কাছাৰ, ২৪ ছেপ্টেম্বৰ (হি.স.)। এক বৃহৎ অভিযানত কাছাৰ জিলাৰ আৰক্ষীয়ে ৯০ কোটি (প্ৰায় ১.৯ বিলিয়ন ডলাৰ) মূল্যৰ ড্ৰাগছ জব্দ কৰে। চুবুৰীয়া ৰাজ্যৰ পৰা অহা এখন বাহন আৰক্ষীয়ে আটক কৰি তিনি লাখ ইয়াবা টেবলেট উদ্ধাৰ কৰে।
এই অভিযানৰ সময়তে গ্ৰেপ্তাৰ কৰা হয় দুজন ড্ৰাগছ সৰবৰাহকাৰী। মুখ্যমন্ত্ৰী ড০ হিমন্ত বিশ্ব শৰ্মাই এই কাৰ্যক প্ৰশংসা কৰি কয় যে ড্ৰাগছ সৰবৰাহকাৰী এতিয়া জেলৰ সন্মুখীন হ’ব লাগিব। অসম আৰক্ষীয়ে বিগত কেইমাহমানৰ পৰা সমগ্ৰ ৰাজ্যতে ড্ৰাগছ সৰবৰাহৰ বিৰুদ্ধে অভিযান তীব্ৰতৰ কৰি তুলিছে।
আজি সন্ধিয়া কাছাৰ আৰক্ষী মুখ্য কাৰ্যালয়ত অনুষ্ঠিত সংবাদমেল সম্বোধন কৰি এছ এছ পি নোমল মহত্তই এই ঘোষণা কৰে। তেওঁ কয় যে কাছাৰ আৰক্ষীয়ে অবৈধভাৱে ড্ৰাগছ পৰিবহণৰ বিৰুদ্ধে বিশেষ অভিযান চলাই থকাৰ সময়তে ধোলাই আৰক্ষী থানাৰ অন্তৰ্গত ধোলাখাল সীমান্ত আউটপোষ্টৰ সন্মুখত এ এছ ০১ পি চি ৮৯৭৬ নম্বৰৰ এখন বলেৰ’ পিকআপ বাহন আটক কৰে। গাড়ীখনৰ পৰা গ্ৰেপ্তাৰ কৰা ড্ৰাগছ সৰবৰাহকাৰী কেইজন চেমুৱেল লুংডিম (২৭, মণিপুৰ) আৰু এণ্ডি কুকি (২৭, মণিপুৰ) বুলি জানিব পৰা গৈছে।
তালাচীৰ সময়ত গাড়ীখনৰ ভিতৰত বিশেষভাৱে ডিজাইন কৰা এটা গোপন বিভাগৰ পৰা ক’লা পলিইথাইলিনেৰে মেৰিয়াই থোৱা ৩০টা পেকেট উদ্ধাৰ কৰা হয়, য’ত মুঠ ৩ লাখ ইয়াবা টেবলেট আছিল। প্ৰাথমিক পৰীক্ষাত মেথামফেটামাইনৰ পজিটিভ ফলাফল পোৱা গৈছে। প্ৰাথমিক তদন্তত এই অবৈধ ড্ৰাগছ মণিপুৰৰ চুৰাচান্দপুৰ জিলাৰ পৰা উদ্ধাৰ হোৱা বুলি জানিব পৰা গৈছে। অধিক তদন্ত অব্যাহত আছে।
হিন্দুস্থান সমাচাৰ / আলোক চক্ৰৱৰ্তী
