নতুন দিল্লী, ২৫ ছেপ্টেম্বৰ (হি.স.)। বিদেশ সেৱা বা অন্য সংস্থালৈ ডেপুটেচনত পোষ্ট কৰা কেন্দ্ৰীয় চৰকাৰৰ কৰ্মচাৰীসকলেও নিৰ্ধাৰিত সময়সীমাৰ ভিতৰত নিজৰ পেঞ্চন বিকল্প ব্যৱহাৰ কৰি ইউনিফাইড পেঞ্চন আঁচনি (ইউপিএছ) বাছনি কৰিব লাগিব। এনে কৰ্মচাৰীয়ে ইউ পি এছত যোগদান কৰিবলৈ প্ৰ-পত্ৰ এ২ পূৰণ কৰিব লাগিব।

বৃহস্পতিবাৰে বিত্ত মন্ত্ৰালয়ে প্ৰকাশ কৰে যে ভাৰতীয় পেঞ্চন ফাণ্ড ৰেগুলেটৰী এণ্ড ডেভেলপমেণ্ট অথৰিটি (পিএফআৰডিএ)ৰ শেহতীয়া বিবৃতি অনুসৰি এনে কৰ্মচাৰীয়ে ইউপিএছত যোগদান কৰিবলৈ প্ৰ-পত্ৰ এ২ পূৰণ কৰিব লাগিব। আঁচনিখনত যোগদানৰ অন্তিম তাৰিখ ২০২৫ চনৰ ৩০ ছেপ্টেম্বৰ।এনে সকলো কৰ্মচাৰীয়ে যথাযথভাৱে সম্পূৰ্ণ কৰা প্ৰ-পত্ৰ এ২ তেওঁলোকৰ অভিভাৱক সংস্থাৰ নিজ নিজ ন’ডেল কাৰ্যালয়ত জমা দিব পাৰিব। ইয়াৰ পিছত ন’ডেল কাৰ্যালয়ে নিৰ্ধাৰিত পদ্ধতি অনুসৰি কেন্দ্ৰীয় অভিলেখ ৰখা সংস্থা (চি আৰ এ) ব্যৱস্থাৰ জৰিয়তে ইউনিফাইড পেঞ্চন আঁচনিলৈ বদলিৰ প্ৰক্ৰিয়া চলাব। কেন্দ্ৰীয় বিত্ত মন্ত্ৰালয়ে ২০২৫ চনৰ ২৪ জানুৱাৰীত ইউনিফাইড পেঞ্চন আঁচনিৰ বিষয়ে অৱগত কৰে।

মন্ত্ৰালয়ে উল্লেখ কৰিছে যে ২০২৫ চনৰ ১ এপ্ৰিলৰ পৰা ইউ পি এছ কাৰ্যকৰী কৰা হৈছিল।ইয়া কেন্দ্ৰীয় চৰকাৰৰ কৰ্মচাৰীৰ বাবে মুকলি। তেওঁলোকে ইউ পি এছৰ বাবে বাছনি কৰিবলৈ শাৰীৰিকভাৱে প্ৰ-পত্ৰ এ২ জমা দিব পাৰে। অৱশ্যে ৰাজ্য চৰকাৰসমূহেও নিজৰ কৰ্মচাৰীসকলৰ বাবে এই আঁচনিখন বাছি ল’ব পাৰে। এই আঁচনিখন ২০২৫ চনৰ ১ এপ্ৰিলত বা তাৰ পিছত কেন্দ্ৰীয় চৰকাৰী সেৱাত যোগদান কৰা নতুন কৰ্মচাৰীৰ ক্ষেত্ৰত প্ৰযোজ্য, আৰু ৰাষ্ট্ৰীয় পেঞ্চন আঁচনিৰ অধীনত বৰ্তমানৰ কেন্দ্ৰীয় চৰকাৰী কৰ্মচাৰীসকলক ইউনিফাইড পেঞ্চন আঁচনি বাছনি কৰাৰ বিকল্প প্ৰদান কৰা হৈছে।

हिन्दुस्थान समाचार / অৰৱিন্দ