নতুন দিল্লী, ২৫ ছেপ্টেম্বৰ (হি.স.)। ইথানলৰ দৰে জৈৱ ইন্ধন উৎপাদন কৰা কোম্পানী ট্ৰুঅল্ট বায়’এনাৰ্জীৰ আই পি অ’ আজি চাবস্ক্ৰিপচনৰ বাবে মুকলি কৰা হয়। ২৯ ছেপ্টেম্বৰলৈকে নিবিদা দিব পাৰিব। আই পি অ’ত ৭৫০ কোটি ₹ৰ ১৫.১ মিলিয়ন নতুন শ্বেয়াৰ জাৰি কৰা হৈছে। ইয়াৰ উপৰিও অফাৰ ফৰ চেল উইণ্ড’ৰ জৰিয়তে ₹৮৯.৮৮ কোটি মূল্যৰ ১৮ লাখ শ্বেয়াৰ বিক্ৰী কৰা হৈছে। ইছ্যু বন্ধ হোৱাৰ পিছত ৩০ ছেপ্টেম্বৰত শ্বেয়াৰ আবণ্টন হ’ব। ৩ অক্টোবৰত কোম্পানীটোৰ শ্বেয়াৰ বিএছই আৰু এনএছইত তালিকাভুক্ত হ’ব।
আই পি অ’ত নিবিদাৰ বাবে মূল্যৰ বেণ্ড প্ৰতি শ্বেয়াৰত ৪৭২ৰ পৰা ৪৯৬ ₹লৈ নিৰ্ধাৰণ কৰা হৈছে। খুচুৰা বিনিয়োগকাৰীয়ে ট্ৰুঅল্ট বায়’এনাৰ্জীৰ আই পি অ’ত নূন্যতম ৩০টা শ্বেয়াৰৰ বাবে নিবিদা দিব পাৰিব, যাৰ বাবে তেওঁলোকে ১৪,৮৮০ ₹ বিনিয়োগ কৰিব লাগিব। বুধবাৰে আই পি অ’ মুকলি হোৱাৰ এদিন পূৰ্বে ট্ৰুঅল্ট বায়’এনাৰ্জীয়ে এংকৰ বিনিয়োগকাৰীৰ পৰা ২৫২ কোটি টকা সংগ্ৰহ কৰে। এই এংকৰ বিনিয়োগকাৰীসকলৰ ভিতৰত আছে টাটা মিউচুৱেল ফাণ্ড, এইচডিএফচি মিউচুৱেল ফাণ্ড, বন্ধন মিউচুৱেল ফাণ্ড, এছবিআই জেনেৰেল ইনশ্বুৰেন্স কোম্পানী, ছ’চাইটি জেনেৰেল, আৰু চিটিগ্ৰুপ গ্ল’বেল মাৰ্কেটছ মৰিচাছ।
আই পি অ’ত যোগ্য প্ৰতিষ্ঠানিক ক্ৰেতা (কিউ আই বি)ৰ বাবে ৫০% সংৰক্ষণ আছে। আৰু ৩৫% খুচুৰা বিনিয়োগকাৰীৰ বাবে আৰু ১৫% অপ্ৰতিষ্ঠানিক বিনিয়োগকাৰী (এন আই আই)ৰ বাবে সংৰক্ষিত। এই বিষয়টোৰ বাবে ডি এ এম কেপিটেল এডভাইজাৰ্ছ আৰু এছ বি আই কেপিটেল মাৰ্কেটছক বুক ৰানিং লিড মেনেজাৰ হিচাপে নিযুক্তি দিয়া হৈছে। বিগশ্বেয়াৰ চাৰ্ভিচেছ প্ৰাইভেট লিমিটেডক পঞ্জীয়ক হিচাপে নিযুক্তি দিয়া হৈছে।
কোম্পানীটোৰ বিত্তীয় অৱস্থাৰ সন্দৰ্ভত প্ৰস্পেক্টচত দাবী কৰা হৈছে যে ২০২৩-২৪ বিত্তীয় বৰ্ষত ১,২৮০.১৯ কোটি টকাৰ তুলনাত ২০২৪-২৫ বিত্তীয় বৰ্ষত কোম্পানীটোৰ ৰাজহ ৫৪ শতাংশ বৃদ্ধি পাই ১,৯৬৮.৫৩ কোটি টকা হৈছে। একেদৰে কোম্পানীটোৰ নিকা লাভ ২০২৩-২৪ বিত্তীয় বৰ্ষত ৩১.৮১ কোটি ₹ৰ পৰা ২০২৪-২৫ বিত্তীয় বৰ্ষত ৩৬১ শতাংশ বৃদ্ধি পাই ১৪৬.৬৪ কোটি টকা হৈছে। একেদৰে ২০২৪-২৫ বিত্তীয় বৰ্ষত ইবিআইটিডিএ (সুত, কৰ, মূল্য হ্ৰাস আৰু ক্ষয়সাধনৰ পূৰ্বে আয়) আছিল ৩০৯.১৪ কোটি, যিটো ২০২৩-২৪ বিত্তীয় বৰ্ষত ১৮৮.০৯ কোটি আছিল। কোম্পানীটোৰ মুঠ ঋণ হ্ৰাস পাইছে। ২০২৩-২৪ বিত্তীয় বৰ্ষৰ শেষত কোম্পানীটোৰ ঋণ আছিল ১৬৮৪.৬৮ কোটি টকা, যিটো ২০২৪-২৫ বিত্তীয় বৰ্ষত ১,৫৪৯.৬৮ কোটি টকালৈ হ্ৰাস পাইছে।
हिन्दुस्थान समाचार / মনোজ কুমাৰ শইকীয়া
26 Sep 2025
