নতুন দিল্লী, ১৭ ডিচেম্বৰ (হি.স.)। কেন্দ্ৰীয় যুৱ পৰিক্ৰমা আৰু ক্ৰীড়া মন্ত্ৰী ড° মনসুখ মাণ্ডবিয়াই বুধবাৰে ভাৰতীয় স্কোয়াছ দলটোক এক ঐতিহাসিক কৃতিত্ব অৰ্জন কৰাৰ বাবে সন্মানিত কৰে। যোৱা শনিবাৰে চেন্নাইত ভাৰতৰ প্ৰথমটো স্কোয়াছ বিশ্বকাপ খিতাপ দখল কৰি যোছনা চিনাপ্পা, অভয় সিং, ভেলাভান সেনথিলকুমাৰ, আৰু অনাহত সিঙৰ মিশ্ৰিত দলটোৱে ইতিহাস ৰচনা কৰে।

এই জয়েৰে ভাৰতৰ প্ৰথমটো স্কোয়াছ বিশ্বকাপ খিতাপ। ইয়াৰ পূৰ্বে ভাৰতৰ শ্ৰেষ্ঠ প্ৰদৰ্শন আছিল ২০২৩ সংস্কৰণত ব্ৰঞ্জৰ পদক। ফাইনেলত ভাৰতে শীৰ্ষ ছিড হংকঙক ৩-০ ব্যৱধানত পৰাস্ত কৰে। ইয়াৰ লগে লগে ভাৰতে স্কোয়াছ বিশ্বকাপ জয় কৰা চতুৰ্থখন দেশ হিচাপে পৰিগণিত হয়, যিটো কৃতিত্ব পূৰ্বে অষ্ট্ৰেলিয়া, ইংলেণ্ড, ইজিপ্তে লাভ কৰিছিল।

খেলুৱৈসকলক অভিনন্দন জনাই ড০ মাণ্ডভিয়াই ইয়াক “ভাৰতীয় ক্ৰীড়াৰ বাবে গৌৰৱৰ মুহূৰ্ত” বুলি অভিহিত কৰে। তেওঁ কয়, ভাৰতে ক্ৰীড়াৰ ক্ষেত্ৰত ব্যতিক্ৰমীভাৱে ভাল প্ৰদৰ্শন অব্যাহত ৰাখিছে। আমি ইটোৰ পিছত সিটোকৈ নতুন মাইলৰ খুঁটি অৰ্জন কৰিছো। আমাৰ মহিলা ক্ৰিকেট দলটোৱেও শেহতীয়াকৈ বিশ্বকাপ জয় কৰিছে।

লগতে কয়, ঘৰুৱা মাটিত স্কোয়াছ বিশ্বকাপ জয় কৰাটো অপৰিসীম গৌৰৱৰ বিষয়। গোটেই প্ৰতিযোগিতাখনত দলটোৱে এখনো মেচত পৰাস্ত হোৱা নাছিল। মই নিশ্চিত যে ক্ৰীড়া খণ্ডৰ এই উন্নয়নে দেশখনলৈ নতুন সফলতা কঢ়িয়াই আনিব।

ভাৰতৰ শীৰ্ষ স্কোয়াছ খেলুৱৈসকলেও টাৰ্গেট অলিম্পিক প’ডিয়াম আঁচনি (টপছ-TOPS)ৰ দ্বাৰা উপকৃত হৈছে, যিয়ে উচ্চ পৰ্যায়ৰ প্ৰশিক্ষণ, আন্তঃৰাষ্ট্ৰীয় অভিজ্ঞতা, আৰু বিশেষজ্ঞৰ নিৰ্দেশনাৰ জৰিয়তে তেওঁলোকৰ প্ৰস্তুতি শক্তিশালী কৰিছে।

দলটোৰ কনিষ্ঠ খেলুৱৈ অনাহত সিঙে চেন্নাইৰ দৰ্শকৰ সমৰ্থনক গুৰুত্বপূৰ্ণ বুলি কৃতিত্ব দিয়ে। ১৭ বছৰীয়া আনাহাটে কয় যে, মই মোৰ জ্যেষ্ঠ খেলুৱৈসকলৰ সৈতে প্ৰথমবাৰৰ বাবে বিশ্বকাপত খেলিছিলো। মোৰ বাবে সেয়া আছিল এক আচৰিত শিক্ষণ অভিজ্ঞতা। চেন্নাইৰ দৰ্শকক ধন্যবাদ জনাইছো তেওঁলোকৰ অবিৰত সমৰ্থনৰ বাবে।

ভাৰতীয় দলটোৰ দৃষ্টি এতিয়া ২০২৬ চনৰ এছিয়ান গেমছ আৰু তাৰ পিছত ২০২৮ চনৰ লছ এঞ্জেলছ অলিম্পিকৰ ওপৰত, য’ত স্কোয়াছক প্ৰথমবাৰৰ বাবে অলিম্পিক ক্ৰীড়া হিচাপে অন্তৰ্ভুক্ত কৰা হ’ব।

অহা বছৰ জাপানত অনুষ্ঠিত হ’বলগীয়া এছিয়ান গেমছৰ আগত পদ্মশ্ৰী আৰু অৰ্জুন বঁটা বিজয়ী যোছনা চিন্নাপ্পাও আশাবাদী। ৩৯ বছৰীয়া জোছনাই কয়, আমি কেইবামাহো ধৰি ইয়াৰ বাবে প্ৰস্তুতি চলাই আহিছো, আৰু বিশ্বকাপৰ অভিজ্ঞতা আছিল কল্পনাতীত। ই এছিয়ান গেমছৰ বাবে আমাৰ আত্মবিশ্বাস যথেষ্ট বৃদ্ধি কৰিছে। ব্যক্তিগতভাৱে মই অনুকূল ফিটনেছ বজাই ৰাখিবলৈ আৰু গেমছৰ বাবে যোগ্যতা অৰ্জন কৰিবলৈ চেষ্টা কৰিম।

हिन्दुस्थान समाचार / অৰৱিন্দ