ডাবলিন (আয়াৰলেণ্ড), ২৪ ছেপ্টেম্বৰ (হি.স.)। ডাবলিনত থকা ভাৰতীয় দূতাবাসৰ তত্ত্বাৱধানত অসমৰ বাবে উৎসৰ্গিত প্ৰথম সাংস্কৃতিক কাৰ্যসূচীয়ে মৰমলগা স্মৃতি এৰি থৈ গ’ল। সাংস্কৃতিক আৰু আধ্যাত্মিক বৈচিত্ৰ্যৰ ক্ষেত্ৰত ভাৰতৰ ঐক্য আৰু এক ভাৰত শ্ৰেষ্ঠ ভাৰতৰ মনোভাৱৰ দ্বাৰা অনুপ্ৰাণিত হৈ ভাৰতীয় দূতাবাসে আয়াৰলেণ্ডত প্ৰথমবাৰৰ বাবে অসম ৰাজ্যক উৎসৰ্গিত এক বিশেষ সাংস্কৃতিক সন্ধিয়াৰ আয়োজন কৰে। এই অনুষ্ঠানটো দূতাবাসৰ ৰাজ্যিক সাংস্কৃতিক কাৰ্যসূচী ধাৰাবাহিক পদক্ষেপৰ অংশ আছিল।

অনুষ্ঠানত পৰম্পৰাগত নৃত্য, অসমীয়া কবিতা আবৃত্তি, আৰু অসমৰ মনোমোহা বস্ত্ৰ আৰু শিল্প পৰম্পৰাৰ প্ৰদৰ্শনৰ লগতে অসমৰ চহকী ঐতিহাসিক, সাংস্কৃতিক, ৰান্ধনী, আৰু পৰ্যটন ঐতিহ্যৰ ওপৰত মাল্টিমিডিয়া উপস্থাপন কৰা হয়। দিগন্ত মালাকাৰ ডাঙৰীয়াৰ অধ্যক্ষতাত অসম এছ’চিয়েচন অৱ আয়াৰলেণ্ডৰ উৎসাহী সহযোগিতা আৰু অংশগ্ৰহণৰ বাবেই এই কাৰ্যসূচী সম্ভৱ হৈ উঠিছিল।

এই উপলক্ষে আয়াৰলেণ্ডত থকা ভাৰতীয় ৰাষ্ট্ৰদূত অখিলেশ মিশ্ৰই দূতাবাসৰ প্ৰথম অসম সন্দৰ্ভত বিশেষ উপস্থাপনৰ আয়োজন কৰি আনন্দ প্ৰকাশ কৰে। এই অনুষ্ঠানটো সম্ভৱ হৈ উঠিছিল আয়াৰলেণ্ডৰ তুলনামূলকভাৱে সৰু অথচ অত্যন্ত সজীৱ আৰু সক্ৰিয় অসমীয়া সমাজৰ শক্তিৰ বাবে (বৰ্তমান প্ৰায় ২০০ জন বুলি অনুমান কৰা হৈছে)।

তেওঁ জোৰ দি কয় যে ভাৰতৰ বিভিন্ন ৰাজ্যৰ নিজস্ব ভাষিক, সাংস্কৃতিক, আৰু প্ৰাকৃতিক আকৰ্ষণৰ লগতে কলা-কৃষ্টিৰ ঐতিহ্যও আছে। সকলো ভাৰতীয়ই ভাৰতৰ অন্য প্ৰান্তত বসবাস কৰা ভাই-ভনীসকলৰ সাংস্কৃতিক সমৃদ্ধি আৰু সৃষ্টিশীল দক্ষতাৰ বিষয়ে জানিব লাগিব, পাৰস্পৰিক বিকাশৰ বাবে ইজনে সিজনৰ পৰা শিকিব লাগিব, আৰু ৰাষ্ট্ৰীয় আৰু আন্তঃৰাষ্ট্ৰীয় পৰ্যায়ত ইজনে সিজনৰ প্ৰগতি আৰু উন্নতিত সহযোগিতা কৰিব লাগিব।

তেওঁ স্মৰণ কৰি কয় যে দূতাবাসৰ ৰাজ্যিক সাংস্কৃতিক কাৰ্যসূচী শৃংখলাৰ (যাৰ অধীনত এতিয়ালৈকে ১৬খন ৰাজ্যৰ বাবে উৎসৰ্গিত কাৰ্যসূচী অনুষ্ঠিত হৈছে) মূল উদ্দেশ্য হৈছে আয়াৰলেণ্ডৰ ভাৰতীয় প্ৰব্ৰজনকাৰীসকলৰ লগতে আইৰিছ জনসাধাৰণে ভাৰতৰ অবিশ্বাস্য বৈচিত্ৰ্যৰ ভিতৰত বিদ্যমান ঐক্যৰ অভিজ্ঞতা লাভ কৰিবলৈ সক্ষম কৰা।

हिन्दुस्थान समाचार / Manoj Kumar Saikia