গণহত্যাৰ অনুমতি নিদিয়ে
ইজৰাইলত থকা আমেৰিকাৰ ৰাষ্ট্ৰদূত মাইক হাকাবিয়ে কয় যে ড’নাল্ড ট্ৰাম্প দৰ্শক হৈ নাথাকিব। তেওঁ ইৰাণত চলি থকা প্ৰতিবাদকাৰীৰ হত্যাকাণ্ড অব্যাহত থাকিবলৈ নিদিয়ে। সোমবাৰে স্কাই নিউজৰ সৈতে হোৱা এক সাক্ষাৎকাৰত মাইক হাকাবিয়ে কয় যে, ট্ৰাম্পে মানুহৰ মৃত্যুক চাই থাকিব নোৱাৰে। তেওঁ নিশ্চিতভাৱে হস্তক্ষেপ কৰিব। তেওঁ কয় যে ইৰাণৰ জনসাধাৰণে খামেনেইৰ বিৰুদ্ধে প্ৰতিবাদ কৰিছে কাৰণ তেওঁলোকে নিজৰ পৰিয়ালক খাদ্য যোগান ধৰিব নোৱাৰে। পানীৰ নাটনি হৈছে। মুদ্ৰাস্ফীতি ইমানেই বেছি যে এটা পাওৰুটি ক্ৰয় কৰাতো কঠিন হৈ পৰিছে।
আমেৰিকাৰ নিজৰ নাগৰিকসকলক অনতিপলমে ইৰাণ এৰি যাবলৈ আহ্বান
ইৰাণত থকা আমেৰিকাৰ দূতাবাসে সোমবাৰে ভাৰ্চুৱেল ছিকিউৰিটি এডভাইজাৰী জাৰি কৰি দেশজুৰি ক্ৰমাৎ বৃদ্ধি পোৱা প্ৰতিবাদৰ মাজতে আমেৰিকাৰ নাগৰিকসকলক ইৰাণ এৰি যাবলৈ আহ্বান জনায়। আমেৰিকা চৰকাৰৰ সাহায্যৰ ওপৰত নিৰ্ভৰ নকৰাকৈ নাগৰিকসকলক নিজাববীয়াকৈ ইৰাণ এৰি যাবলৈ পৰামৰ্শ দিয়া হৈছে।
ইৰাণৰ আৰক্ষী অধীক্ষকে প্ৰত্যাহ্বান জনালে ট্ৰাম্পক
সোমবাৰে ইৰাণৰ আৰক্ষী অধীক্ষক আহমদ্ৰেজা ৰাডানে প্ৰতিবাদকাৰীক হত্যা কৰাৰ সন্দৰ্ভত ইছলামিক ৰিপাব্লিকৰ বিৰুদ্ধে ড’নাল্ড ট্ৰাম্পে দিয়া ভাবুকিৰ প্ৰতি সঁহাৰি জনাই কয় যে তেওঁলোকে এবাৰ এই ভুল কৰিছিল আৰু তেওঁলোকে সঁহাৰি পাইছিল, কিন্তু যদি তেওঁলোক পুনৰ আহে তেন্তে আমি তেওঁলোকৰ সেৱা কৰিবলৈ সাজু। তেওঁ লগতে কয় যে আমাৰ শেষৰটো আক্ৰমণৰ সঁহাৰি হজম কৰিবলৈ তেওঁলোকক বহু সময় লাগিব। ইফালে, নিৰ্বাসিত ৰাজকুমাৰ ৰেজা পেহলৱীয়ে সোমবাৰে চিবিএছ নিউজত সম্প্ৰচাৰিত এক সাক্ষাৎকাৰত কয় যে তেওঁ ট্ৰাম্প প্ৰশাসনৰ সৈতে প্ৰত্যক্ষ সংস্পৰ্শত আছে। এইটো এটা গেম-চেঞ্জাৰ হ’ব পাৰে। দক্ষিণ আফ্ৰিকাত বৰ্ণবৈষম্যৰ অন্ত পৰা আৰু ছোভিয়েট ইউনিয়নৰ পতনৰ উদ্ধৃতি দি পেহলৱীয়ে কয় যে, “যিকোনো মুক্তি আন্দোলন সফল হৈছে যেতিয়া অৱশেষত বিশ্বই নিপীড়নকাৰী চৰকাৰক প্ৰত্যাহ্বান জনাইছে।”
খামেনেই কয়, আমেৰিকাৰ ষড়যন্ত্ৰ বিফল হ'ল। সোমবাৰে এক বাৰ্তাযোগে আলী খামেনেই ইছলামিক শাসনৰ অন্ত পেলোৱাৰ দাবীত প্ৰতিবাদকাৰীক আমেৰিকা সমৰ্থিত ভাড়াতীয়া বুলি অভিহিত কৰে। তেওঁ কয় যে চৰকাৰে আমেৰিকাৰ এক ষড়যন্ত্ৰ বিফল কৰিছে। বাৰ্তাটোত কোৱা হৈছে যে, ইৰাণৰ মহান ৰাষ্ট্ৰই নিজৰ সংকল্প আৰু পৰিচয়ৰে শত্ৰুৰ সন্মুখত নিজকে উপস্থাপন কৰিলে। এইটো আছিল আমেৰিকাৰ ৰাজনীতিবিদসকলক তেওঁলোকৰ প্ৰতাৰণা বন্ধ কৰিবলৈ আৰু প্ৰতাৰক ভাড়াতীয়াক বিশ্বাস কৰা বন্ধ কৰিবলৈ সতৰ্কবাণী।
हिन्दुस्थान समाचार / Manoj Kumar Saikia
