কাঠমাণ্ডু, ২৫ ছেপ্টেম্বৰ (হি.স.)। নেপালত ভোটদানৰ বয়স ১৮ বছৰৰ পৰা ১৬ বছৰলৈ হ্ৰাস কৰা হৈছে। জেন-জি আন্দোলনৰ পিছত চৰকাৰে এই সিদ্ধান্ত গ্ৰহণ কৰিছিল অধিক যুৱক-যুৱতীক নিৰ্বাচনী প্ৰক্ৰিয়াত অংশগ্ৰহণ কৰিবলৈ উৎসাহিত কৰিবলৈ। বৃহস্পতিবাৰে প্ৰধানমন্ত্ৰী সুশীলা কাৰ্কীয়ে দেশবাসীক ভাষণ দিয়াৰ লগে লগে নিৰ্বাচন আয়োগে এক অধিসূচনা জাৰি কৰি ১৬ বছৰ বয়সৰ যুৱক-যুৱতীসকলক ভোটাৰ তালিকাত পঞ্জীয়ন কৰিবলৈ আহ্বান জনায়।

জেন-জি গোটৰ দাবীৰ প্ৰতি সঁহাৰি জনাই প্ৰধানমন্ত্ৰী কাৰ্কিয়ে দেশবাসীক দিয়া ভাষণত ভোটদানৰ বয়স হ্ৰাস কৰাৰ কথা ঘোষণা কৰে। ইয়াৰ লগে লগে নিৰ্বাচন আয়োগে ৰাজহুৱা জাননী জাৰি কৰি ১৬ বছৰ বয়সৰ সকলো যুৱক-যুৱতীক ভোটাৰ তালিকাত নামভৰ্তি কৰিবলৈ আহ্বান জনায়। অধিসূচনাখনত উল্লেখ কৰা হৈছে যে ১৬ নৱেম্বৰলৈকে ১৬ বছৰ আৰু তাতকৈ অধিক বয়সৰ যুৱক-যুৱতীসকলে পুৱা ৮ বজাৰ পৰা বিয়লি ৬ বজাৰ ভিতৰত নিজৰ স্থানীয় নিৰ্বাচনী কাৰ্যালয়লৈ গৈ নিজৰ ভোটাৰক পঞ্জীয়ন কৰিব পাৰিব।

নিৰ্বাচন আয়োগে নিজৰ ৱেবছাইটৰ জৰিয়তে প্ৰি-ৰেজিষ্ট্ৰেচনৰ লগতে বায়’মেট্ৰিক্স আৰু ফটোৰ বাবে স্থানীয় নিৰ্বাচনী কাৰ্যালয় বা জিলা প্ৰশাসনৰ কাৰ্যালয়লৈ যাবলৈ অনুৰোধ জনাইছে।

জেন জি প্ৰতিবাদৰ পিছৰে পৰা যুৱক-যুৱতীসকলে ১৬ বছৰ বয়সলৈকে সকলোকে ভোটাধিকাৰ দিবলৈ দাবী জনাই আহিছে। বৰ্তমান বিশ্বৰ মাত্ৰ ১০খন দেশত ভোটদানৰ বয়স ১৬ বছৰ, য’ত ব্ৰাজিল, আৰ্জেণ্টিনা, অষ্ট্ৰিয়া, কিউবা, মাল্টা, ইকুৱেডৰ, নিকাৰাগুয়া আদিও আছে।

हिन्दुस्थान समाचार / অৰৱিন্দ