নতুন দিল্লী, ১২ জানুৱাৰী (হি.স.)। স্বামী বিবেকানন্দৰ জন্ম বাৰ্ষিকী আৰু ৰাষ্ট্ৰীয় যুৱ দিৱসত ৰাষ্ট্ৰপতি দ্ৰৌপদী মুৰ্মু, উপ-ৰাষ্ট্ৰপতি চি পি ৰাধাকৃষ্ণন, গৃহমন্ত্ৰী অমিত শ্বাহ, নীতিন গাডকাৰী, মল্লিকাৰ্জুন খৰ্গে, ৰাহুল গান্ধী, যোগী আদিত্যনাথকে ধৰি কেইবাগৰাকীও বিশিষ্ট নেতাই স্বামী বিবেকানন্দক শ্ৰদ্ধাঞ্জলি জনোৱাৰ লগতে যুৱ প্ৰজন্মক শুভেচ্ছা জ্ঞাপন কৰে। তেওঁৰ চিন্তাধাৰা আৰু অৱদানো স্মৰণ কৰে। উপ-ৰাষ্ট্ৰপতি চি পি ৰাধাকৃষ্ণনে তেওঁৰ বাসগৃহত তেওঁক শ্ৰদ্ধাঞ্জলি জ্ঞাপন কৰে।
ৰাষ্ট্ৰপতি দ্ৰৌপদী মুৰ্মুৱে ছ’চিয়েল মিডিয়াত লিখিছে যে স্বামী বিবেকানন্দ আছিল এজন চিৰ দূৰদৰ্শী আৰু আধ্যাত্মিক আইকন। তেওঁ আভ্যন্তৰীণ শক্তি আৰু মানৱতাৰ সেৱাক এক অৰ্থপূৰ্ণ জীৱনৰ ভেটি বুলি অভিহিত কৰে। ভাৰতৰ চিৰন্তন প্ৰজ্ঞাক বিশ্বলৈ কঢ়িয়াই অনা স্বামীজীয়ে ভাৰতীয়ৰ মাজত জাতীয় গৌৰৱৰ বীজ সিঁচি যুৱক-যুৱতীসকলক জাতি-নিৰ্মাণৰ প্ৰতি প্ৰেৰণা যোগাইছিল। তেওঁৰ শিক্ষাই সদায় মানৱতাক অনুপ্ৰাণিত কৰিব।
উপ-ৰাষ্ট্ৰপতি চি পি ৰাধাকৃষ্ণনে উপ-ৰাষ্ট্ৰপতি এনক্লেভত স্বামী বিবেকানন্দক শ্ৰদ্ধাঞ্জলি জ্ঞাপন কৰে। তেওঁ কয় যে স্বামীজীৰ জীৱন আৰু শিক্ষাত আভ্যন্তৰীণ শক্তি, আত্ম-অনুশাসন, আৰু নিস্বাৰ্থ সেৱাৰ ওপৰত গুৰুত্ব দিয়া হৈছিল। ভাৰতৰ সভ্য জ্ঞান বিশ্বজুৰি বিয়পাই তেওঁ ৰাষ্ট্ৰীয় গৌৰৱৰ শিখা প্ৰজ্বলন কৰিছিল আৰু ৰাষ্ট্ৰৰ প্ৰগতিৰ বাবে যুৱক-যুৱতীসকলৰ মাজত আস্থা জগাই তুলিছিল। তেওঁৰ আদৰ্শই প্ৰজন্মক পথ প্ৰদৰ্শন কৰি থাকিব।
স্বামী বিবেকানন্দক শ্ৰদ্ধাঞ্জলি জ্ঞাপন কৰি গৃহমন্ত্ৰী অমিত শ্বাহে দেশবাসীক ৰাষ্ট্ৰীয় যুৱ দিৱসৰ শুভেচ্ছা জ্ঞাপন কৰে। তেওঁ কয় যে স্বামীজীয়ে যুৱক-যুৱতীসকলক ভাৰতীয় জ্ঞান পৰম্পৰা, দৰ্শন, আধ্যাত্মিকতাৰ সৈতে সংযোগ কৰি ৰামকৃষ্ণ অভিযানৰ জৰিয়তে সমাজসেৱাৰ আদৰ্শ প্ৰতিষ্ঠা কৰিছিল। তেওঁৰ চিন্তাধাৰাই যুৱ প্ৰজন্মৰ মাজত কৰ্তব্যবোধ আৰু দেশপ্ৰেম জাগ্ৰত কৰি উন্নত ভাৰত নিৰ্মাণৰ গতি ত্বৰান্বিত কৰি তুলিছে।
কেন্দ্ৰীয় পথ পৰিবহণ মন্ত্ৰী নীতিন গাডকাৰীয়ে স্বামী বিবেকানন্দক এজন অগ্ৰণী আৰু যুৱক-যুৱতীসকলৰ বাবে প্ৰেৰণাৰ উৎস বুলি অভিহিত কৰে। তেওঁ কয় যে তেওঁৰ উজ্জ্বল ধাৰণাসমূহে ভাৰতীয় সংস্কৃতিক বিশ্বজুৰি প্ৰতিষ্ঠা কৰিছিল আৰু প্ৰজন্ম প্ৰজন্মক অনুপ্ৰাণিত কৰি যাব। ৰাষ্ট্ৰীয় যুৱ দিৱসত দেশৰ যুৱক-যুৱতীলৈ তেখেতৰ শুভেচ্ছা জ্ঞাপন কৰে।
কংগ্ৰেছৰ ৰাষ্ট্ৰীয় সভাপতি মল্লিকাৰ্জুন খৰ্গেয়ে সমূহ দেশবাসীক ৰাষ্ট্ৰীয় যুৱ দিৱসৰ শুভেচ্ছা জ্ঞাপন কৰে। তেওঁ স্বামী বিবেকানন্দক ভাৰতীয় মূল্যবোধৰ প্ৰতীক আৰু যুৱক-যুৱতীসকলৰ বাবে প্ৰেৰণাৰ অমূল্য উৎস বুলি অভিহিত কৰে। খৰ্গে স্মৰণ কৰি কয় যে ৰাজীৱ গান্ধীয়ে স্বামীজীৰ চিন্তাধাৰাৰ প্ৰতি শ্ৰদ্ধাঞ্জলি হিচাপে এই দিৱসটো ৰাষ্ট্ৰীয় যুৱ দিৱস হিচাপে ঘোষণা কৰিছিল।
ৰাহুল গান্ধীয়ে স্বামী বিবেকানন্দক শ্ৰদ্ধাঞ্জলি জনায়। তেওঁ কয় যে তেওঁৰ চিন্তাৰ জৰিয়তে স্বামীজীয়ে ভাৰতীয় সংস্কৃতিক বিশ্ব মঞ্চলৈ আনিলে আৰু তেওঁৰ আদৰ্শই প্ৰতিজন ভাৰতীয়ক অনুপ্ৰাণিত কৰি যাব।
উত্তৰ প্ৰদেশৰ মুখ্যমন্ত্ৰী যোগী আদিত্যনাথে ছ’চিয়েল মিডিয়া এক্সত পোষ্ট কৰি লিখিছে, “গৌৰৱেৰে কওক আমি হিন্দু।” তেওঁ স্বামী বিবেকানন্দক ভাৰতীয় জ্ঞান পৰম্পৰাৰ পতাকাধাৰী আৰু সনাতন সংস্কৃতিক বিশ্ব মঞ্চলৈ পুনৰুদ্ধাৰ কৰা ব্যক্তি বুলি অভিহিত কৰে। যোগীয়ে কয় যে তেওঁৰ চিন্তাধাৰাই প্ৰমাণ কৰিলে যে হিন্দু ধৰ্ম মানৱতাৰ সামগ্ৰিক প্ৰগতিৰ পথ প্ৰদৰ্শক। ৰাষ্ট্ৰীয় যুৱ দিৱসত তেওঁ যুৱক-যুৱতীসকলক তেওঁৰ চিন্তাধাৰাক তেওঁলোকৰ জীৱনত গ্ৰহণ কৰি ৰাষ্ট্ৰৰ সেৱাৰ সংকল্প শক্তিশালী কৰিবলৈ আহ্বান জনায়।
দিল্লীৰ মুখ্যমন্ত্ৰী ৰেখা গুপ্তাই এক্স-পোষ্টযোগে ভাৰতৰ চিৰন্তন প্ৰজ্ঞা পৰম্পৰা আৰু সাংস্কৃতিক গৌৰৱৰ বিশ্বব্যাপী প্ৰচাৰক স্বামী বিবেকানন্দক তেওঁৰ জন্ম বাৰ্ষিকীত শ্ৰদ্ধাঞ্জলি জ্ঞাপন কৰি ৰাষ্ট্ৰীয় যুৱ দিৱস উপলক্ষে সকলোকে শুভেচ্ছা জ্ঞাপন কৰে। স্বামী বিবেকানন্দৰ জীৱন দৰ্শন আধ্যাত্মিক চেতনাৰ এক বৃহৎ প্ৰবাহ, যিয়ে পূবৰ আত্মসচেতনতা আৰু পশ্চিমৰ যুক্তিবাদৰ মাজত এক শক্তিশালী সমন্বয় স্থাপন কৰি সমগ্ৰ মানৱজাতিক একতাৰ বাৰ্তা প্ৰদান কৰিছিল বুলিও তেওঁ কয়। তেওঁৰ চিন্তাধাৰাই যুৱক-যুৱতীসকলক বস্তুগত প্ৰগতি অতিক্ৰম কৰি আত্ম-বাস্তৱায়ন আৰু চৰিত্ৰ নিৰ্মাণৰ উচ্চতাত উপনীত হ’বলৈ প্ৰেৰণাদায়কভাৱে আহ্বান জনায়। আধ্যাত্মিক শিপাৰ সৈতে সংযোগ স্থাপন কৰি ৰাষ্ট্ৰ গঢ়ি তোলাৰ সংকল্পত তেওঁ নতুন শক্তি আৰু দিশৰ প্ৰৱেশ ঘটালে।
উল্লেখযোগ্য যে স্বামী বিবেকানন্দৰ জন্ম বাৰ্ষিকীক তেওঁৰ আদৰ্শ আৰু শিক্ষাৰে যুৱক-যুৱতীসকলক অনুপ্ৰাণিত কৰিবলৈ ৰাষ্ট্ৰীয় যুৱ দিৱস হিচাপে পালন কৰা হয়, বিশেষকৈ তেওঁৰ চিকাগো ভাষণ (১৮৯৩)ৰ পিছত বিশ্ব মঞ্চত ভাৰতীয় সংস্কৃতি আৰু বেদান্তৰ প্ৰচাৰ আৰু তেওঁৰ বিখ্যাত শ্লোগান উঠা, জাগগ যিয়ে মানৱতা সেৱা আৰু আত্মজাগৰণৰ বাৰ্তা প্ৰেৰণ কৰে।
हिन्दुस्थान समाचार / মনোজ কুমাৰ শইকীয়া
