পেৰিছ, ২৫ ছেপ্টেম্বৰ (হি.স.)। ফ্ৰান্সৰ এখন আদালতে ২০০৭ চনৰ ৰাষ্ট্ৰপতি নিৰ্বাচনী প্ৰচাৰৰ বাবে লিবিয়াৰ পৰা অবৈধভাৱে ধন লাভ কৰাৰ অভিযোগত প্ৰাক্তন ৰাষ্ট্ৰপতি নিকোলাছ ছাৰ্কোজিক অপৰাধমূলক ষড়যন্ত্ৰৰ অভিযোগত দোষী সাব্যস্ত কৰিছে । কিন্তু দুৰ্নীতি আৰু অবৈধ পুঁজিকে ধৰি অন্যান্য অভিযোগৰ পৰা তেওঁক মুক্ত কৰা হয়। বৃহস্পতিবাৰে পেৰিছৰ ফৌজদাৰী আদালতে ৭০ বছৰীয়া ছাৰ্কোজিক দোষী সাব্যস্ত কৰাৰ সময়ত নিলম্বিত শাস্তি বা জৰিমনা বিহাৰ সম্ভাৱনা বিবেচনা কৰিছিল যদিও চূড়ান্ত শাস্তি পিছত ঘোষণা কৰা হ’ব। এই সিদ্ধান্তই পূৰ্বে দুৰ্নীতিৰ গোচৰত দোষী সাব্যস্ত হোৱা ছাৰ্কোজিৰ ৰাজনৈতিক কেৰিয়াৰত আন এক আঘাত।

বিচাৰ বিভাগে অভিযোগ কৰে যে ২০০৭ চনৰ ৰাষ্ট্ৰপতি নিৰ্বাচনৰ সময়ত ছাৰ্কোজিয়ে তেতিয়াৰ লিবিয়াৰ একনায়কত্ববাদী মুয়াম্মাৰ গাদ্দাফিৰ পৰা প্ৰায় ৫০ বিলিয়ন ইউৰোৰ অবৈধ সাহায্য লাভ কৰিছিল। নিৰ্বাচনৰ পুঁজিৰ বিনিময়ত লিবিয়াক ৰাজনৈতিক সহায়ৰ প্ৰতিশ্ৰুতি দি গাদ্দাফিৰ সৈতে ছাৰ্কোজিৰ ঘনিষ্ঠ সহযোগীসকলে গোপন চুক্তিত লিপ্ত হয়। অৱশ্যে ছাৰ্কোজিয়ে এই অভিযোগসমূহক ৰাজনৈতিক ষড়যন্ত্ৰ বুলি ধাৰাবাহিকভাৱে খাৰিজ কৰি আহিছে।

ইফালে আদালতৰ মুখ্য ন্যায়াধীশ নাথালি গুয়াৰিনোৱে ৰায়দান কৰি কয় যে ষড়যন্ত্ৰৰ পৰ্যাপ্ত প্ৰমাণ যদিও আন অভিযোগৰ সমৰ্থনত পৰ্যাপ্ত প্ৰমাণ নাই। ২০২৩ চনৰ পৰা চলি থকা এই বিচাৰত ছাৰ্কোজি আৰু আন কেইবাজনো সহযোগী জড়িত আছিল। ৰায়দানৰ পিছত ছাৰ্কোজিয়ে কোনো মন্তব্য নকৰাৰ বিপৰীতে তেওঁৰ অধিবক্তাই শাস্তিৰ বিৰুদ্ধে আপীল কৰাৰ পৰিকল্পনা ঘোষণা কৰে। এই সিদ্ধান্তই ফ্ৰান্সৰ ৰাজনৈতিক মহলত মিশ্ৰিত প্ৰতিক্ৰিয়া লাভ কৰিছিল। ৰাষ্ট্ৰপতি ইমানুৱেল মেক্ৰনৰ কাৰ্যালয়ে ইয়াক “ন্যায়িক প্ৰক্ৰিয়াৰ প্ৰতি সন্মান” বুলি অভিহিত কৰাৰ বিপৰীতে বিৰোধী দলসমূহে ছাৰ্কোজিৰ দোষী সাব্যস্ত হোৱাটোক পলমকৈ কৰা ব্যৱস্থা বুলি সমালোচনা কৰে। আদালতৰ এই সিদ্ধান্তই ছাৰ্কোজিৰ তৃতীয়টো বৃহৎ আইনী পৰাজয়। ২০২১ চনত দুৰ্নীতিৰ অপৰাধত তেওঁক তিনি বছৰৰ কাৰাদণ্ড (দুবছৰ নিলম্বিত) শাস্তি প্ৰদান কৰা হয় আৰু ২০২৩ চনত আন এটা গোচৰত দোষী সাব্যস্ত হয়।

हिन्दुस्थान समाचार / অৰৱিন্দ