নতুন দিল্লী, ১১ ডিচেম্বৰ (হি.স.)। ৰাষ্ট্ৰীয় স্বয়ংসেৱক সংঘ চমুকৈ আৰ এছ এছৰ জ্যেষ্ঠ প্ৰচাৰক তথা সৰ্বভাৰতীয় কাৰ্যবাহীৰ সদস্য ইন্দ্ৰেশ কুমাৰে বৃহস্পতিবাৰে কয় যে সংঘক বুজিবলৈ হ’লে ইয়াৰ কৰ্মীসকলৰ লগতে ইয়াৰ পদ্ধতিও বুজাটো অতি প্ৰয়োজনীয়। আমাৰ ইয়াত সমৃদ্ধি নহয়, চৰিত্ৰক শ্ৰেষ্ঠ বুলি গণ্য কৰা হয়।
ইন্দ্ৰেশ কুমাৰে সংঘৰ প্ৰতিষ্ঠা ১০০ বছৰীয়া জয়ন্তী উপলক্ষে ইন্দিৰা গান্ধী ৰাষ্ট্ৰীয় কলা কেন্দ্ৰৰ উমৈহতীয়া প্ৰেক্ষাগৃহত হিন্দুস্থান সমাচাৰ গোটৰ তৰফৰ পৰা আয়োজন কৰা সামাজিক-সাংস্কৃতিক চেতনা আৰু সংঘৰ ওপৰত এক কাৰ্যসূচীত ভাষণ প্ৰদান কৰে। এই অনুষ্ঠানত হিন্দুস্থান সমাচাৰ গোটৰ দুখন আলোচনী—নভোত্থানৰ বিশেষ সংখ্যা সংঘ শতাব্দী: নয়ে ক্ষিতিজ আৰু যুগবাৰ্তাৰ বিশেষ সংখ্যা নীৱ কে পত্থৰ উন্মোচন কৰা হয়। নৱোত্থানে সংঘৰ শতবাৰ্ষিকী সম্পৰ্কীয় সাংস্কৃতিক চেতনাৰ ওপৰত গুৰুত্ব আৰোপ কৰিছে, আনহাতে যুগবাৰ্তা বিশেষ সংখ্যাত সংঘৰ ১০৫ গৰাকী জ্যেষ্ঠ প্ৰচাৰকৰ চমু জীৱনী সন্নিবিষ্ট কৰা হৈছে।
ইন্দ্ৰেশ কুমাৰে কয় যে হিন্দুস্থান সমাচাৰৰ দুখন আলোচনী—যুগৱাৰ্তা আৰু নভোত্থানৰ বিশেষ সংখ্যাত আমি ঘাইকৈ দুটা বিষয় মডেল অফ এ মেন এণ্ড মডেল অফ প্ৰোচেছ (এজন মানুহৰ আৰ্হি আৰু প্ৰক্ৰিয়াৰ আৰ্হি) দেখিবলৈ পাওঁ। সংঘৰ প্ৰচাৰক আৰু কাৰ্যকৰ্তাসকলে এইটোৱেই জীৱন নিৰ্বাহ কৰিছে। এই গ্ৰন্থখনত এই প্ৰচাৰকসকলৰ জীৱন সংকলন কৰা হৈছে। তেওঁ কৈছিল যে ১০০ বছৰ আগতে সংঘই প্ৰকৃততে পৃথিৱীত অৱতাৰ লৈছিল আৰু ড° কেশৱ বলিৰাম হেডগেৱাৰ এই অৱতাৰৰ ভগীৰথ হৈ পৰিছিল। আমি সৌভাগ্যৱান যে এই অৱতাৰ সাক্ষী হোৱাৰ, ইয়াত সমাহিত হোৱা তথা এই গংগাৰ অংশ হোৱাৰ সুযোগ পাইছো।
ইন্দ্ৰেশ কুমাৰে কয়, পৃথিৱীত বহু সভ্যতা গঢ় লৈ উঠিছে আৰু শেষ হৈ গৈছে, কিন্তু ভাৰত সদায় আছিল। আমি আছিলো, আমি আছো আৰু থাকিম। ইয়াৰ আঁৰৰ কাৰণ আমি বুজিব লাগিব। এয়াই হৈছে ভাৰতৰ জনসাধাৰণৰ চৰিত্ৰ আৰু ভাৰতৰ স্বভাৱ। তেওঁ কয় যে ভাৰতত শিক্ষাই সদায় মানুহৰ উন্নতিৰ ওপৰত গুৰুত্ব আৰোপ কৰি আহিছে। আজিৰ শিক্ষা কেৱল উত্তীৰ্ণৰ ওপৰত কেন্দ্ৰিত। আমি নৱ প্ৰজন্মক সুবিধাবাদ নহয়, ৰাষ্ট্ৰীয়তাবাদৰ পাঠ শিকাব লাগিব।
হিন্দুস্থান সমাচাৰ / মনোজ কুমাৰ শইকীয়া
