ভেংকুৱাৰ, ৩০ ছেপ্টেম্বৰ (হি.স.)। ভাৰতৰ প্ৰাক্তন ক্ৰিকেটাৰ সুৰেশ ৰাইনাই কানাডা ছুপাৰ ৬০ লীগত খেলিব। অহা ৮ অক্টোবৰৰ পৰা ১৩ অক্টোবৰলৈ ভেংকুৱাৰৰ বি চি প্লেচত অনুষ্ঠিত হ’ব এই প্ৰতিযোগিতা। টৰন্টো ছিক্সাৰছৰ হৈ খেলিব ৰাইনা। তেওঁৰ এই অংশগ্ৰহণে লীগখনক এক বৃহৎ গতি প্ৰদান কৰাৰ লগতে দৰ্শকৰ মাজত উত্তেজনা বৃদ্ধি কৰিব বুলি আশা কৰা হৈছে।
বাওঁহাতৰ বেটছমেন ৰাইনা বিস্ফোৰক বেটিং আৰু উৎকৃষ্ট ফিল্ডিঙৰ বাবে বিখ্যাত। এইবাৰ তেওঁক এলেক্স হেলছ, জেছন ৰয়, আন্দ্ৰে ফ্লেচাৰৰ দৰে কিংবদন্তি খেলুৱৈৰ সৈতে খেলা দেখা যাব।
টৰন্টো ছিক্সাৰছৰ সৈতে সম্পৰ্ক সন্দৰ্ভত সুৰেশ ৰাইনাই এক বিবৃতিত কয় যে, মই কানাডা ছুপাৰ ৬০ৰ অংশ হ'বলৈ পাই অতিশয় উৎসাহিত হৈছো। এইটো উদ্বোধনী সংস্কৰণ আৰু ইতিমধ্যে ই বিশেষ অনুভৱ কৰা হৈছে। টৰন্টো ছিক্সাৰছৰ এটা সুষম দল আছে য'ত শীৰ্ষ আন্তঃৰাষ্ট্ৰীয় খেলুৱৈ আৰু কানাডাৰ প্ৰতিভাক অন্তৰ্ভুক্ত কৰা হৈছে। মই তেওঁলোকৰ সৈতে খেলি দলটোৰ সফলতাত অৰিহণা যোগাবলৈ আগ্ৰহী।
কানাডা ছুপাৰ ৬০ৰ প্ৰতিষ্ঠাপক তথা অধ্যক্ষ অভিষেক শ্বাহে কয় যে, সুৰেশ ৰাইনাই প্ৰতিযোগিতাত যোগদান কৰাত আমি আনন্দিত। তেওঁৰ অভিজ্ঞতা আৰু তাৰকা মূল্য যুৱ খেলুৱৈসকলৰ বাবে এক বৃহৎ প্ৰেৰণা হ'ব।
টৰন্টো ছিক্সাৰছৰ চিইঅ’ ছামি ফৰিদীয়ে কয় যে, আমাৰ দলত সুৰেশ ৰাইনাক লৈ আমি সন্মানিত হৈছো। তেওঁ বিশ্বকাপ বিজয়ী আৰু বিশ্বৰ ডাঙৰ ডাঙৰ প্ৰতিযোগিতাত খেলিছে। চুটি ফৰ্মেটত তেওঁৰ অভিজ্ঞতা আমাৰ দলৰ বাবে এক বৃহৎ সুবিধা হ'ব।
টৰন্টো ছিক্সাৰছৰ প্ৰথমখন মেচ হ’ব ৮ অক্টোবৰত ব্ৰেম্পটন ব্লিটজৰ বিৰুদ্ধে।
हिन्दुस्थान समाचार / Manoj Kumar Saikia
