নতুন দিল্লী, ০৪ ডিচেম্বৰ (হি.স.)। ৰাছিয়াৰ ৰাষ্ট্ৰপতি ভ্লাদিমিৰ পুটিন ২৩ সংখ্যক ভাৰত-ৰাছিয়া সন্মিলনত অংশগ্ৰহণ কৰিবলৈ আজি সন্ধিয়া ইয়াত উপস্থিত হয়। প্ৰধানমন্ত্ৰী নৰেন্দ্ৰ মোদীয়ে ব্যক্তিগতভাৱে বিমানবন্দৰত তেওঁক উষ্ম আদৰণি জনায়।
প্ৰধানমন্ত্ৰী মোডী প্ৰায় ৬:৪৫ বজাত পালম বায়ুসেনা ষ্টেচনত উপস্থিত হয় । সন্ধিয়া প্ৰায় ৭ বজাত অৱতৰণ কৰে পুটিনৰ বিমান। সন্ধিয়া প্ৰায় ৭:২০ বজাত নামিল পুটিন। দুয়োগৰাকী নেতাই উষ্মভাৱে হাত মিলাই তাৰ পিছত আলিংগন কৰিলে। ভাৰতত ৰাছিয়াৰ ৰাষ্ট্ৰদূত ডেনিছ আলিপভ, ৰাছিয়াত থকা ভাৰতৰ ৰাষ্ট্ৰদূত বিনয় কুমাৰ আৰু দুয়োখন দেশৰ জ্যেষ্ঠ কূটনৈতিক আৰু সামৰিক বিষয়াসকল বিমানবন্দৰত উপস্থিত থাকে। সকলোৰে লগত পুটিনে কৰমৰ্দন কৰে। ইয়াৰ পিছতে তেওঁ মোডীৰ সৈতে ভাৰতীয় শিল্পীৰ দল এটাৰ আদৰণি নৃত্য উপভোগ কৰে।
ইয়াৰ পিছতে দুয়োগৰাকী নেতাই বিশেষভাৱে প্ৰস্তুত কৰা এখন গাড়ীত উঠি ৭ নং প্ৰধানমন্ত্ৰীৰ বাসগৃহ লোক কল্যাণ মাৰ্গলৈ ৰাওনা হয়, য’ত তেওঁলোকে ব্যক্তিগত আলোচনাত মিলিত হ’ব। মোদীয়ে পুটিনৰ সন্মানত ব্যক্তিগতভাৱে নিশাৰ আহাৰৰো আয়োজন কৰিছে।
ইফালে কাইলৈ পুৱা ১১:৫০ বজাত হায়দৰাবাদ হাউচত অনুষ্ঠিত হ’ব ২৩ সংখ্যক ভাৰত-ৰাছিয়া সন্মিলন। দুয়োগৰাকী নেতাই ভাৰত-ৰাছিয়া ব্যৱসায়িক মঞ্চতো ভাষণ দিব। কাইলৈ নিশা ৰাষ্ট্ৰপতি দ্ৰৌপদী মুৰ্মুৰ দ্বাৰা আয়োজিত ৰাজকীয় ভোজত অংশগ্ৰহণ কৰি পুটিন স্বদেশলৈ উভতি যাব।
हिन्दुस्थान समाचार / অৰৱিন্দ
