পঞ্চকুলা, ০৬ ডিচেম্বৰ (হি.স.)। ভাৰত আন্তঃৰাষ্ট্ৰীয় বিজ্ঞান মহোৎসৱ ২০২৫ (আইআইএছএফ-২০২৫)ৰ প্ৰথম দিন শনিবাৰে ভাৰতীয় মহাকাশচাৰী শুভাংশু শুক্লাই মহাকাশৰ অভিজ্ঞতা ব্যক্ত কৰে। পঞ্চকুলাত অনুষ্ঠিত মহোৎসৱৰ প্ৰথম অধিবেশনত শুক্লাই ছাত্ৰ-ছাত্ৰী আৰু যুৱ বিজ্ঞানীসকলৰ সৈতে মত বিনিময় কৰে, মহাকাশৰ অভিজ্ঞতাসমূহ সহজ আৰু আকৰ্ষণীয়ভাৱে শ্বেয়াৰ কৰে।
আন্তঃৰাষ্ট্ৰীয় মহাকাশ কেন্দ্ৰত নিজৰ অভিযান সম্পূৰ্ণ কৰা শুভাংশু শুক্লাই মহাকাশত জীৱন কেনেকুৱা হয়— কেনেকৈ তেওঁ ওজনহীনতাৰ মাজত ঘূৰি ফুৰিব লাগে, খাব লাগে, পান কৰিব লাগে, শুব লাগে, দৈনন্দিন কাম-কাজ কৰিব লাগে সেই বিষয়ে বৰ্ণনা কৰিছিল। তেওঁ কয় যে মহাকাশত সকলো ওপঙি থাকে— পানীৰ সৰু সৰু টোপাল, খাদ্যৰ পেকেট, আনকি তেওঁৰ নিজৰ শৰীৰো। তেওঁ শিশুসকলক কয় যে মহাকাশত শুবলৈ বিশেষ টোপনিৰ সজুলি ব্যৱহাৰ কৰা হয় আৰু বৈজ্ঞানিক পৰীক্ষাসমূহ কঠোৰ অনুশাসনৰ সৈতে আৰু নিৰ্দিষ্ট সময়সূচী অনুসৰি কৰা হয়।
অধিবেশনৰ সময়ত শিশুসকলে তেওঁক বহু প্ৰশ্ন কৰিছিল—যেনে মহাকাশত খাদ্য কেনেকুৱা, দিন আৰু ৰাতি কেনেকুৱা আৰু মাইক্ৰ’গ্ৰেভিটিত শৰীৰে কেনে প্ৰতিক্ৰিয়া কৰে। শুভাংশুৱে প্ৰেৰণাদায়ক ৰূপত সকলো প্ৰশ্নৰ উত্তৰ দিয়ে। বৃহৎ সংখ্যক ছাত্ৰ-ছাত্ৰী আৰু গৱেষকে আই আই এছ এফত অংশগ্ৰহণ কৰে। অনাগত দিনত এই উৎসৱে অসংখ্য বৈজ্ঞানিক প্ৰদৰ্শনী, কৰ্মশালা, যুৱ সংলাপ আৰু উদ্ভাৱন প্ৰদৰ্শনৰ মঞ্চ হিচাপে কাম কৰিব। পঞ্চকুলাত অনুষ্ঠিত এই বিজ্ঞান মহোৎসৱৰ উদ্দেশ্য হৈছে বিজ্ঞানক জনসাধাৰণৰ মাজলৈ লৈ যোৱা, যুৱক-যুৱতীসকলৰ মাজত বৈজ্ঞানিক দৃষ্টিভংগী গঢ়ি তোলা, ভাৰতৰ বৈজ্ঞানিক সাফল্যক ব্যাপক পৰিসৰত প্ৰদৰ্শন কৰা।
हिन्दुस्थान समाचार / অৰৱিন্দ
