নতুন দিল্লী, ১৭ ডিচেম্বৰ (হি.স.)। এফ আই এইচ হকী পুৰুষৰ জুনিয়ৰ বিশ্বকাপত ব্ৰঞ্জৰ পদক লাভ কৰাৰ পিছত ভাৰতীয় জুনিয়ৰ দলৰ খেলুৱৈসকলে এতিয়া আগন্তুক হিৰো হকী ইণ্ডিয়া লীগ (এইচ আই এল)লৈ গুৰুত্ব আৰোপ কৰিছে। আৰ্জেণ্টিনাৰ বিৰুদ্ধে ৪-২ গ’লত গুঞ্জৰিত জয়লাভ কৰি প্ৰতিযোগিতাখনৰ সামৰণি পৰা দলটোৰ যুৱ তাৰকাসকলে ছিনিয়ৰ দলত স্থান নিশ্চিত কৰাৰ আশাৰে লীগত নিজকে প্ৰমাণ কৰিবলৈ বিচাৰিছে।

২৮ ডিচেম্বৰৰ পৰা ৰাঞ্চিত মহিলা হিৰো হকী ইণ্ডিয়া লীগ আৰম্ভ হোৱাৰ বিপৰীতে ৩ জানুৱাৰীৰ পৰা চেন্নাইত অনুষ্ঠিত হ’ব পুৰুষৰ লীগ।

জুনিয়ৰ খেলুৱৈসকলে ভালদৰেই জানে যে এই লীগখন তেওঁলোকৰ কেৰিয়াৰৰ বাবে অতি গুৰুত্বপূৰ্ণ। ভাৰতীয় জ্যেষ্ঠ দলৰ মুখ্য প্ৰশিক্ষক ক্ৰেগ ফুলটনে তেওঁলোকৰ প্ৰদৰ্শন তীক্ষ্ণ দৃষ্টিৰে নিৰীক্ষণ কৰি আছে। এই সন্দৰ্ভত কোৱাৰ সময়ত প্ৰতিযোগিতাখনত মুঠ পাঁচটা গ’ল দিয়া দিলৰাজ সিঙে কয়, জুনিয়ৰ বিশ্বকাপত পদক লাভ কৰাটো আমাৰ বাবে এক ডাঙৰ অভিজ্ঞতা আছিল, কিন্তু এতিয়া হকী ইণ্ডিয়া লীগত ভাল প্ৰদৰ্শন কৰাটোৱেই হৈছে ছিনিয়ৰ দলত স্থান নিশ্চিত কৰাৰ পৰৱৰ্তী ডাঙৰ পদক্ষেপ। ইয়াত আমি বিশ্বৰ বিভিন্ন প্ৰান্তৰ জ্যেষ্ঠ খেলুৱৈৰ সৈতে একেখন মঞ্চত খেলিম, গতিকে ভাল প্ৰদৰ্শন কৰাটো অতি গুৰুত্বপূৰ্ণ।

এই ছিজনত এছ জি পাইপাৰ্ছৰ হৈ খেলিব দিলৰাজ সিঙে।

ব্ৰঞ্জৰ পদক মেচখনত এক উজ্জ্বল গ’ল দিয়াৰ বাবে প্লেয়াৰ অৱ দ্য মেচৰ বঁটা লাভ কৰা আনমোল এক্কাইও লীগক তেওঁৰ বাবে এক ডাঙৰ সুযোগ বুলি গণ্য কৰে।

তেওঁ কয়, এই ছিজনত ৰাঞ্চি ৰয়েলছৰ হৈ খেলিবলৈ পাই মই অতিশয় উৎসাহিত। ইয়াত মই লয়ক লুইপাৰ্ট আৰু টম বুনৰ দৰে উৎকৃষ্ট পিচি বিশেষজ্ঞৰ সৈতে খেলিবলৈ আৰু তেওঁলোকৰ পৰা শিকিবলৈ সুযোগ পাম। মই নিশ্চিত যে এই অভিজ্ঞতাই মোৰ চিনিয়ৰ কোৰ গ্ৰুপত স্থান পোৱাৰ সম্ভাৱনা শক্তিশালী কৰিব।

ভাৰতীয় ফৰৱাৰ্ড লাইনৰ গুৰুত্বপূৰ্ণ খেলুৱৈ তথা ৰাউণ্ড ৰবিন পৰ্যায়ত হেট্ৰিক স্ক’ৰাৰ আৰ্শদীপ সিঙক এই ছিজনত হায়দৰাবাদ হাৰিকেনছৰ জাৰ্চি পিন্ধি দেখা যাব।

তেওঁ কয়, হকী ইণ্ডিয়া লীগক লৈ মই অতিশয় উৎসাহিত। এই লীগে ইতিমধ্যে বহু খেলুৱৈক ছিনিয়ৰ দলত উপনীত হোৱাত সহায় কৰিছে। ইয়াৰ এক উদাহৰণ অমিত ৰোহিদাস, ২০১৭ চনত কলিংগা লেন্সাৰছৰ সৈতে খেলাৰ পিছত তেওঁ নতুন ভৰিৰ স্থান লাভ কৰিছে। আমি জানো যে আগন্তুক বছৰটো আমাৰ বাবে অতি গুৰুত্বপূৰ্ণ। যদি আমি এতিয়া ভাল প্ৰদৰ্শন নকৰো তেন্তে ছিনিয়ৰ দললৈ যোৱাৰ পথ আৰু দীঘলীয়া হ'ব।

আৰ্ছদীপে আৰু কয় যে মুখ্য প্ৰশিক্ষক ক্ৰেগ ফুলটনে ইতিমধ্যে শিবিৰৰ সময়ত অনুশীলন মেচত জুনিয়ৰ আৰু চিনিয়ৰ দলৰ প্ৰদৰ্শন পৰ্যবেক্ষণ কৰিছে, আৰু এতিয়া এইচ আই এলৰ খেলুৱৈসকলক নিবিড়ভাৱে নিৰীক্ষণ কৰিব।

এই ছিজনত সকলো জুনিয়ৰ খেলুৱৈয়েই লীগৰ ছটা ফ্ৰেঞ্চাইজি দলৰ অংশ, যিয়ে খিতাপৰ বাবে প্ৰতিযোগিতাত অৱতীৰ্ণ হ’ব। চেন্নাইৰ মেয়ৰ ৰাধাকৃষ্ণন হকী ষ্টেডিয়ামত তামিলনাডু ড্ৰেগনছ আৰু হায়দৰাবাদ হাৰিকেনছৰ মাজত অনুষ্ঠিত হ’ব এই প্ৰতিযোগিতাৰ উদ্বোধনী মেচ।

हिन्दुस्थान समाचार / অৰৱিন্দ