ভাৰত-ৰাছিয়া ব্যৱসায়িক মঞ্চৰ বৈঠকত সম্বোধন কেন্দ্ৰীয় মন্ত্ৰীৰ
নতুন দিল্লী, ০৪ ডিচেম্বৰ (হি.স.)। কেন্দ্ৰীয় বাণিজ্য আৰু উদ্যোগ মন্ত্ৰী পিয়ুষ গোৱেলে বৃহস্পতিবাৰে কয় যে ভাৰত আৰু ৰাছিয়াৰ মাজত দ্বিপাক্ষিক বাণিজ্য বৃদ্ধি আৰু ইয়াক অধিক সুষম কৰি তোলাৰ দিশত কাম কৰাৰ বিশাল সুযোগ আছে।
নতুন দিল্লীৰ ভাৰত মণ্ডপমত ভাৰতীয় বাণিজ্য আৰু উদ্যোগ ফেডাৰেচনৰ উদ্যোগত অনুষ্ঠিত ভাৰত-ৰাছিয়া ব্যৱসায়িক মঞ্চৰ বৈঠকত কেন্দ্ৰীয় বাণিজ্য আৰু উদ্যোগ মন্ত্ৰীগৰাকীয়ে ভাষণ প্ৰদান কৰে। কেন্দ্ৰীয় মন্ত্ৰীগৰাকীয়ে কয় যে দ্বিপাক্ষিক বাণিজ্যই ৭০ বিলিয়ন মাৰ্কিন ডলাৰত উপনীত হৈছে, কিন্তু আমি আৰামত বহি থাকিব নোৱাৰো; আমি আগবাঢ়িব লাগিব আৰু ভাৰসাম্য বিচাৰিব লাগিব। তেওঁ কয় যে ভাৰতৰ পৰা ৰাছিয়ালৈ ৰপ্তানি বৃদ্ধিৰ সম্ভাৱনা থকা খণ্ডসমূহৰ ভিতৰত আছে গ্ৰাহক সামগ্ৰী, খাদ্য সামগ্ৰী, অটোম’বাইল, ট্ৰেক্টৰ, গধুৰ বাণিজ্যিক বাহন, ইলেক্ট্ৰনিকছ যেনে স্মাৰ্টফোন, উদ্যোগিক উপাদান, আৰু বস্ত্ৰ।
গোৱেলে কয় যে ভাৰত আৰু ৰাছিয়া সুখ-দুখৰ অংশীদাৰ। তেওঁ উল্লেখ কৰে যে উদ্যোগীকৰণ ভাৰতৰ ডি এন এত গভীৰভাৱে শিপাই আছে। ভাৰত বিশ্বৰ বাবে এক নিৰ্ভৰযোগ্য, বিশ্বাসযোগ্য, আৰু আগন্তুক চিন্তাধাৰাৰ অংশীদাৰ। তেওঁ উল্লেখ কৰে যে ভাৰত আৰু ৰাছিয়া দুয়োখন দেশে ২০৩০ চনৰ ভিতৰত দ্বিপাক্ষিক বাণিজ্যত ১০০ বিলিয়ন মাৰ্কিন ডলাৰৰ লক্ষ্য নিৰ্ধাৰণ কৰিছে।
কেন্দ্ৰীয় মন্ত্ৰীগৰাকীয়ে উল্লেখ কৰে যে ভাৰতে ৰাছিয়াক সেৱা খণ্ডতো উল্লেখযোগ্য সুযোগ আগবঢ়াব পাৰে। ভাৰত-ৰাছিয়া ব্যৱসায়িক মঞ্চত ৰাছিয়ান ফেডাৰেচনৰ ৰাষ্ট্ৰপতি কাৰ্যালয়ৰ উপ-মুখ্য কৰ্মচাৰী মেক্সিম অৰেচকিনে উল্লেখ কৰে যে ৰাছিয়াৰ আমদানিত ভাৰতৰ অংশ দুশতাংশতকৈও কম আৰু ইয়াক বৃদ্ধি কৰাৰ প্ৰয়োজন আছে। অৰেছকিনে কয় যে অধিক সুষম বাণিজ্যৰ বাবে ইয়াক আৰু অধিক বৃদ্ধি কৰাৰ প্ৰয়োজন। তেওঁ কয় যে ভাৰতে কৃষি, ঔষধ, দূৰসংযোগ সঁজুলি, উদ্যোগিক উপাদান, আৰু মানৱ সম্পদকে ধৰি ছটা মূল খণ্ডত যোগান বৃদ্ধি কৰিব পাৰে।
বাণিজ্য সচিব ৰাজেশ আগৰৱালাই ভাৰতীয় ব্যৱসায়ীসকলে ৰাছিয়ালৈ ৰপ্তানি বৃদ্ধি কৰিব পৰাকৈ পদ্ধতিসমূহ সৰল কৰাৰ প্ৰয়োজনীয়তাৰ ওপৰতো গুৰুত্ব আৰোপ কৰে। মন কৰিবলগীয়া যে ২০২৪-২৫ বিত্তীয় বৰ্ষত ৰাছিয়ালৈ ভাৰতৰ ৰপ্তানি মুঠ ৪.৯ বিলিয়ন মাৰ্কিন ডলাৰ হোৱাৰ বিপৰীতে আমদানি মুঠ ৬৩.৮ বিলিয়ন মাৰ্কিন ডলাৰ। ইয়াৰ ফলত প্ৰায় ৫৯ বিলিয়ন মাৰ্কিন ডলাৰৰ বাণিজ্যিক ঘাটিৰ সৃষ্টি হয়।
हिन्दुस्थान समाचार / অৰৱিন্দ
