নিউয়ৰ্ক, ২৫ ছেপ্টেম্বৰ (হি.স.)। পেলেষ্টাইনৰ ৰাষ্ট্ৰপতি মেহমুদ আব্বাছে ভিডিঅ’ লিংকৰ জৰিয়তে ৰাষ্ট্ৰসংঘৰ সাধাৰণ পৰিষদত ভাষণ দি ইজৰাইলে গাজাত মানৱতাৰ বিৰুদ্ধে অপৰাধ সংঘটিত কৰাৰ অভিযোগ উত্থাপন কৰে। তেওঁ কয় যে ইজৰাইলে সমগ্ৰ পেলেষ্টাইন সম্প্ৰদায়ৰ ওপৰত ঘেৰাও জাপি দিছে, যিটো কেৱল আগ্ৰাসনই নহয়, যুদ্ধাপৰাধ আৰু মানৱতাৰ বিৰুদ্ধে অপৰাধো।

আব্বাছে তাৎক্ষণিক যুদ্ধবিৰতি, মানৱীয় সাহায্যৰ নিৰৱচ্ছিন্ন যোগান আৰু পেলেষ্টাইনৰ ভূমি আৰু সম্পত্তি জব্দ কৰাৰ অন্ত পেলোৱাৰ আহ্বান জনায়। তেওঁ কয় যে ন্যায় অবিহনে শান্তি সম্ভৱ নহয়, আৰু পেলেষ্টাইনৰ স্বাধীনতা অবিহনে ন্যায় অসম্পূৰ্ণ।

আব্বাছে কয় যে ইজৰাইলে পশ্চিম পাৰত অবৈধ বসতিস্থলসমূহো নিৰন্তৰভাৱে সম্প্ৰসাৰণ কৰি আছে আৰু ধৰ্মীয় স্থানসমূহক লক্ষ্য কৰি লৈছে। আনকি আন্তঃৰাষ্ট্ৰীয় আইন অৱমাননা কৰি মছজিদ আৰু গীৰ্জাও ধ্বংস কৰা হৈছে বুলিও তেওঁ কয়।

ভাষণৰ সময়ত তেওঁ ২০২৩ চনৰ ৭ অক্টোবৰত হামাছৰ হিংসাত্মক কাৰ্যকলাপক গৰিহণা দি স্পষ্ট কৰি দিয়ে যে হামাছে পেলেষ্টাইনী জনসাধাৰণক প্ৰতিনিধিত্ব নকৰে আৰু ভৱিষ্যতৰ শাসন ব্যৱস্থাত ইয়াৰ কোনো ভূমিকা নাথাকিব। আব্বাছে কয় যে গাজা ষ্ট্ৰিপ পেলেষ্টাইনৰ এক অবিচ্ছেদ্য অংগ, কিন্তু “আমি সশস্ত্ৰ ৰাষ্ট্ৰ নিবিচাৰো।”

তেওঁৰ ভাষণত আব্বাছে স্মৰণ কৰে যে ১৯৯৩ চনৰ অছলো চুক্তিৰ জৰিয়তে পেলেষ্টাইনে ইজৰাইলক স্বীকৃতি দিছিল আৰু শান্তি আৰু নিৰাপত্তাৰ ক্ষেত্ৰত সহাৱস্থানৰ দিশত কাম কৰিছিল যদিও ইজৰাইলে চুক্তিসমূহ মানি চলা নাছিল।

যিবোৰ দেশে পেলেষ্টাইনক স্বীকৃতি দিছে বা স্বীকৃতি দিয়াৰ কথা ঘোষণা কৰিছে, সেইবোৰ দেশৰ প্ৰতি তেওঁ কৃতজ্ঞতা প্ৰকাশ কৰে। তেওঁ লগতে কয় যে পেলেষ্টাইনৰ সৈতে সংহতিক ইহুদী বিৰোধীতাৰ সমানতা কৰাটো ভুল।

২০ মিনিটৰ ভাষণৰ সামৰণিত তেওঁ কয় যে সংগ্ৰামৰ মাজতো পেলেষ্টাইন জনসাধাৰণে অটল হৈ থাকিব। তেওঁ কয়, আমাৰ শিপাবোৰ জলফাই গছৰ দৰে গভীৰ আৰু আমাৰ ইচ্ছাশক্তি শিলৰ দৰে অটল। এদিন স্বাধীনতাৰ সূৰ্য্য উদয় হ'ব, আৰু আকাশত উৰি থাকিব পেলেষ্টাইনৰ পতাকা।

हिन्दुस्थान समाचार