গুৱাহাটী, ০৫ ডিচেম্বৰ (হি.স.)। জনপ্ৰিয় কণ্ঠশিল্পী জুবিন গাৰ্গৰ মৃত্যুৰ তদন্ত কৰি থকা বিশেষ তদন্তকাৰী দলে অভিযোগনামা দাখিলৰ প্ৰক্ৰিয়া ক্ষিপ্ৰ কৰি তুলিছে। মুখ্যমন্ত্রী ড০ হিমন্ত বিশ্ব শর্মাৰ নির্দেশমর্মে এছ আই টিক ৬ ডিচেম্বৰৰ পৰা ১২ ডিচেম্বৰৰ ভিতৰত আদালতত অভিযোগনামা দাখিল কৰাৰ লক্ষ্য দিয়া হৈছে, যাতে আদালতে নিৰ্ধাৰণ কৰা ১৮ ডিচেম্বৰৰ সময়সীমাৰ পূৰ্বে দাখিল কৰিব পৰা যায় ৷
এছ আই টিৰ বিষয়াসকলে জনোৱা মতে, দলটোৱে দিনে নিশাই অক্লান্তভাৱে কাম কৰি চাৰ্জশ্বীট প্ৰস্তুত কৰি আহিছে। তদন্তকাৰী বিষয়া ৰ’জী কলিতাই পুৱা ৩ বজালৈকে চি আই ডিৰ মুখ্য কাৰ্যালয়ত থাকি তেওঁৰ ৯ জনীয়া দলৰ সৈতে প্ৰমাণ আৰু সাক্ষীৰ বক্তব্য সংগ্ৰহ কৰিছিল। এছ আই টিয়ে এতিয়ালৈকে প্ৰায় ৩৫০০ পৃষ্ঠাৰ নথি সংকলন কৰিছে, যিবোৰ মহাধিবক্তাৰ উপস্থিতিত পৰ্যালোচনা কৰা হৈছে।
উল্লেখযোগ্য যে এছ আই টিয়ে জুবিনৰ মৃত্যুক আকস্মিকভাৱে পানীত ডুব যোৱাতকৈ হত্যা বুলিহে গণ্য কৰিছে। জুবিন গাৰ্গৰ মৃত্যুৰ আঁৰত কোনো ষড়যন্ত্ৰ অথৱা গাফিলতিৰ হোৱা সন্দৰ্ভতো তদন্ত অব্যাহত ৰাখিছে দলটোৱে।
ছিংগাপুৰত ১৯ ছেপ্টেম্বৰত অনুষ্ঠিত উত্তৰ-পূৱ ভাৰত মহোৎসৱৰ সময়ত তেওঁৰ মৃত্যুৱে অসমক স্তম্ভিত কৰি তুলিছিল, যাৰ ফলত ৰাজ্যজুৰি ৬০টাৰো অধিক এফআইআৰ পঞ্জীয়ন হৈছিল।
অভিযোগনামাত বৰ্তমান ন্যায়িক জিম্মাত থকা সাতজন অভিযুক্তৰ বিৰুদ্ধে অভিযোগ উত্থাপন কৰা হ’ব—উৎসৱৰ আয়োজক শ্যামকানু মহন্ত, মেনেজাৰ সিদ্ধাৰ্থ শৰ্মা, সম্পৰ্কীয় ভাতৃ তথা ডিএছপি সন্দিপন গাৰ্গ, বাদ্য সংযোজক শেখৰজ্যোতি গোস্বামী, সহ-গায়ক অমৃত প্ৰভা মহন্ত আৰু দুজন দেহৰক্ষী পৰেশ বৈশ্য আৰু নন্দেশ্বৰ বৰা।
অভিযোগকাৰী আৰু গাৰ্গৰ পত্নী গৰিমা গাৰ্গকে ধৰি প্ৰায় ৩০০ লোকৰ বিবৃতি সংগ্ৰহ কৰি আছে এছ আই টিয়ে। তদুপৰি ছিংগাপুৰ আৰক্ষী আৰু চিকিৎসা বিষয়াৰ প্ৰতিবেদন, অসমৰ চিকিৎসকৰ মতামত আৰু ফৰেনছিক প্ৰমাণো এই নথিখনৰ অংশ হ’ব। ছিংগাপুৰ আৰক্ষীৰ প্ৰাৰম্ভিক তদন্তত সন্দেহজনক পৰিস্থিতিৰ সন্ধান পোৱা নগ’ল যদিও ভাৰতীয় তদন্তকাৰী সংস্থাসমূহে কেইবাটাও বিষয়ত পৃথক দৃষ্টিভংগী গ্ৰহণ কৰিছে।
তদন্তত আৰ্থিক অনিয়মৰ ইংগিতো পোহৰলৈ আহিছে। গাৰ্গৰ পি এছ অ’ৰ একাউণ্টত ১.১ কোটিতকৈ অধিক মূল্যৰ লেনদেন পোৱা গৈছে, যাৰ বাবে এই দিশটোও এছ আই টিয়ে তীক্ষ্ণ তদন্ত কৰি আছে।
ভাৰতীয় দণ্ডবিধিৰ ২০৮ ধাৰাৰ অধীনত নৱেম্বৰ মাহত কেন্দ্ৰীয় গৃহ মন্ত্ৰালয়ে অনুমতি প্ৰদান কৰাৰ পিছতে এই আইনী প্ৰক্ৰিয়া আগবাঢ়িছে। গৌহাটী উচ্চ ন্যায়ালয়ৰ মুখ্য ন্যায়াধীশক এই গোচৰৰ ক্ষিপ্ৰতাৰে এখন ফাষ্ট ট্ৰেক আদালত গঠন কৰিবলৈ অনুৰোধ জনাইছে মুখ্যমন্ত্ৰী শৰ্মাই।
জুবিন গাৰ্গক অসমৰ সাংস্কৃতিক প্ৰতীক হিচাপে গণ্য কৰা হয়, আৰু তেওঁৰ মৃত্যুৱে ৰাজ্যখনত গভীৰ আৱেগিক প্ৰভাৱ পেলাইছে। তদন্তকাৰী দলটোৱে এতিয়া অভিযোগনামা চূড়ান্ত কৰাৰ কামত ব্যস্ত হৈ পৰিছে।
हिन्दुस्थान समाचार / অৰৱিন্দ