এডিলেইড, ১৮ ডিচেম্বৰ (হি.স.)। অষ্ট্ৰেলিয়াৰ প্ৰবীণ অফ স্পিনাৰ নাথান লায়নে টেষ্ট ক্ৰিকেটত আন এক ডাঙৰ মাইলৰ খুঁটি অৰ্জন কৰিছে। এডিলেইড অ’ভেলত চলি থকা এছেছ শৃংখলাৰ তৃতীয়খন টেষ্টৰ দ্বিতীয় দিনা লায়নে প্ৰাক্তন বেগী বলাৰ গ্লেন মেকগ্ৰাথক অতিক্ৰম কৰি টেষ্ট ইতিহাসৰ ষষ্ঠ সৰ্বাধিক উইকেট দখলকাৰী হিচাপে পৰিগণিত হয়।

এই কৃতিত্ব অৰ্জন কৰিবলৈ লায়নক দুটা উইকেটৰ প্ৰয়োজন হৈছিল আৰু ৩৮ বছৰীয়া অফ স্পিনাৰগৰাকীয়ে প্ৰথম অভাৰতে এই কৃতিত্ব অৰ্জন কৰিছিল। তেওঁ অভাৰৰ তৃতীয় বলত মিডউইকেটত জোছ ইংলিছৰ হাতত অলি পোপৰ কেচ ধৰা পৰিছিল। অভাৰৰ শেষৰ বলত ইংলেণ্ডৰ অ’পেনাৰ বেন ডাকেটৰ অফ ষ্টাম্প লায়নে উভালি পেলায়।

এই দুটা উইকেটৰ জৰিয়তে লায়নে নিজৰ টেষ্ট উইকেটৰ সংখ্যা ৫৬৪ লৈ বৃদ্ধি কৰি গ্লেন মেকগ্ৰাথৰ ৫৬৩ উইকেটৰ অভিলেখ অতিক্ৰম কৰে। বৰ্তমান সক্ৰিয় খেলুৱৈৰ ভিতৰত লিয়নে সৰ্বাধিক সফল টেষ্ট বলাৰ, তাৰ পিছতে আছে অষ্ট্ৰেলিয়াৰ মিচেল ষ্টাৰকে ৪২০ উইকেটৰে।

টেষ্ট ক্ৰিকেটত সৰ্বাধিক উইকেট লাভ কৰা শীৰ্ষ ১০ বলাৰ

১) মুথিয়া মুৰলিধৰণ (শ্ৰীলংকা) – ৮০০

২) শ্বেন ৱাৰ্ণ (অষ্ট্ৰেলিয়া) – ৭০৮

৩) জেমছ এণ্ডাৰছন (ইংলেণ্ড) – ৭০৪

৪) অনিল কুম্বলে (ভাৰত) – ৬১৯

৫) ষ্টুয়াৰ্ট ব্ৰড (ইংলেণ্ড) – ৬০৪

৬) নাথান লায়ন (অষ্ট্ৰেলিয়া) – ৫৬৪

৭) গ্লেন মেকগ্ৰাথ (অষ্ট্ৰেলিয়া) – ৫৬৩

৮) ৰবিচন্দ্ৰন অশ্বিন (ভাৰত) – ৫৩৭

৯) কৰ্টনী ৱালছ (ৱেষ্ট ইণ্ডিজ) – ৫১৯

১০) ডেল ষ্টেইন (দক্ষিণ আফ্ৰিকা) – ৪৩৯

हिन्दुस्थान समाचार / অৰৱিন্দ