কাৰ্বি আংলং, ২৩ ডিচেম্বৰ (হি.স.)। বাংলাদেশী হিন্দু যুৱক দীপু চন্দ্ৰ দাসৰ নৃশংস হত্যাকাণ্ডক লৈ যোৱা কালি সোমবাৰে সন্ধিয়া কাৰ্বি আংলং উত্তাল হৈ পৰে । অন্তৱৰ্তীকালীন চৰকাৰৰ মুৰব্বী মহম্মদ ইউনিছৰ পুত্তলিকা দাহ কৰি প্ৰতিবাদ সাব্যস্ত কৰে। বাঙালী পৰিষদ অসম কাৰ্বি আংলং জিলা সমিতিয়ে এই প্ৰতিবাদ সাব্যস্ত কৰে।

দিপু দাসৰ ৰক্তই আমাক জগাইছে - হিন্দুৰ সুৰক্ষা এতিয়াই লাগে আদি দাবীৰে উত্তাল প্ৰতিবাদ কৰা হয় কাৰ্বি আংলং জিলাৰ উত্তৰ বৰবিলৰ কালিবাৰীত । মাননীয় গৃহমন্ত্ৰী মহোদয় বাংলাদেশৰ হিন্দুৰ সুৰক্ষা নিশ্চিত কৰক, হিন্দুৰ ওপৰত আক্ৰমণ - সমগ্ৰ মানৱতাৰ ওপৰত আক্ৰমণ, সনাতনি এক হওক, হিন্দুৰ বিৰুদ্ধে চলা অন্যায়ৰ বিৰুদ্ধে থিয় দিয়ক, দীপু দাসৰ নৃশংস হত্যাকাণ্ডৰ উচিত বিচাৰ লাগে আদি দাবীৰ শ্লো-গানেৰে উত্তৰ বৰবিলৰ কালিবাৰীৰ আকাশ বতাহ উত্তাল কৰি তোলে ।

বাংলাদেশৰ হিন্দু যুৱক দীপু চন্দ্ৰ দাসক নৃসংশভাৱে হত্যা কৰাৰ ঘটনাই সমগ্ৰ বিশ্বক জোকাৰি গৈছিল । ধৰ্মীয় মৌলবাদৰ নামত বাংলাদেশৰ হিন্দু জনগণৰ ওপৰত হৈ থকা বৰ্বৰ অত্যাচাৰৰ বিৰুদ্ধে কাৰ্বি আংলংৰ বাঙালী পৰিষদ অসম, কাৰ্বি আংলং জিলা সমিতিয়ে প্ৰতিবাদ সাব্যস্ত কৰে।

হিন্দুস্থান সমাচাৰ / কিশোৰ মিশ্ৰ