হানয়, ২৯ ছেপ্টেম্বৰ (হি.স.)। ভিয়েটনামত বুয়াল’ই ধুমুহাই সৃষ্টি কৰা ধ্বংসলীলাত ৮ জন লোকৰ মৃত্যু হোৱাৰ বিপৰীতে ১৭ জন লোক নিৰুদ্দেশ হৈছে। সংবাদ মাধ্যমৰ বাতৰি অনুসৰি প্ৰচণ্ড বতাহ আৰু প্ৰচণ্ড বৰষুণে ঘৰ-দুৱাৰৰ ক্ষতিসাধন কৰে, বিদ্যুৎ যোগানত ব্যাঘাত জন্মায়, আৰু ডাঙৰ ডাঙৰ পথ বানপানীত বুৰ গৈছে। পিছত ধুমুহাটো দুৰ্বল হৈ লাওছৰ ফালে আগবাঢ়ে।

ভিয়েটনাম নিউজ এজেন্সীয়ে দুৰ্যোগ ব্যৱস্থাপনা সংস্থাৰ উদ্ধৃতিৰে প্ৰকাশ কৰা অনুসৰি নিন বিন প্ৰদেশত প্ৰচণ্ড বতাহৰ ফলত সংঘটিত দুৰ্ঘটনাত ৮ জন লোক নিহত হোৱাৰ লগতে আন ৭ জন আহত হয়। হুৱে চহৰত বানপানীৰ পানীত আবদ্ধ হৈ এজন লোকৰ মৃত্যু হোৱাৰ বিপৰীতে থান হোয়া প্ৰদেশত আন এজনৰ গছ সৰি পৰাৰ ফলত মৃত্যু হোৱা বুলি জানিব পৰা গৈছে। ধুমুহাই দেশৰ উপকূল পোৱাৰ পূৰ্বেই চৰকাৰে ২৮,৫০০ৰো অধিক লোকক ঘৰৰ পৰা উলিয়াই আনিছিল।

মধ্য প্ৰদেশৰ চাৰিটা বিমানবন্দৰ বন্ধ হৈ থকাৰ ফলত শ শ বিমান সেৱা বাতিল বা পলম হয়। দেশৰ বহু অংশত হোৱা ধাৰাসাৰ বৰষুণৰ ফলত কৰ্তৃপক্ষই বান আৰু ভূমিস্খলনৰ সতৰ্কবাণী জাৰি কৰিছে বুলি সংস্থাটোৱে প্ৰকাশ কৰিছে। বতৰ সংস্থাটোৱে দেওবাৰে নিশাৰ পৰা মঙলবাৰলৈ দেশৰ বহু ঠাইত প্ৰবল বৰষুণৰ ভৱিষ্যদ্বাণী কৰিছে।

ইফালে দুৰ্যোগ ব্যৱস্থাপনা সংস্থাই প্ৰকাশ কৰা অনুসৰি ধুমুহাৰ ফলত কোনো বৃহৎ উদ্যোগিক ইউনিট ক্ষতিগ্ৰস্ত হোৱা নাই। কিন্তু শিক্ষানুষ্ঠান বন্ধ হৈ থাকে।

हिन्दुस्थान समाचार / অৰৱিন্দ