নতুন দিল্লী, ১১ ডিচেম্বৰ (হি.স.)। ৰাজ্যসভাত বৃহস্পতিবাৰৰ পৰা নিৰ্বাচনী সংস্কাৰ সন্দৰ্ভত আলোচনা আৰম্ভ হয়। আলোচনাৰ আৰম্ভণিতে কংগ্ৰেছ সাংসদ অজয় মাকেনে কয় যে ভাৰত গণতন্ত্ৰৰ মাতৃ, কিন্তু হয়তো আজি ভাৰতত গণতন্ত্ৰ জীয়াই থকা নাই। গণতান্ত্ৰিক প্ৰক্ৰিয়াৰ তিনিটা উপাদান আছে: সকলো দলৰ বাবে সমান সুযোগ, স্বচ্ছতা, আৰু বিশ্বাসযোগ্যতা। নিৰ্বাচন আয়োগে নিজৰ বিশ্বাসযোগ্যতা ঘূৰাই আনিব লাগিব। তেওঁ সকীয়াই দিয়ে যে বিশ্বাসযোগ্যতা সামান্য হ্ৰাস হ’লেও গণতান্ত্ৰিক প্ৰতিষ্ঠানসমূহ দুৰ্বল হ’ব পাৰে।
দলীয় বেংক একাউণ্টৰ অমিলৰ ওপৰত আলোকপাত কৰি অজয় মাকেনে কয় যে ২০২৪ চনৰ নিৰ্বাচনৰ পূৰ্বে কংগ্ৰেছৰ বেংক একাউণ্ট ফ্ৰীজ কৰা হৈছিল আৰু নিৰ্বাচনৰ ফলাফল ঘোষণা হোৱাৰ পিছতহে ফ্ৰীজ বন্ধ কৰি দিয়া হৈছিল।
স্বচ্ছতাৰ বিষয়ে উদ্বেগ প্ৰকাশ কৰি মাকেনে কয় যে সংশোধনীৰ পিছত ভোটগ্ৰহণ কেন্দ্ৰৰ পৰা চিচিটিভিৰ ফুটেজ পোৱাটো এতিয়া সম্ভৱ নহয়।
তেওঁ প্ৰশ্ন কৰে, যদি কোনো অন্যায় কৰা হোৱা নাই, তেন্তে নিৰ্বাচনী বিষয়াক কিয় ইমিউনিটি দিয়া হৈছে?
বিৰোধীয়ে যেতিয়া মহিলাৰ বাবে আৰ্থিক সাহায্য ঘোষণা কৰে, তেতিয়া নিৰ্বাচনী আচৰণ বিধিৰ উদ্ধৃতি দি উৎকোচ বুলি গণ্য কৰা হয়, কিন্তু শাসকীয় দলে যেতিয়া তেনে কৰে তেতিয়া ইয়াক একে ধৰণেৰে চোৱা নহয়।
আলোচনাত অংশগ্ৰহণ কৰি বিজেপিৰ সাংসদ ড০ সুধনশু ত্ৰিবেদীয়ে কয় যে যদি আমি পূব ইউৰোপৰ পৰা জাপানলৈ চাওঁ তেন্তে গণতান্ত্ৰিক দেশ মাত্ৰ তিনিখনহে আছে— ভাৰত, অষ্ট্ৰেলিয়া, আৰু জাপান। ইয়াৰে ভাৰতেই একমাত্ৰ সজীৱ আৰু সবল গণতন্ত্ৰ থকা দেশ।
সদনত ভাষণ দি সুধাংশু ত্ৰিবেদীয়ে ১৯৫২ চনৰ প্ৰথমটো সাধাৰণ নিৰ্বাচনৰ কথা উল্লেখ কৰে।এই নিৰ্বাচনত সংবিধানৰ স্থপতি ড° ভীমৰাও আম্বেদকাৰে বোম্বাই (বৰ্তমান মুম্বাই) উত্তৰ সমষ্টিৰ পৰা প্ৰতিদ্বন্দ্বিতা কৰিছিল। অৱশ্যে তেওঁ পৰাজিত হয়। তেওঁক কংগ্ৰেছ প্ৰাৰ্থী নাৰায়ণ কাজোলকাৰৰ বাহিৰে আন কোনোৱে পৰাস্ত কৰা নাছিল।
ড° ত্ৰিবেদীয়ে দাবী কৰে যে ৩৪ হাজাৰ ভোট বাতিল হোৱাৰ পিছত ১৫ হাজাৰ ভোটত পৰাজিত হয়। ইয়াৰ পিছতে তেতিয়াৰ প্ৰধানমন্ত্ৰী পণ্ডিত নেহৰুৱে এডৱিনা মাউণ্টবেটেনলৈ এখন চিঠি লিখিছিল।
সুধাংশু ত্ৰিবেদীয়ে সদনত অৱগত কৰে যে নেহৰুৱে মাউণ্টবেটেনলৈ লিখিছে, “বম্বে সমষ্টিত আমাৰ জয় মানি লোৱা হৈছে।” খবৰ অনুসৰি নেহৰুৱে কয় যে আম্বেদকাৰে “হিন্দু কমিউনিষ্ট”ৰ সৈতে গোপন বুজাবুজি কৰিছিল।
জৰুৰীকালীন সময়ছোৱাৰ কথা সোঁৱৰাই সুধাংশু ত্ৰিবেদীয়ে কয় যে এই সকলোবোৰ ইন্দিৰা গান্ধীৰ নিৰ্বাচনী বিজয়ৰ ওপৰত আদালতত প্ৰশ্ন উত্থাপন হোৱাৰ ফল। তেওঁ সদনত কয় যে ৰাজীৱ গান্ধীৰ কাৰ্যকালত দেশত ইভিএম (ইলেক্ট্ৰনিক ভোটিং মেচিন) প্ৰৱৰ্তন কৰা হৈছিল যদিও কংগ্ৰেছৰ পতনৰ কাৰণ প্ৰযুক্তি নহয়, স্বচ্ছতাহে। সুধাংশু ত্ৰিবেদীয়ে কয়, কংগ্ৰেছৰ যুগ শেষ হ'ল যেতিয়া চিচিটিভি কেমেৰাৰ প্ৰচলন হ'ল, ভোটাৰ আইডি কাৰ্ড কাৰ্যকৰী হ'ল, সংবাদ মাধ্যম স্বাধীন হ'ল, ন্যায়পালিকাৰ নিৰপেক্ষ হ'ল, আৰু সাক্ষৰতাৰ হাৰ ৫০ শতাংশ অতিক্ৰম কৰিলে। আগতে বেলট বাকচ লুটপাত হ'লে কংগ্ৰেছে ভোট লাভ কৰিছিল। সেই সময় আছিল যেতিয়া বুথ কেপচাৰিং হৈছিল, গুলীচালনা হৈছিল, আৰু মানুহৰ মৃত্যু হৈছিল। প্ৰযুক্তি আৰু সজাগতা শেষ হৈছে। সেই লুটপাতৰ ব্যৱস্থাটো, আৰু সেই যুগ কেতিয়াও ঘূৰি নাহে।
ডি এম কেৰ সাংসদ এন.আৰ. এলাংগোৱে নিৰ্বাচনী সংস্কাৰৰ বাবে আইনী কাঠামোৰ কথা উল্লেখ কৰিছে। তেওঁ কয় যে আজি আমাৰ হাতত সম্পূৰ্ণ নিৰাপদ নিৰ্বাচনী ব্যৱস্থা নাই। নিৰ্বাচন আয়োগে প্ৰস্তুত কৰা ইভিএমৰ ডিজাইনে আটাইতকৈ ডাঙৰ সমস্যাৰ সৃষ্টি কৰিছে। ইভিএমৰ সৈতে জড়িত নিৰ্বাচন আয়োগৰ এফএকিউত দুটা প্ৰৱেশৰ উদ্ধৃতি দি তেওঁ আঙুলিয়াই দিয়ে যে স্বচ্ছতাৰ অভাৱ আৰু কাৰিকৰী প্ৰত্যাহ্বান আছে।
ভিভিপিএটি প্ৰক্ৰিয়াৰ বিষয়ে বৰ্ণনা কৰি তেওঁ কয় যে ভোটাৰ আৰু নিয়ন্ত্ৰণ ইউনিটৰ মাজত কোনো প্ৰত্যক্ষ সংযোগ নাই। আম আদমী পাৰ্টিৰ সঞ্জয় সিঙেও আলোচনাত অংশগ্ৰহণ কৰে। তৃণমূল কংগ্ৰেছৰ সাংসদ ডোলা সেনে বাংলা ভাষাত আলোচনাত অংশগ্ৰহণ কৰে। নিৰ্বাচন আয়োগৰ অধিকাৰক্ষেত্ৰ, নাগৰিকত্বৰ সিদ্ধান্ত লোৱাৰ অধিকাৰ, বাংলাদেশী আৰু ৰোহিংগীয়া অনুপ্ৰৱেশকাৰী আদি বিষয় উত্থাপন কৰে। এআইএডিএমকেৰ সাংসদ থাম্বিদুৰাইও অংশগ্ৰহণ কৰে। তেওঁ নিৰ্বাচনী তালিকাত থকা ডুপ্লিকেট ভোটাৰক লৈ প্ৰশ্ন উত্থাপন কৰি কয় যে ৰাজ্যখনৰ শাসকীয় ডি এম কে চৰকাৰে এই প্ৰক্ৰিয়াৰ অপব্যৱহাৰ কৰিছে। এনে পৰিস্থিতিত নিৰ্বাচন আয়োগৰ এছআইআৰ প্ৰক্ৰিয়া কেনেকৈ শুদ্ধ বুলি বিবেচিত হ’ব পাৰে? ইয়াৰ পিছতে ১২ ডিচেম্বৰৰ পুৱা ১১ বজালৈ সদন স্থগিত ৰখা হয়।
हिन्दुस्थान समाचार / অৰৱিন্দ
