নতুন দিল্লী, ২৫ ছেপ্টেম্বৰ (হি.স.)। এফ আই এইচ জুনিয়ৰ মহিলা হকী বিশ্বকাপ ২০২৫ (চিলিৰ ছান্টিয়াগো)ৰ প্ৰস্তুতিৰ বাবে অষ্ট্ৰেলিয়াত উপস্থিত হৈছে ভাৰতীয় জুনিয়ৰ মহিলা হকী দল। এই ভ্ৰমণৰ সময়ছোৱাত ভাৰতীয় দলটোৱে মুঠ পাঁচখন খেল খেলিব। এই মেচসমূহ ২৬ ছেপ্টেম্বৰৰ পৰা ২ অক্টোবৰলৈকে কেনবেৰাৰ নেশ্যনেল হকী চেণ্টাৰত অনুষ্ঠিত হ’ব।
প্ৰথম তিনিখন মেচ ২৬, ২৭ আৰু ২৯ ছেপ্টেম্বৰত অষ্ট্ৰেলিয়াৰ জুনিয়ৰ মহিলা দলৰ বিৰুদ্ধে হোৱাৰ বিপৰীতে বাকী দুখন মেচ ৩০ ছেপ্টেম্বৰ আৰু ২ অক্টোবৰত অষ্ট্ৰেলিয়াৰ প্ৰিমিয়াৰ হকী ৱান লীগত অংশগ্ৰহণ কৰা কেনবেৰা চিল ক্লাবৰ বিৰুদ্ধে অনুষ্ঠিত হ’ব।
দলটোৰ নেতৃত্বত আছে অধিনায়ক জ্যোতি সিঙ, আৰু এই ভ্ৰমণত দলটোক গাইড কৰিব প্ৰশিক্ষক তুষাৰ খাণ্ডেকাৰে। খাণ্ডেকাৰে কয় যে এই শৃংখলাটো দলটোৰ বাবে অতি গুৰুত্বপূৰ্ণ হ’ব কাৰণ ই খেলুৱৈসকলক আন্তঃৰাষ্ট্ৰীয় পৰিস্থিতিৰ অভিজ্ঞতা প্ৰদান কৰিব আৰু আগন্তুক বিশ্বকাপৰ পূৰ্বে তেওঁলোকৰ শক্তি আৰু দুৰ্বলতা চিনাক্ত কৰাত সহায় কৰিব।
ইয়াৰ পূৰ্বে জুন মাহত ইউৰোপ ভ্ৰমণ কৰিছিল ভাৰতীয় দলটোৱে বেলজিয়াম, অষ্ট্ৰেলিয়া আৰু নেদাৰলেণ্ডৰ বিৰুদ্ধে পাঁচখন মেচ খেলিছিল। সেই ভ্ৰমণৰ সময়ত ভাৰতে একেৰাহে তিনিবাৰকৈ বেলজিয়ামক পৰাস্ত কৰিছিল, অষ্ট্ৰেলিয়াকো পৰাস্ত কৰিছিল আৰু শ্বুটআউটত নেদাৰলেণ্ডৰ বিৰুদ্ধে ঘনিষ্ঠ মেচত পৰাস্ত হৈছিল।
প্ৰশিক্ষক তুষাৰ খাণ্ডেকাৰে কয়, ইউৰোপ ভ্ৰমণৰ পিছত আমি আমাৰ গাঁথনিগত খেল শৈলী আৰু ব্যক্তিগত কাৰিকৰী দক্ষতাৰ ওপৰত ব্যাপকভাৱে কাম কৰিছো। যোৱা তিনিমাহত দলটোৱে যথেষ্ট উন্নতি কৰিছে, আৰু আমি এই ভ্ৰমণত সেই প্ৰদৰ্শনৰ প্ৰতিলিপি কৰিব বিচাৰো। তেওঁ লগতে কয়, বেংগালুৰু শিবিৰত প্ৰস্তুতি ভাল হৈছে। আমাৰ লক্ষ্য হৈছে বিশ্বকাপৰ পূৰ্বে আমি অধিক কাম কৰিবলগীয়া ক্ষেত্ৰসমূহ চিনাক্ত কৰা আৰু প্ৰতিযোগিতামূলক পৰিস্থিতিত নিজকে পৰীক্ষা কৰা।
हिन्दुस्थान समाचार / মনোজ কুমাৰ শইকীয়া
