কামৰূপ, ০৩ ডিচেম্বৰ (হি.স.)। ৰঙিয়াৰ ২৭ নং ৰাষ্ট্ৰীয় ঘাইপথৰ উদিয়ানাত সংঘটিত হৈছে এক ভয়ংকৰ পথ দুৰ্ঘটনা । দ্ৰুতবেগী হোণ্ডা এলিভেটৰ বাহনক মহতিয়ালে নলবাৰী অভিমুখী ট্ৰাকে । ইয়াৰ ফলত কথমপি প্ৰাণ ৰক্ষা পৰে কেইবাজনো লোকৰ । দুৰ্ঘটনাত চূৰ্ণ বিচূৰ্ণ হয় এএছ ০১ জিএইচ ২৪১৩ নম্বৰৰ হোণ্ডা এলিভেটৰ বাহন ।

ঘটনা বিৱৰণী অনুসৰি, নলবাৰীৰ অভিমুখী দ্ৰুতবেগী এএছ ০১ জিএইচ ২৪১৩ নম্বৰৰ হোণ্ডা এলিভেট বাহনখনে হঠাৎ ডিভাইডাৰ পাৰ হ'বলৈ লয় । যাৰ ফলত পিছপিনৰ পৰা ডব্লিউবি ৫৭ ডি ৭২৪৫ নম্বৰৰ বাহনখনে মহতিয়াই নিয়ে হোণ্ডা এলিভেট বাহনখনক । দুৰ্ঘটনাৰ লগে লগে এয়াৰ বেগে দ্ৰুতগতিত নিয়ন্ত্ৰণ কৰে ভিতৰৰ অংশ । ইফালে ডিভাইডাৰত ৰৈ থকা এগৰাকী পথচাৰী কোনোমতে ৰক্ষা পৰে দুৰ্ঘটনাটোৰ পৰা । দুৰ্ঘটনাৰ লগে লগে বাহনৰ পৰা জঁপিয়াই কোনোমতে ৰক্ষা পৰে মতিফ আলী নামৰ লোকজন । আনহাতে এই দুৰ্ঘটনাটো হোণ্ডা এলিভেট বাহনখনৰ চালকৰ ভুলৰ বাবে সংঘটিত হয় বুলি প্ৰত্যক্ষদৰ্শীয়ে জানিবলৈ দিয়ে ।

---------------

হিন্দুস্থান সমাচাৰ / Narayan Kar