ধেমাজী, ০৬ ডিচেম্বৰ (হি.স.)। ভাৰতীয় খাদ্য নিগম(এফচিআই)ৰ ধেমাজিৰ গুদামৰ পৰা ২৬৮০০ বস্তা সুলভ মূল্যৰ চাউল হৰলুকি হোৱাৰ বাতৰি সংবাদ মাধ্যমত সম্প্ৰচাৰিত হোৱাৰ পিছত ধেমাজিত হাহাকাৰ ৷ ধেমাজিৰ ভাৰতীয় খাদ্য নিগম ৰ গুদাম গৃহৰ সন্মুখত উত্তাল প্ৰতিবাদ জাতীয়তাবাদী যুৱ পৰিষদ আৰু কৃষক মুক্তিৰদ ৷

সুলভ মূল্যৰ চাউল হাজাৰ হাজাৰ বস্তা চাউল হৰলুকিৰ চিবিআই ৰ তদন্তৰ দাবীত ভাৰতীয় খাদ্য নিগমৰ প্ৰতিকৃতি দাহ কৰি উত্তাল প্ৰতিবাদ ৷ ইতিমধ্যে ভাৰতীয় খাদ্য নিগম ৰ ধেমাজি গুদামৰ পাঁচজন বিষয়া কৰ্মচাৰীক নিলম্বন কৰা হৈছে ৷ প্ৰতিবাদী সকলৰ দাবী ভাৰতীয় খাদ্য নিগম ৰ লখিমপুৰ সংমণ্ডলৰ সকলো গোদামৰ নিৰপেক্ষ তদন্ত হ’ব লাগে ৷ ভাৰতীয় খাদ্য নিগম ৰ গুদামৰ পৰা সুলভ মূল্যৰ চাউলৰ হৰলুকিৰ সৈতে জড়িত বিভাগৰ আন সকলকো তদন্তৰ আওঁতালে অনাৰ দাবী কৰি প্ৰতিবাদীসকলে সুলভ মূল্যৰ চাউল চুৰিৰ লগত জড়িত ভাৰতীয় খাদ্য নিগম ৰ বাহিৰৰ ব্যক্তি সকলকো নিৰপেক্ষ তদন্তৰ কৰি গ্ৰেপ্তাৰ কৰাৰ দাবী কৰে ৷

প্ৰতি মাহে ধেমাজি স্থিত ভাৰতীয় খাদ্য নিগম ৰ গুদামৰ পৰা ১২ খন সমবায় সমিতিলৈ প্ৰায় ২৪২০০ কুইন্টল চাউল নিয়া হয় ৷ ভাৰতীয় খাদ্য নিগম ৰ গুদামৰ পৰা চাউল হৰলুকিৰ পিছত এতিয়া প্ৰতিবাদৰ জোৱাৰ উঠিছে ৷

হিন্দুস্থান সমাচাৰ / প্ৰকাশ ডেকা