মুম্বাই, ২৭ ছেপ্টেম্বৰ (হি.স.)। ভাৰতীয় বতৰ বিজ্ঞান বিভাগে শনিবাৰে মহাৰাষ্ট্ৰৰ ২২ খন জিলাত আগন্তুক ৪৮ ঘণ্টাৰ বাবে প্ৰচণ্ড বৰষুণৰ সতৰ্কবাণী জাৰি কৰে। ইয়াৰ প্ৰতিক্ৰিয়া স্বৰূপে ৰাজ্যৰ দুৰ্যোগ ব্যৱস্থাপনা বিভাগে সংশ্লিষ্ট জিলাসমূহক সজাগ হৈ থাকিবলৈ পৰামৰ্শ দিছে। ইয়াৰ পোহৰত লাটুৰ, ধৰাশিৱ, আৰু নন্দদ জিলাৰ সকলো বিদ্যালয় বন্ধ ঘোষণা কৰা হৈছে। নিতান্তই প্ৰয়োজন হ’লেহে ঘৰৰ পৰা ওলাই যাবলৈ আহ্বান জনোৱা হৈছে।
দুৰ্যোগ ব্যৱস্থাপনা বিভাগে আজি সাংবাদিকৰ আগত কয় যে অহা ৪৮ ঘণ্টা মহাৰাষ্ট্ৰৰ বাবে অতি গুৰুত্বপূৰ্ণ। বতৰ বিজ্ঞান বিভাগে ২২ খন জিলাৰ বাবে ৰেড এলাৰ্ট জাৰি কৰিছে। দুদিন পূৰ্বে বানপানীৰ ফলত ক্ষতিগ্ৰস্ত হোৱা সোলাপুৰ, ধৰাশিৱ, জালনা, আৰু লাটুৰত আগন্তুক দুদিন অতি প্ৰবল বৰষুণৰ সম্ভাৱনা আছে। আজি আৰু কাইলৈ মাৰাথৱাডাকে ধৰি ৰাজ্যজুৰিও ধাৰাসাৰ বৰষুণৰ সম্ভাৱনা আছে। বতৰ বিজ্ঞান বিভাগে ২৭, ২৮, আৰু ২৯ ছেপ্টেম্বৰত ৰাজ্যৰ বহু ঠাইত প্ৰচণ্ড বৰষুণৰ ভৱিষ্যদ্বাণী কৰিছে।মাৰাথৱাদা, মধ্য মহাৰাষ্ট্ৰ, আৰু পশ্চিম মহাৰাষ্ট্ৰতো বৰষুণৰ সম্ভাৱনা আছে। লাটুৰ জিলা ৰেড এলাৰ্টৰ মাজতে নদীৰ পাৰত বসবাস কৰা বাসিন্দাসকলকো সতৰ্ক হৈ থাকিবলৈ সকীয়াই দিছে জিলা প্ৰশাসনে। ইফালে, যোৱা নিশাৰ পৰা জিলাখনত ধাৰাসাৰ বৰষুণে ঢৌৱাইছে৷
हिन्दुस्थान समाचार / আলোক চক্ৰৱৰ্তী
