শিৱসাগৰ, ০৩ নৱেম্বৰ (হি.স.)। শিৱসাগৰ জিলাৰ কাকজান ১নং কোঁৱৰ গাঁৱত আফ্ৰিকান ছোৱাইন ফিভাৰত আক্ৰান্ত হাজাৰ হাজাৰ গাহৰি ৷ দেওবাৰে শিৱসাগৰৰ পশুপালন বিভাগে নিধন কৰে প্ৰায় দুইশতাধিক গাহৰি৷ গাহৰি ফাৰ্মৰ বাবে ৪২ লাখ টকাৰ ঋণ লৈ লোকচানৰ সন্মুখীন কাকজানৰ জানমণি বুঢ়াগোহাঁই ৷ বিপাঙত পৰিছে কিকজানৰ জানমণিৰ পৰিয়ালৰ লগতে আৰু কেইবাটাও পৰিয়াল।

শিৱসাগৰ জিলাৰ কাকজান ১নং কোঁৱৰ গাঁৱত জানমণি বুঢ়াগোহাঁইৰ গাহৰি ফাৰ্মত আফ্ৰিকান ছোৱাইন ফিভাৰত আক্ৰান্ত হৈছে গাহৰি ৷ ফলত মূৰে কপালে হাত দিবলগীয়া হৈছে থলুৱা গাহৰি পালক সকলে ৷ প্ৰথমে দহটা গাহৰি পালন কৰি চৰকাৰৰ পৰা লোৱা ঋণৰ মোটা ধন ৰাশিৰ জৰিয়তে বৰ্তমান জানমণিয়ে দুশৰো অধিক গাহৰি পালন কৰি নিজৰ লগতে আৰু তিনিটাকৈ পৰিয়ালৰ আৰ্থিক ভাবে সহায় কৰি আহিছিল ৷ প্ৰায় ৪২ লাখ টকাৰ ঋণৰে জানমণিয়ে সাতবছৰ ধৰি গাহৰি পালন কৰি বাছি লৈছিল উপাৰ্জনৰ পথ ৷ পোন প্ৰথমে এই ৰোগৰ লক্ষণ দেখি গাহৰি ফাৰ্মখনৰ তিনিটা গাহৰিৰ তেজৰ নমুনা শিৱসাগৰ পশুপালন বিভাগে সংগ্ৰহ কৰি আফ্ৰিকান ছোৱাইন ফিভাৰত গাহৰি যে আক্ৰান্ত সেইয়া নিশ্চিত কৰে ৷ আফ্ৰিকান ছোৱাইন ফিভাৰত আক্ৰান্ত হোৱাত দেওবাৰে শিৱসাগৰৰ জিলা পশুপালন বিভাগে নিধন কৰিছে প্ৰায় দুই শতাধিক গাহৰি৷

চিন্তিত থলুৱা গাহৰি পালক জানমণি বুঢ়াগোঁহাই৷ কিয়নো এই গাহৰি ফাৰ্ম আৰম্ভ কৰোতে ঋণ লৈছিল জানমণিয়ে ৷ যদিহে বিভাগীয় কৰ্তৃপক্ষই জানমণিক ঋণৰ ক্ষেত্ৰত কোনোধৰণৰ ব্যৱস্থা গ্ৰহণ নকৰে তেন্তে জানমণি বুঢ়াগোহাঁইয়ে মৃত্যুৰ দৰে পথ বাছি ল’বলৈয়ো বাধ্য হ’ব বুলি সংবাদ মাধ্যমৰ সন্মুখত ব্য়ক্ত কৰে ৷

---------------

হিন্দুস্থান সমাচাৰ / প্ৰকাশ ডেকা