মস্কো, ০৮ নৱেম্বৰ (হি.স.)। ৰাষ্ট্ৰপতি ভ্লাদিমিৰ পুটিন আৰু বৈদেশিক মন্ত্ৰী চাৰ্গেই লাভৰভৰ মাজত হোৱা যিকোনো বিভাজনক ৰাছিয়াই স্পষ্টভাৱে খাৰিজ কৰি ইয়াক “জল্পনা-কল্পনা” বুলি অভিহিত কৰিছে।

যোৱা মাহত পুটিন আৰু আমেৰিকাৰ ৰাষ্ট্ৰপতি ড’নাল্ড ট্ৰাম্পৰ মাজত অনুষ্ঠিত হোৱা শীৰ্ষ সন্মিলন বাতিল হোৱাৰ পিছত এই জল্পনা-কল্পনা তীব্ৰতৰ হৈ পৰে। কঠোৰ আলোচনা শৈলীৰ বাবে পৰিচিত ছোভিয়েট যুগৰ প্ৰবীণ কূটনীতিবিদ ৭৫ বছৰীয়া লাভৰভ এই সপ্তাহত ক্ৰেমলিনত অনুষ্ঠিত হোৱা এখন গুৰুত্বপূৰ্ণ বৈঠকত অনুপস্থিত আছিল, যি ভূমিকাত তেওঁ সাধাৰণতে অংশগ্ৰহণ কৰে। তদুপৰি পুটিনে দক্ষিণ আফ্ৰিকাত অনুষ্ঠিত হ’বলগীয়া জি-২০ শীৰ্ষ সন্মিলনত ৰাছিয়াক প্ৰতিনিধিত্ব কৰিবলৈ আন এজন বিষয়াক কৈছে, যিটো ভূমিকা লাভৰভে সদায় লৈ আহিছে।

একেৰাহে দুসপ্তাহ ধৰি বৈদেশিক মন্ত্ৰালয়ে লাভৰভৰ আগন্তুক ভ্ৰমণৰ সময়সূচী বা ৰাজহুৱা উপস্থিতিৰ বিষয়ে প্ৰকাশ কৰা নাই, যাৰ ফলত এনে উৰাবাতৰি আৰু অধিক ইন্ধন যোগাইছে। বিশেষকৈ বুডাপেষ্টত অনুষ্ঠিত হ’বলগীয়া প্ৰস্তাৱিত শীৰ্ষ সন্মিলনৰ বিফলতাৰ বাবে দুটা দশকৰো অধিক সময় ধৰি ৰাছিয়াৰ বৈদেশিক নীতি চম্ভালি থকা লাভৰভ পুটিনৰ ঘনিষ্ঠতা দোমোজাত পৰিব পাৰে বুলিও ধাৰণা কৰা হৈছে।

ইফালে শুকুৰবাৰে সাংবাদিকসকলে লাভৰভৰ ওপৰত পুটিন বিচলিত নেকি বুলি সোধাত ক্ৰেমলিনৰ মুখপাত্ৰ দিমিট্ৰি পেস্কোভে এই কথা স্পষ্টভাৱে অস্বীকাৰ কৰে। তেওঁ ক'লে, মই এটা চমু উত্তৰ দিম। এই বাতৰিবোৰৰ কোনো সত্যতা নাই।

লাভ্ৰভৰ বৰ্তমানৰ ভূমিকা নিশ্চিত কৰি তেওঁ কয়, অৱশ্যেই। লাভৰভে বৈদেশিক মন্ত্ৰী হিচাপে কাৰ্যনিৰ্বাহ কৰি আছে।

২০ অক্টোবৰত আমেৰিকাৰ বিদেশ মন্ত্ৰী মাৰ্কো ৰুবিঅ’ৰ সৈতে লাভৰভৰ ফোন কথোপকথনৰ পিছতে বুডাপেষ্ট শীৰ্ষ সন্মিলনৰ আলোচনা আৰম্ভ হৈছিল। পুটিনৰ সৈতে আলোচনাৰ অন্তত ট্ৰাম্পে পূৰ্বে এই শীৰ্ষ সন্মিলনৰ কথা ঘোষণা কৰিছিল। কিন্তু পিছদিনা ট্ৰাম্পে পিছুৱাই গৈ ইয়াক “সময়ৰ অপচয়” বুলি অভিহিত কৰে আৰু পিছত কয় যে “কেৱল ঠিক অনুভৱ হোৱা নাছিল”।

আগষ্ট মাহত আলাস্কাত পুটিনৰ সৈতে হোৱা শীৰ্ষ সন্মিলনকে ধৰি ৰাছিয়াৰ সৈতে সম্পৰ্ক উষ্ণ কৰাৰ চেষ্টা কৰিছে ট্ৰাম্পে। ইউক্ৰেইনত বৰ্তমানৰ ফ্ৰণ্টত তেওঁ তাৎক্ষণিক যুদ্ধবিৰতিৰ পোষকতা কৰিছে। অৱশ্যে ৰাছিয়াই ইউক্ৰেইনৰ পৰা অধিক ভূখণ্ডৰ ৰেহাইৰ দাবী জনাইছে।

ইফালে সংবাদ মাধ্যমৰ বাতৰি অনুসৰি লাভৰভৰ বৈদেশিক মন্ত্ৰালয়ে ইউক্ৰেইনৰ ক্ষেত্ৰত কোনো নমনীয়তাৰ ইংগিত দিয়াৰ পিছতে আমেৰিকাই নতুন শীৰ্ষ সন্মিলন বাতিল কৰে।

এখন ব্ৰিটিছ বাতৰি কাকতৰ মতে, ৰুবিঅ’ৰ সৈতে লাভৰভৰ কথা-বতৰাই আমেৰিকাক হতাশ কৰিছিল, আৰু পুটিনৰ উদ্দেশ্য সত্ত্বেও তেওঁ আমেৰিকাৰ সৈতে সম্পৰ্ক গঢ়ি তোলাৰ প্ৰতি “ভাগৰুৱা” আৰু আগ্ৰহহীন যেন দেখা গৈছিল।

ৰাছিয়াৰ বৈদেশিক মন্ত্ৰালয়ৰ মুখপাত্ৰ মাৰিয়া জাখাৰোভাই শুকুৰবাৰে কাকতখনৰ এই প্ৰবন্ধটোক ৰাছিয়াৰ ক্ষতিৰ বাবে ৰচনা কৰা “উত্তেজক জল্পনা-কল্পনা” বুলি অভিহিত কৰে। ৰাছিয়াৰ বিৰুদ্ধে হাইব্ৰিড যুদ্ধৰ অংশ বুলি তাই অভিহিত কৰে। পুটিনে স্পষ্ট কৰি দিছে যে ইউক্ৰেইন বিষয়টোৰ বাহিৰে ৰাছিয়া আৰু আমেৰিকাৰ মাজত মিলন ৰাষ্ট্ৰীয় স্বাৰ্থত। বিশ্ব নিৰাপত্তাৰ বাবেও ই অতি গুৰুত্বপূৰ্ণ, কিয়নো দুয়োখন দেশৰ হাতত বৃহৎ পৰিমাণৰ পাৰমাণৱিক অস্ত্ৰৰ মজুত আছে।

हिन्दुस्थान समाचार / অৰৱিন্দ