~হৰমনপ্ৰীতে সুৰমা হকী ক্লাবৰ অধিনায়ক, আনহাতে হাৰ্দিকে এইচ আই এল গভৰ্নিং কাউন্সিল দলৰ হৈ খেলিব~

নতুন দিল্লী, ২৬ ডিচেম্বৰ (হি.স.)। ভাৰতীয় পুৰুষ হকী দলৰ তাৰকা খেলুৱৈ হৰমনপ্ৰীত সিং আৰু হাৰ্দিক সিঙে পুৰুষৰ হকী ইণ্ডিয়া লীগ (এইচ আই এল) ২০২৬ৰ প্ৰতি লক্ষ্য ৰাখিছে। দুয়ো খেলুৱৈয়ে ইয়াক আগন্তুক ব্যস্ত আন্তঃৰাষ্ট্ৰীয় কেলেণ্ডাৰৰ বাবে নিজৰ ফৰ্ম আৰু আত্মবিশ্বাস বৃদ্ধিৰ এক গুৰুত্বপূৰ্ণ মঞ্চ হিচাপে লয়—য’ত এফ আই এইচ প্ৰ’ লীগ, হকী বিশ্বকাপ ২০২৬, আৰু ২০২৬ এছিয়ান গেমছ অন্তৰ্ভুক্ত।

ভাৰতীয় দল আৰু সুৰমা হকী ক্লাবৰ অধিনায়ক হৰমনপ্ৰীত সিঙে কয় যে এইচ আই এল ২০২৫-২৬ ৰাষ্ট্ৰীয় দলৰ বাবে এক গুৰুত্বপূৰ্ণ সময়।

হৰমনপ্ৰীতে কয়, এইচআইএল ২০২৬ আমাৰ সকলো ভাৰতীয় খেলুৱৈৰ বাবে এক নিখুঁত সময়ত আহিছে। সুৰমা হকী ক্লাব হিচাপে আমি দুয়োটা মহলৰ আটাইতকৈ অনুশাসিত আৰু বিপজ্জনক দল হ'বলৈ চেষ্টা কৰিম। সকলো ফ্ৰেঞ্চাইজিৰ স্তৰ অতি উচ্চ, গতিকে প্ৰতিখন মেচেই আন্তঃৰাষ্ট্ৰীয় মেচৰ দৰে অনুভৱ হ'ব, যিটো প্ৰ' লীগ, বিশ্বকাপ আৰু এছিয়ান গেমছৰ পূৰ্বে আমাৰ বাবে অতি গুৰুত্বপূৰ্ণ।

তেওঁ লগতে কয় যে লীগৰ পৰিৱেশে জ্যেষ্ঠ খেলুৱৈ আৰু যুৱ খেলুৱৈ উভয়ৰে বিকাশত গুৰুত্বপূৰ্ণ ভূমিকা পালন কৰে।

তেওঁ লগতে কয়, ভাৰত আৰু সুৰমা দুয়োটা দলৰ অধিনায়ক হিচাপে মই এইচ আই এলক নেতৃত্বৰ দক্ষতা নিখুঁত কৰাৰ আৰু যুৱ খেলুৱৈসকলক ডাঙৰ মেচত অভিজ্ঞতা প্ৰদান কৰাৰ এক ডাঙৰ সুযোগ হিচাপে দেখিছো। যদি আমি ইয়াত কঠোৰ পৰিশ্ৰম, পেনাল্টি কৰ্ণাৰ ফলপ্ৰসূতা, আৰু শক্তিশালী ৰক্ষণশীল সংগঠনেৰে গতিশীলতা গঢ়ি তোলোঁ, তেন্তে ভৱিষ্যতে ভাৰতৰ হৈ খেলিলে ই আমাক প্ৰত্যক্ষভাৱে উপকৃত কৰিব। লক্ষ্য স্পষ্ট: এইচ আই এলত শক্তিশালী প্ৰদৰ্শন আৰু তাৰ পিছত দেশৰ বাবে পদক।

ভাৰতীয় দলৰ শক্তিশালী মিডফিল্ডাৰ হাৰ্দিক সিঙে এইচ আই এল ২০২৬ত এইচ আই এল গভৰ্নিং কাউন্সিলৰ দলৰ হৈ খেলিব।খেলুৱাসকলৰ বাবে ধাৰাবাহিকতা নিশ্চিত কৰিবলৈ ২০২৬ ছিজনৰ পূৰ্বে ইউ পি ৰুদ্ৰাছ ফ্ৰেঞ্চাইজিৰ পৰিচালনাৰ দায়িত্ব ল’লে দলটোৱে।

হাৰ্দিক সিঙে কয়, এই এইচ আই এল ছিজনটো মোৰ আৰু আমাৰ এইচ আই এল গভৰ্নিং কাউন্সিল দলৰ বাবে অত্যন্ত গুৰুত্বপূৰ্ণ। লীগে সদায় উচ্চ তীব্ৰতা আৰু চাপৰ সৈতে ভৰপূৰ মেচ প্ৰদান কৰে, যিবোৰ ডাঙৰ প্ৰতিযোগিতাৰ বাবে সৰ্বোত্তম প্ৰস্তুতি।

হাৰ্ডিকে আৰু কয় যে বিভিন্ন ফ্ৰেঞ্চাইজিৰ বৈচিত্ৰময় কৌশল আৰু খেলুৱৈৰ ভিত্তিই আন্তঃৰাষ্ট্ৰীয় পৰ্যায়ৰ বাবে প্ৰস্তুতি চলোৱাত সহায় কৰিব।

তেওঁ লগতে কয়, প্ৰতি সপ্তাহত আমি বিভিন্ন খেল শৈলী, শীৰ্ষ ড্ৰেগ-ফ্লিকাৰ, দ্ৰুত ফৰৱাৰ্ড, আৰু শক্তিশালী ডিফেন্সৰ সন্মুখীন হওঁ। যদি আমি ইয়াত আমাৰ পৰিকল্পনা সঠিকভাৱে কাৰ্যকৰী কৰি ধাৰাবাহিকতা বজাই ৰাখোঁ, তেন্তে সেই গতিবেগ প্ৰ' লীগ, বিশ্বকাপ, আৰু এছিয়ান গেমছলৈও কঢ়িয়াই নিব। ব্যক্তিগতভাৱে মই ডিফেন্স আৰু আক্ৰমণ দুয়োটাতে অধিক দায়িত্ব ল'ব বিচাৰো আৰু ভাৰতীয় দললৈ উভতি অহাৰ সময়ত সম্পূৰ্ণ ফিট হ'ব বিচাৰো।

এইচ আই এল ২০২৬ত মুঠ আঠটা ফ্ৰেঞ্চাইজিয়ে অংশগ্ৰহণ কৰিব—তামিলনাডু ড্ৰেগনছ, হায়দৰাবাদ হাৰিকনেছ, জে এছ ডব্লিউ সুৰমা হকী ক্লাব, ডিফেণ্ডিং চেম্পিয়ন শ্ৰচি ৰাধ বেংগল টাইগাৰ্ছ, বেদান্ত কলিংগা লেন্সাৰছ, ৰাঞ্চি ৰয়েলছ, এছ জি পাইপাৰ্ছ, আৰু এইচ আই এল গভৰ্নিং কাউন্সিল।

লীগখন একক ৰাউণ্ড ৰবিন ফৰ্মেটত অনুষ্ঠিত হ’ব, য’ত ২৩খন লীগ মেচৰ পিছত প্লে অফ অনুষ্ঠিত হ’ব। ২৩ জানুৱাৰীত কোৱালিফায়াৰ ১ আৰু এলিমিনেটৰ, ২৫ জানুৱাৰীত কোৱালিফায়াৰ ২, আৰু ২৬ জানুৱাৰীত ভুৱনেশ্বৰৰ কলিংগা ষ্টেডিয়ামত গ্ৰেণ্ড ফাইনেল অনুষ্ঠিত হ’ব। মুঠ ৩৩খন হাই প্ৰেচাৰ মেচ অনুষ্ঠিত হ’ব।

৩ জানুৱাৰীত চেন্নাইৰ মেয়ৰ ৰাধাকৃষ্ণন হকী ষ্টেডিয়ামত (৩–৯ জানুৱাৰী) আৰম্ভ হ’ব লীগ, তাৰ পিছত ৰাঁচী মৰাং গোমকে জয়পাল সিং এষ্ট্ৰ’টাৰ্ফত (১১–১৬ জানুৱাৰী) মেচ অনুষ্ঠিত হ’ব আৰু অৱশেষত ১৭–২৬ জানুৱাৰীত ভুৱনেশ্বৰৰ কলিংগা ষ্টেডিয়ামত সমাপ্ত হ’ব।

हिन्दुस्थान समाचार / অৰৱিন্দ